Fa nisy longonao na namanao nimaty va? Azo antoky fa nampalahelo marè anao raha zay, ka mety hanontany iha hoe: ‘Manao akory ty olo lafa maty? Mbo hifankahita amin-drozy va tsika ndraiky andro any?’ Hodinihintsika amy fianara toy noho raiky manaraky io ty fomba amaliani-Baiboly ani-fanontanea reo.

1. Manao akory ty olo lafa maty?

Nampitovizini-Jesosy amin’olo miroro marè ty olo maty. Tsy mahay ty raha miseho manodidy azy ty olo lafa miroro marè. Manino ro mitovy amin’olo miroro ty olo maty? Lafa maty ty olo, le tsy maharè mijaly sasy. Tsy mahatiaro many ty namany noho ty longony koa ie, ndre niteany marè aza rozy taloha. Mivola ty Baiboly hoe: “Ty maty tsy mahay ndre ino ndre ino.”​—Vakio Mpitoriteny 9:5.

2. Manino ro mahasoa antsika ty mahay ty marina mikasiky ty maty?

Maro ty olo matahotsy ho maty. Ty sisany aza matahotsy olo maty. Fe afaky manampy anao ty raha volanini-Baiboly mikasiky ty maty. Nivola Jesosy hoe: “Ty marina hanafaky anareo.” (Jaona 8:32) Mampianatsy ty fivavaha sisany hoe lafa maty ty olo, le mbo velo ty fanahiny. Fe tsy zay ro ampianarini-Baiboly. Tsy mijaly ty olo lafa maty sady tsy afaky manao raha raty amintsika satria ty maty tsy mahay ndre ino ndre ino. Tsy ilà zany ty mivavaky amy maty na manao fombafomba mba tsy hampeloky azy. Tsy ilà koa ty mivavaky ho an’olo maty rey.

Mieritseritsy ty olo sisany hoe afaky mifandramby amin’olo fa nimaty ie. Fe tsy ho mety mihintsy zay satria nihitantsika teo hoe “tsy mahay ndre ino ndre ino” ty maty. Afaky mangala tahaky an’olo maty rey ty demonia, ka ze olo mihevitsy hoe afaky mifandramby amy longony na namany fa nimaty, le demonia zay ro ifandrambesany fa tsy olo iny. Afaky miaro antsika tsy hifandramby amy demonia zany ty fahaiza ty marina mikasiky ty maty. Mampitandrina antsika Jehovah mba tsy hifandramby amy maty satria hainy hoe handay fahavoaza ho antsika ty fifandrambesa amy demonia.​—Vakio Deoteronomia 18:10-12.

3. Ino ty marina mikasiky ty maty?

Samby hafa ty raha inoan’olo amy tany toy iaby mikasiky ty hoe manao akory tsika lafa maty. Mazava ho azy fa tsy kila raha inoan’olo reo, le ho samby marina iaby.

• Ino ty raha inoani-ankamaroan’olo aminareo etoy mikasiky ty maty?

 4. Tena mahasoa antsika ty marina mikasiky ty maty

Manafaky antsika ty mahay ty marina mikasiky ty maty satria lasa tsy hatahotsy an’olo maty rey sasy tsika. Vakio Mpitoriteny 9:10, bakeo iaraho midiniky fanontanea toy:

• Afaky manao raha raty amintsika va ty maty?

Miaro antsika koa ty marina amy Baiboly ao. Lasa tsy minomino fahatany, ohatsy, tsika ka hanao fombafomba mba tsy hampeloky ty maty na hivavaky aminy. Vakio Isaia 8:19 noho Apokalypsy 4:11, bakeo iaraho midiniky fanontanea toy:

• Akory ty hevitsinao, ino ty tsapani-Jehovah lafa mahita olo mivavaky na mila fanampea amin’olo fa nimaty?

5. Tena mampahery antsika ty marina mikasiky ty maty

Nampianary ty ankamaroan’olo hoe lafa maty tsika, le ampijalijalỳ mba ho fanasazia antsika amy ty raha raty nataontsika taloha. Fe mampahery antsika ty mahay hoe tsy ampijalijalỳ zao ty olo maty. Ndre ty olo nahavita raha farani-ze raty aza tsy mijalijaly zao lafa maty. Vakio Romanina 6:7, bakeo iaraho midiniky fanontanea toy:

• Mivola ty Baiboly hoe afaky madiodio amy fahotany ty olo raiky lafa maty. Akory ty hevitsinao, mbo ampijalijalỳ amy ty raha tsy mety nataony taloha va ty olo raiky lafa maty?

Lafa mihamahay soa ani-Jehovah tsika, le ho haintsika koa hoe tsy mampijalijaly olo maty zao mihintsy ie. Vakio Deoteronomia 32:4 noho 1 Jaona 4:8, bakeo iaraho midiniky fanontanea toy:

• Laha hentea ty toetsy soa-Ndranahary hita tamy andinin-teny teo rey, hampijalijaly ty olo fa nimaty ie?

• Mampahery va ty fahitanao ty marina mikasiky ty maty? Nanino?

 FAMINTINA

Lafa maty ty olo raiky, le tampitsy eo ty fiainany. Tsy mijalijaly ty olo maty. Tsy afaky manao raha raty amin’olo velo koa ty maty.

Famerena

• Manao akory ty olo lafa maty?

• Manino ro tena mahasoa antsika ty marina mikasiky ty maty?

• Manino ro tena mampahery antsika ty marina mikasiky ty maty?