FIANARA 37
Ty Raha Volanini-Baiboly Mikasiky Asa Noho Drala
Fa nisy fotoa va iha niasa loha mikasiky asa na drala? Tsy mora kindraiky ty hoe mila ty raha ivelomantsika sady manompo ani-Jehovah amy fo. Fe misy torohevitsy soa afaky manampy antsika amy Baiboly ao.
1. Ino ty raha volanini-Baiboly mikasiky asa?
Teani-Jehovah hahazo tavy ty asantsika tsika. Mivola ty Baiboly hoe “tsy misy raha mahasoa ty olo mandilatsy ty ... mifalifaly amy ty asa mafy ataony.” (Mpitoriteny 2:24) Miasa mafy Jehovah. Ka laha mazoto miasa manahaky azy tsika, le ho falifaly sady ho afa-po.
Tena ilà ty miasa. Fe tsy tokony ho asa ro vatan-draha marè amintsika mandilatsy ty fanompoa ani-Jehovah. (Jaona 6:27) Fa nampitamà Jehovah hoe laha ataontsika amy pilasy voalohany ty fanompoa azy, le hameany antsika ty raha ilàntsika amy fiaina.
2. Akory ty tokony ho fahitantsika ty drala?
Mivola ty Baiboly hoe “fiarova ty drala”, fe resahiny koa fa tsy ty drala avao ro manday hasambara ho antsika. (Mpitoriteny 7:12) Zay mahavy antsika ampirisihy mba tsy ho tea drala marè fa ‘ho afa-po amy ze misy eo.’ (Vakio Hebreo 13:5.) Laha tsika miezaky ho afa-po amy ze raha ananantsika, le tsy hiasa loha na ho kivikivy amy ty raha mbo tsy ananantsika. Tsy hitrosatrosa fahatany koa tsika amy zay. (Ohabolana 22:7) Sady tsy ho voatariky hiloka na hirisiky hanao raha eritseretin’olo hoe maha mpanarivo malaky.
3. Ino ty fomba soa azo ampiasà ty drala?
Ndranahary matariky Jehovah. Manahaky azy tsika laha ‘tea manome, sady parè hizara.’ (1 Timoty 6:18) Azontsika atao ty mampiasa ty dralantsika mba hanohana ty fiangona noho hanampea ty olo sahira, sirtò ty mpiara-manompo amintsika. Tsy ty hamaroani-drala ameantsika ro tena henteani-Jehovah, fa ty antony manosiky antsika hanome. Laha baka am-po ty fanomeza ataontsika, le ho sambatsy tsika sady hampifalifaly ani-Jehovah.—Vakio Asan’ny Apostoly 20:35.
DINIHO LALIKY
Hohenteantsika ty soa ho azontsika laha tsy tandrena marè amy asa tsika sady miezaky ho afa-po amy ze ananantsika.
4. Ameo voninahitsy Jehovah lafa miasa iha
Tokony ho hita amy asa ataontsika hoe namani-Jehovah tsika. Alefaso VIDEO toy, bakeo iaraho midiniky fanontanea retoa.
-
Hita tamy video iny hoe manao akory ty toetsini-Jason lafa am-piasà any. Ino ty hitanao hoe mampiavaky ani-toetsiny zay?
-
Ino ty nataony mba tsy ho tandrena marè amy asa?
Vakio Kolosianina 3:23, 24, bakeo iaraho midiniky fanontanea toy:
-
Manino ro vatan-draha ty hoe miasa soa sady amy fo?
Tena ilà ty miasa. Fe tsy tokony ho asa ro vatan-draha marè amintsika mandilatsy ty fanompoa ani-Jehovah
5. Mahasoa antsika ty miezaky ho afa-po amy ze ananantsika
Tsy afa-po amy ze ananany ty ankamaroan’olo, le miezaky hila drala marerè. Fe mifanohitsy amy zay ty ampirisihini-Baiboly hataontsika. Vakio 1 Timoty 6:6-8, bakeo iaraho midiniky fanontanea toy:
-
Mampirisiky antsika hanao ino ty Baiboly?
Afaky ho sambatsy tsika, ndre kelikely avao ty raha ananantsika. Alefaso VIDEO toy, bakeo iaraho midiniky fanontanea io.
-
Manino ro sambatsy fianakavia rey ndre kelikely avao ty drala nananan-drozy?
Fe akory laha fa ampy antsika ty dralantsika, fe mbo ta hahazo avao tsika? Hita amy tantara nivolanini-Jesosy toy ty vokatsini-raha zay. Vakio Lioka 12:15-21, bakeo iaraho midiniky fanontanea toy:
-
Ino ty raha nianaranao baka amy tantara nivolanini-Jesosy io? (Henteo ty andininy 15.)
Vakio noho ampitovizo ty Ohabolana 10:22 noho 1 Timoty 6:10. Bakeo iaraho midiniky fanontanea retoa:
-
Akory ty hevitsinao, aia amy retoa ty tena vatan-draha: Ty mifandramby soa amy Jehovah va sa ty manan-drala be? Ino ty antony?
-
Ino iaby ty problemo mety hiseho laha tsy afa-po amy ze ananantsika tsika fa miezaky hila drala marerè avao?
6. Hanome ze raha tena ilàntsika Jehovah
Mety hana problemo tsika amy ty asantsika na tsy ampy ty dralantsika. Fe akory ty ampisehoantsika hoe matoky ani-Jehovah avao tsika? Alefaso VIDEO toy, bakeo iaraho midiniky fanontanea reo.
-
Ino iaby ty problemo nahazo ani-rahalahy tamy video tao iny?
-
Ino ty nataony mba hiatreha ani-raha manahira rey?
Vakio Matio 6:25-34, bakeo iaraho midiniky fanontanea toy:
-
Ino ty raha ampitamanini-Jehovah fa hataony amy ze olo manao amy pilasy voalohany ty fanompoa azy?
MIERITSERITSY TY OLO SISANY HOE: “Zaho tsy maintsy miasa mba hamelomako ty fianakaviako, ka tsy afaky mivory sankerinandro.”
-
Ino ty andinin-teny mahavy anao ho resy lahatsy hoe tsy misy soa mandilatsy ty manao voaloha lista ty fanompoa ani-Jehovah?
FAMINTINA
Ilà ty asa noho ty drala, fe tsy tokony hengantsika hanelingely ty fanompoantsika ani-Jehovah raha reo.
Famerena
-
Ino ty hanampy anao tsy ho tandrena marè amy asa?
-
Ino ty soa ho azonao laha miezaky ho afa-po amy ze anananao iha?
-
Mampitamà Jehovah fa hanome ze raha ilàni-mpanompony. Akory ty ampisehoanao hoe matoky ani-zay iha?
DINIHO KOA RETOA
Mivola va ty Baiboly hoe raty ty drala?
“Ny Vola ve no Fototry ny Ratsy Rehetra?” (Lahatsoratsy amy jw.org ao)
Ino ty tokony hataontsika laha teantsika ho falifaly amy ty fanomezantsika Jehovah?
Tsy mampanino va ty miloka?
Niova ty lahilahy raiky mpiloka sady mpangalatsy. Ino ty nanampy azy hiova?
‘Tena Tiako ny Hazakaza-Tsoavaly’ (Ny Tilikambo Fiambenana 1 Novambra 2011)
Mety ho Teanao Koa
FANONTANEA FAPETRAKIN’OLO
Ino ro Atao hoe Fianara Baiboly?
Anovo hay ty valy fanontanea mikasiky fandahara fampianara Baiboly tsy andoava drala ataonay.
