FIANARA 27
Manino ro Afaky Manavotsy Antsika ty Nahafatesani-Jesosy?
Lasa mpanota, mijaly, noho maty tsika satria tsy nanoriky ty safà-Ndranahary Adama noho Eva. a Fe mbo misy raha azontsika tamany. Nanao raha ho antsika Jehovah mba hanavota antsika amy ota noho fahafatesa. Nirahiny ho an-tany etoy Jesosy Kristy anakiny, le nimaty nisolo voy antsika. Volanini-Baiboly fa nanome vilim-panavota Jesosy lafa nimaty. Raha lafovily raiky amea mba hanavota olo ty atao hoe vilim-panavota. Nameani-Jesosy ty ainy lavorary mba hanavota antsika olombelo. (Vakio Matio 20:28.) Nana zo hiay zisiky farany an-tany etoy Jesosy, fe parè hamoy ani-raha zay ie mba hahavy antsika hahazo ndraiky ani-fiaina soa nafoini-Adama noho Eva iny. Natoroni-Jesosy noho Jehovah hoe tena tea antsika rozy. Hanampy anao hankasitraky marerè ani-soro nataoni-Jesosy iny fianara toy.
1. Ino ty soa azontsika amy ty nahafatesani-Jesosy henanizao?
Mpanota tsika, le maro ty raha halani-Jehovah ataontsika. Fe afaky ho nama-Ndranahary avao tsika laha tena maneny, mangataky fanengà hadisoa aminy amy alalani-Jesosy Kristy, le miezaky mafy mba tsy hampimpoly ani-hadisoa iny sasy. (1 Jaona 2:1) Mivola ty Baiboly hoe: “Maty indraiky avao amy ty ota [Kristy], zany hoe olo marina ho soloni-tsy marina, mba handaisany anareo ho amy Ndranahary.”—1 Petera 3:18.
2. Ino ty soa ho azontsika amy ty nahafatesani-Jesosy amy hoavy?
Nirahini-Jehovah, Jesosy mba hanao soro ty ainy lavorary, amy zay “tsy ho ripaky ze mampiseho finoa [ani-Jesosy], fa hana fiaina zisiky farany.” (Jaona 3:16) Lasa feno raha raty sankarazany ty fiaina lafa tsy nanoriky safà-Ndranahary Adama. Fe vokatsini-raha nataoni-Jesosy iny, le afaky handrava ty raha raty iaby Jehovah tsy ho ela. Ho afaky ho velo zisiky farany amy paradisa an-tany etoy tsika, laha asehontsika hoe mino ani-soro nataoni-Jesosy iny tsika!—Isaia 65:21-23.
DINIHO LALIKY
Hodinihintsika hoe nanino Jesosy ro nahafoy ty ainy, le manino ro mahasoa anao raha zay.
3. Manafaky antsika amy ota noho fahafatesa ty soro nataoni-Jesosy
Alefaso VIDEO toy, bakeo iaraho midiniky fanontanea io.
-
Ino ty nafoini-Adama lafa tsy nanoriky safà-Ndranahary ie?
Vakio Romanina 5:12, bakeo iaraho midiniky fanontanea toy:
-
Ino ty vokatsini-fahotani-Adama amy ty fiainanao?
Vakio Jaona 3:16, bakeo iaraho midiniky fanontanea toy:
-
Manino Jehovah ro naniraky ani-Anakilahiny iny ho an-tany etoy?
-
Olo lavorary Adama. Fe tsy nanoriky ty safà-Ndranahary ie, le nahavy ota noho fahafatesa tamin’olo iaby
-
Olo lavorary Jesosy. Nanoriky ty safà-Ndranahary ie, le hahavy ty olombelo ho lavorary sady ho velo zisiky farany
4. Mahasoa ty olo iaby soro nataoni-Jesosy iny
Alefaso VIDEO toy, bakeo iaraho midiniky fanontanea io.
-
Manino ro afaky mahasoa ty olo iaby ty nahafatesani-lahilahy raiky?
Vakio 1 Timoty 2:5, 6, bakeo iaraho midiniky fanontanea toy:
-
Olo lavorary Adama. Fe nanota ie, le nahavy ota noho fahafatesa tamin’olo iaby. Lavorary koa Jesosy. Manino ro azo volany hoe nanome “vilim-panavota mifandanja” ie?
5. Fanomeza nameani-Jehovah anao ty vilim-panavota
Rambesini-namani-Jehovah ho fanomeza namea azy ty vilim-panavota. Vakio Galatianina 2:20, bakeo iaraho midiniky fanontanea toy:
-
Ino ty mampiseho hoe nirambesini-apostoly Paoly ho fanomeza namea azy mihintsy ty vilim-panavota?
Lafa nanota Adama, le voasazy ho maty ie noho ty taranakiny. Fe nirahini-Jehovah ho maty ho anao ty Anakilahiny, amy zay iha afaky hahazo tavy ty fiaina zisiky farany.
Lafa mamaky ani-andinin-teny retoa iha, le vetsevetseo ty raha nitsapani-Jehovah lafa nahita ani-Anakilahiny iny nijalijaly. Vakio Jaona 19:1-7, 16-18, bakeo iaraho midiniky fanontanea toy:
-
Ino ty tsapanao lafa mandiniky ty raha nataoni-Jehovah noho Jesosy ho anao iha?
METY HISY HANONTANY HOE: “Le ho mety va ty hoe olo raiky avao ro nimaty mba hanavota ty olo iaby?”
-
Akory ty havalinao?
FAMINTINA
Nanao soro ty ainy Jesosy, le afaky manenga ty hadisoantsika Jehovah sady afaky hahazo tavy ty fiaina zisiky farany tsika.
Famerena
-
Manino Jesosy ro nimaty?
-
Nanome ty ainy lavorary Jesosy. Manino ro azo volany hoe vilim-panavota mifandanja raha zay?
-
Manino ro mahasoa anao ty nahafatesani-Jesosy?
DINIHO KOA RETOA
Manino ro kaihy hoe vilim-panavota ty ay lavorary nameani-Jesosy?
“Nahoana ny Soron’i Jesosy no Lazaina fa ‘Avotra Hisolo ny Maro’?” (Lahatsoratsy amy jw.org ao)
Mila manao ino tsika laha ta ho avotsy?
“Nahoana no Lazaina fa Mpamonjy i Jesosy?” (Lahatsoratsy tamy jw.org ao)
Mbo manenga ty hadisoan’olo raiky va Jehovah ndre nanao fahotà bevata olo iny?
“Valin’ireo Fanontaniana Ara-baiboly” (Ny Tilikambo Fiambenana 1 Mey 2013)
Henteo fa nanampy ani-lahilahy raiky io hanova ty toetsiny ty fahaizany mikasiky ty soro nataoni-Kristy.
“Tsy Andevozini-Hasatà Sasy Aho” (Lahatsoratsy amy jw.org ao)
a Tsy ty raha raty ataon’olo avao ro atao hoe ota. Midika koa raha io hoe mora voatariky hanao raha raty tsika satria taranakini-Adama noho Eva.