Samby mana ty hevitsiny mikasiky toaky ty olo amy tany toy iaby. Misy, ohatsy, mino toaky lafa tafiaraky amy ty namany. Ty sisany tsy mikitiky mihintsy ndre kelikely. Ao koa ty mino marè, le tsy miala eo laha tsy mamo. Ino ty raha volanini-Baiboly mikasiky toaky?

1. Tsy mety va ty mino toaky?

Tsy mandrara olo hino toaky ty Baiboly. Volany mazava ao hoe fanomeza baka amy Ndranahary ty ‘divay satria mampifalifaly ty fon’olombelo.’ (Salamo 104:14, 15) Resahini-Baiboly mihintsy aza hoe nino toaky ty mpanompo-Ndranahary tsy nivaliky sisany.​—1 Timoty 5:23.

2. Ino ty torohevitsy ameani-Baiboly ho an’olo mino toaky?

Halani-Jehovah ty finoma toaky maro marè na ty fimamoa. (Galatianina 5:21) Mivola ty Baiboly hoe: “Ka miharo amin’olo mpiboboky divay.” (Ohabolana 23:20) Tsy tokony hino maro marè zany tsika lafa mino toaky, ndre miaraky amin’olo, ndre tsika raiky avao. Fa maro marè ty toaky ninomin’olo raiky laha fa manjary tsy mahay mandiniky soa ie, tsy mahafehy ty raha ataony na volaniny, na lasa marary. Ka akory laha tsy mahatanjaky ty aintsika tsika lafa mino toaky? Soa laha tsy mino mihintsy tsika laha zay ie.

3. Akory ty ampisehoantsika hoe manaja ty fanapahan-kevitsin’olo hafa tsika amy resaky toaky?

Ty olo kiraidraiky ro manapa-kevitsy hoe hino toaky va ie, sa tsy hino. Ka laha misy olo mino toaky antonony soa, le tsy tokony hitsaratsara azy tsika. Tsy tokony hoforosevantsika koa ze nifily ty tsy hino. (Romanina 14:10) Mifily ty tsy hino tsika laha hitantsika hoe hampisy problemo amy ty hafa raha zay. (Vakio Romanina 14:21.) ‘Tsy ze hahasoa ty vatantsika’ avao ro ilàntsika “fa ze hahasoa ty hafa” koa.​—Vakio 1 Korintianina 10:23, 24.

 DINIHO LALIKY

4. Laha manapa-kevitsy hino toaky iha

Manao akory ty fahitani-Jesosy ty toaky? Manampy antsika hahay ani-zay fahagagà voalohany nataony iny. Vakio Jaona 2:1-11, bakeo iaraho midiniky fanontanea retoa:

• Laha hentea fahagagà io, akory ty fahitani-Jesosy ty toaky noho ty olo mino toaky?

• Tsy manaka olo hino toaky Jesosy. Akory zany ty tokony ho fahitani-Kristiana ty olo mino toaky?

Afaky mino toaky ty Kristiana raiky laha ta hino, fe tsy midika zay hoe tozoro mety aminy avao ty mino toaky. Vakio Ohabolana 22:3, bakeo iaraho midiniky hoe: Manino iha ro mety hanapa-kevitsy tsy hino lafa...

• handay tomabily na hampiasa masìny fiasà?

• bevoka?

• nivolanani-dokotera hoe tsy tokony hino toaky?

• tsy mahatanjaky ay saky mino toaky, fa ta hino maro marè?

• raràni-lalàna tsy hino toaky?

• miaraky amin’olo nanapa-kevitsy tsy hino toaky sasy satria nimamo lava ie taloha?

Mety va ty manisy toaky amy mariazy na amy fety? Ino ty hanampy anao handramby fanapahan-kevitsy soa? Alefaso VIDEO toy.

Vakio Romanina 13:13 noho 1 Korintianina 10:31, 32. Saky vita vaky ty andinin-teny raiky, le iaraho midiniky fanontanea toy:

• Manino torolala io ro afaky manampy anao handramby fanapahan-kevitsy mampifalifaly ani-Jehovah?

 5. Ty hamaroani-toaky tokony hinominao

Laha manapa-kevitsy hino toaky iha, le ka halino toy: Tsy halani-Jehovah ty mino toaky, fe tsy teany laha mino maro marè ty olo raiky. Ino ty antony? Vakio Hosea 4:11, 18, bakeo iaraho midiniky fanontanea toy:

• Ino ty mety hiseho laha mino toaky maro marè ty olo raiky?

Ino ty hanampy antsika tsy hino toaky maro marè? Mila miambany tsika ka hieky hoe voafetra ty toaky zakantsika. Vakio Ohabolana 11:2, bakeo iaraho midiniky fanontanea toy:

• Manino ro soa laha faritantsika sandrany ty hamaroni-toaky hinomintsika?

6. Ino ty hanampy ty olo raiky tsy hino toaky maro marè?

 FAMINTINA

Fanomeza baka amy Jehovah ty toaky, ka tsy sakanany hino toaky tsika. Fe mivola ie fa tsy mety ty mino toaky maro marè na manao mamo.

Famerena

• Ino ty raha volanini-Baiboly mikasiky toaky?

• Ino ty voka-dratini-finoma toaky maro marè?

• Akory ty ampisehoantsika hoe manaja ty fanapahan-kevitsin’olo hafa tsika amy resaky finoma toaky?