FIANARA 42
Ino ty Volanini-Baiboly Mikasiky Fanambalea?
Mieritseritsy ty ankamaroan’olo amy tany sisany hoe tsy ho sambatsy mihintsy ty olo raiky laha tsy manambaly. Fe tsy ze kila olo manambaly ro sambatsy. Misy koa olo tsy manambaly fe mahatiaro sambatsy. Volanini-Baiboly fa samby fanomeza baka amy Jehovah iaby ty hoe manambaly noho ty hoe tsy manambaly.
1. Ino ty tombony ho an’olo tsy manambaly?
Mivola ty Baiboly hoe: ‘Ze manambaly le manao soa, fa ze tsy manambaly le manao soa marerè.’ (Vakio 1 Korintianina 7:32, 33, 38.) Manino ty olo tsy manambaly ro volany hoe “manao soa marerè”? Satria tsy misy valy hokarakarà rozy ka mana fotoa noho hery hanaova raha maro. Afaky mampitombo soa ty fanompoan-drozy rozy, ohatsy hoe mifindra amy tanà hafa mba hitory ty vaovao soa. Toy ty tena vatan-draha, afaky manoka fotoa maro rozy mba hifandrambesa marìny amy Jehovah.
2. Ino ty tombony ho an’olo mpivaly ara-dalàna?
Manahaky olo tsy manambaly rey avao, le misy tombony koa azon’olo manambaly. Mivola ty Baiboly fa “soa ty roe tany ty raiky.” (Mpitoriteny 4:9) Tena mahatsapa an’io soa ty olo manambaly, sirtò ty mpivaly manoriky ty torolalani-Baiboly. Manao voady ty olo roe mpivaly ara-dalàna hoe hifankatea noho hifanaja zisiky farany. Vokany, milamy soa ty sain-drozy laha ohary amy mpivaly manao tokantranomaso. Milamin-tsay koa ty ajà lafa mahay hoe mpivaly ara-dalàna ty babany noho reniny.
3. Akory ty fiheverani-Jehovah ty fanambalea?
Lafa namoro ty fanambalea voalohany Jehovah, le hoy ty asany: “Ty lahilahy hiala amy ty babany noho reniny, ka hiharo amy ty valiny.” (Genesisy 2:24) Teani-Jehovah zany laha mifankatea noho miaraky mipetraky avao ty mpivaly laha mbo samby velo. Antony raiky avao ro azon-drozy isaraha, tsy ino zay fa ty fijangajangà. Laha nanao firaisa tamin’olo hafa ty valin’olo raiky, le afaky mifily ie hoe hisaraky amy valiny nijangajanga iny va, sa hanenga ty hadisoany. a (Matio 19:9) Tsy teani-Jehovah ty olo manambaly maro na mampirafy.—1 Timoty 3:2.
DINIHO LALIKY
Hodinihintsika hoe afaky ho sambatsy avao iha ndre manambaly, ndre tsy manambaly sady afaky mampifalifaly ani-Jehovah.
4. Ampiasao amy fomba soa ty fiainanao laha tsy manambaly iha
Fanomeza ty fahitani-Jesosy ty hoe tsy manambaly. (Matio 19:11, 12) Vakio Matio 4:23, bakeo iaraho midiniky fanontanea toy:
-
Ino ty nataoni-Jesosy mba hampiasà amy fomba soa ty fiainany amy maha tsy manambaly azy?
Afaky ho sambatsy koa ty Kristiana tsy manambaly laha miezaky hanahaky ani-Jesosy. Alefaso VIDEO toy, bakeo iaraho midiniky fanontanea io.
-
Ino iaby ty raha azoni-Kristiana tsy manambaly atao?
Fa nihainao va?
Tsy volanini-Baiboly hoe firy tao ty olo raiky vo mahazo manambaly. Fe misy torohevitsy ao ahità hoe soa laha fa “lisatsy ty fotoa fivelarani-hatanorà” ty olo raiky vo manambaly. (1 Korintianina 7:36) Manjeky marè ty faniria ta hanao firaisa laha mbo tsy lisatsy fotoa io, ka mety hahavy ty tanora tsy hieritseritsy soa raha zay.
5. Filio soa ty olo ho valinao
Raiky amy fanapahan-kevitsy bevata horambesinao ty fifilia ze olo ho valinao. Vakio Matio 19:4-6, 9, bakeo iaraho midiniky fanontanea toy:
-
Manino ty Kristiana ro tsy tokony halisa hanambaly?
Resahini-Baiboly hoe olo mana toetsy soa ro soa alà valy. Fa toy ty tena vatan-draha, mila tena tea ani-Jehovah ty olo eritseretinao ho valỳ. b Vakio 1 Korintianina 7:39 noho 2 Korintianina 6:14. Bakeo iaraho midiniky fanontanea retoa:
-
Manino tsika ro tokony hanambaly Kristiana mitovy amintsika avao?
-
Akory ty hevitsinao, ino ty tsapani-Jehovah laha manambaly olo tsy tea Azy tsika?
6. Miezaha hitovy hevitsy amy Jehovah amy resaky fanambalea
Tea tena ty lahilahy israelita sisany, le nisaraky tamy ty valiny. Vakio Malakia 2:13, 14, 16, bakeo iaraho midiniky fanontanea toy:
-
Manino ro halani-Jehovah ty olo misaraky amy valiny nefa tsy nisy fijangajangà?
Alefaso VIDEO toy, bakeo iaraho midiniky fanontanea io.
-
Laha tsy manompo ani-Jehovah ty valinao, ino ty azonao atao mba ho sambatsy ty tokantranonareo?
7. Oriho ty fitsipikini-Jehovah mikasiky fanambalea
Mitaky ezaky mafy kindraiky ty manoriky ty fitsipikini-Jehovah mikasiky fanambalea. c Fe tahini-Jehovah ze manoriky ty fitsipikiny. Alefaso VIDEO toy.
Vakio Hebreo 13:4, bakeo iaraho midiniky fanontanea retoa:
-
Akory ty hevitsinao, sarotsy va ty manoriky ty fitsipikini-Jehovah mikasiky fanambalea? Ino ty antony?
Teani-Jehovah laha misoratsy ara-dalàna ty mpivaly. Teany koa laha atao ara-dalàna lafa misy ty fisaraha. Mitaky ani-reo ty manam-pahefà amy tany maro. Vakio Titosy 3:1, bakeo iaraho midiniky fanontanea toy:
-
Laha manambaly iha, azonao antoky va fa nisoratsy ara-dalàna nareo morovaly?
METY HISY HANONTANY HOE: “Laha mifankatea ty olo roe, ino ty manaka an-drozy tsy hiharo trano ndre mbo tsy vita soratsy?”
-
Akory ty havalinao?
FAMINTINA
Samby fanomeza baka amy Jehovah iaby ty hoe manambaly noho ty hoe tsy manambaly. Samby mahasambatsy iaby reo laha ampiasà soa mba hanaova ty sitraponi-Jehovah.
Famerena
-
Akory ty azon’olo tsy manambaly atao mba hampiasà soa ty fiainany?
-
Manino ty Baiboly ro mivola fa tokony ho Kristiana mitovy amintsika avao ro valìntsika?
-
Laha hentea ty Baiboly, le raha raiky avao ro ahafahani-mpivaly misaraky. Ino raha zay?
DINIHO KOA RETOA
Ino ty dikani-hoe manambaly “amy Tompo ao avao”?
“Fanontanian’ny Mpamaky” (Ny Tilikambo Fiambenana 1 Jolay 2004)
Hanampy anao hahay handramby fanapahan-kevitsy soa mikasiky fanambalea video roe reto.
Manino ty rahalahy raiky ro nahatsapa hoe soa marè mandilatsy ty raha nafoiny ty raha nameani-Jehovah azy?
Ino iaby ty raha mila dinihin’olo raiky alohani-hanapahany hevitsy hoe hisaraky amy valiny va, sa ho tezitsy le hiala tse?
“Hajao ‘Izay Nampiraisin’Andriamanitra Zioga’” (Ny Tilikambo Fiambenana Desambra 2018)
a Lafa amin’ino ty olo manambaly ro afaky tezitsy na mifehy? Henteo ty Fanazavà Hevitsy 4.
b Amy tany sisany, le ty ray aman-dreny ro mifily valy ho ahi-ty anakiny. Fe soa fanahy ty ray aman-dreny laha tsy ze olo manan-kanana na ze olo mana pilasy anabo avao ro teany ho valy ty anakiny, fa ze olo tena tea ani-Jehovah.
c Laha miharo trano amin’olo tsy valinao iha, le anjaranao ty manapa-kevitsy hoe hisaraky aminy va iha, sa hanambaly azy ara-dalàna.