FIANARA 34

Ino ty Azontsika Atao mba Hampisehoa hoe Tea ani-Jehovah Tsika?

HANENTY

Tsapanao va hoe mihamitombo ty fitiavanao a-Ndranahary lafa nianatsy Baiboly iha? Teanao va ty hanasoa avao ty finamànao aminy? Laha zay ie, le tiarovo fa lafa hitani-Jehovah hoe mihatea azy avao iha, le hihatea anao koa ie sady hikarakara anao marerè. Ino ty azonao atao mba hampisehoa hoe tea azy iha?

1. Akory ty ampisehoantsika amy Jehovah hoe tea azy tsika?

Atorontsika hoe tea ani-Jehovah tsika lafa manoriky soa ty safàny. (Vakio 1 Jaona 5:3.) Tsy forosevany hanoriky ty safàny ty olo, fa engàny hifily ze teany hatao, na hanoriky, na tsy hanoriky. Ino ty antony? Teani-Jehovah ‘hanoriky safà amy fo’ tsika. (Romanina 6:17) Zany hoe, teany hanoriky ty safàny iha satria tea azy fa tsy hoe foroseva hanao ani-zay. Hanampy anao ty Fizarà faha-3 noho faha-4 amy boky toy, mba hampiseho ty fitiavanao ani-Jehovah amy alalani-fanaova ty raha teany noho fanalavira ty raha tsy teany.

2. Manino ro mety ho sarotsy ty mampiseho hoe tea ani-Jehovah tsika?

“Maro ty fahasahiranani-olo marina.” (Salamo 34:19) Samby sahira tsika iaby satria tsy lavorary. Mety hampijaly antsika koa ty tsy fananan-drala, ty tsy rariny, na misy problemo hafa. Mety tsy ho mora ty manao ty raha takini-Jehovah lafa misy raha sarotsy mahazo antsika. Ty tsy manoriky ty fitsipikini-Jehovah ro mety ho mora amy fotoa rey. Fe laha manoriky ty safàni-Jehovah avao iha, le asehonao hoe tea azy vatany iha sady tsy misy teanao mandilatsy azy. Asehonao amy zay koa hoe tsy mivaliky aminy iha, le tsy hivaliky aminao koa ie. Tsy hanary anao mihintsy ie.—Vakio Salamo 4:3.

DINIHO LALIKY

Hodinihintsika hoe manino ro vatan-draha amy Jehovah ty fanorihanao ty safàny? Le ino ty hanampy anao tsy hivaliky aminy mihintsy?

3. Manasara raha raty anao Satana

Resahini-bokini-Joba fa nanasara raha raty ani-Joba noho ty olo iaby manompo ani-Jehovah Satana. Vakio Joba 1:1, 6–2:10, bakeo iaraho midiniky fanontanea retoa:

Ino ty antony nanorihani-Joba ty safàni-Jehovah laha hentea ty raha nivolanini-Satana?—Henteo Joba 1:9-11.
Nasarani-Satana raha raty ty olo iaby, anatini-zay iha. Ino ty nivolaniny?—Henteo Joba 2:4.

Vakio Joba 27:5b, bakeo iaraho midiniky fanontanea toy:

Akory ty nampisehoani-Joba hoe tena tea ani-Jehovah ie?

Nasehoni-Joba hoe tea ani-Jehovah ie lafa tsy nivaliky aminy mihintsy

Asehontsika hoe tea ani-Jehovah tsika lafa tsy mivaliky aminy avao

4. Ampifalifaleo ty foni-Jehovah

Vakio Ohabolana 27:11, bakeo iaraho midiniky fanontanea retoa:

Ino ty tsapani-Jehovah lafa hendry noho manoriky ty safàny iha? Ino ty antony?

5. Ho vitanao ty tsy hivaliky amy Jehovah

Manosiky antsika hiresaky mikasiky ani-Jehovah amin’olo hafa ty fitiavantsika azy. Hahavita hanao ani-zay avao tsika ndre misy raha sarotsy aza laha tsy mivaliky aminy. Alefaso VIDEO toy, bakeo iaraho midiniky fanontanea retoa:

VIDEO: Arovo ty Finoanao Lafa Misy Manohitsy (5:09)

Sarotsy aminao va kindraiky ty miresaky amin’olo mikasiky ani-Jehovah?
Ino ty nanampy ani-Grayson tsy hatahotsy?

Ho vitantsika ty tsy hivaliky amy Jehovah laha tea ty raha teany tsika sady malay ze raha halany. Vakio Salamo 97:10, bakeo iaraho midiniky fanontanea retoa:

Araky ty nianaranao bakany zay, ino ty raha sisany teani-Jehovah, le ino ty raha sisany halany?
Ino ty hanampy anao ho tea ty soa noho halay ty raty?

6. Mahasoa ty manoriky safàni-Jehovah

Tozoro soa avao ty manoriky safàni-Jehovah. Vakio Isaia 48:17, 18, bakeo iaraho midiniky fanontanea retoa:

Matoky va iha hoe tena mahay ze hahasoa antsika Jehovah? Manino?
Ino ty soa niazonao lafa nianatsy mikasiky ani-Jehovah noho ty raha hafa amy Baiboly ao iha?

MIERITSERITSY TY OLO SISANY HOE: “Tsy hahavita hampifalifaly a-Ndranahary zao tsika.”