FIANARA 44

Mahazo Hatò amy Ndranahary va Ze Kila Fety?

HANENTY

Teani-Jehovah ho azontsika tavy ty fiainantsika, le teany laha mba manao fety tsika kindraiky. Fe mahazo hatò aminy iaby va ze kila fety? Akory ty ampisehoantsika hoe tea ani-Jehovah tsika amy resaky fety zay?

1. Manino ro tsy teani-Jehovah ty ankamaroani-fety fataon’olo?

Mety ho tseriky iha lafa mahay hoe tsy mifanaraky amy ty raha volanini-Baiboly, na baka amy mpanompo sampy noho ty fivavaha diso ty ankamaroani-fety fataon’olo. Ao, ohatsy, ty misy ifandrambesany amy fanahy raty na ty fampianara diso hoe mana fanahy tsy mety maty ty olo. Ty sisany baka amy finoanoa fahatany na finoa hoe misy ty sansy. (Isaia 65:11) Mandrara ty mpanompony Jehovah hoe: “Ka mikasiky raha maloto sasy.”—2 Korintianina 6:17. a

2. Akory ty fahitani-Jehovah ty fety mandrengy olombelo?

Tsy teani-Jehovah ho voafitaky tsika, ka nandrara antsika ie mba tsy ‘hatòky olombelo marè.’ (Vakio Jeremia 17:5.) Mandrengy ty mpanday fanjakà na ty olo mahery fo ho ani-tanindraza ty fety sisany. Ao koa ty mankalaza fahaleovan-tena, le manome voninahitsy marè ani-sainam-pirenena iny. (1 Jaona 5:21) Ty fety sisany manoha fikambana ara-politiky na ara-sosialy. Ino ty tsapani-Jehovah laha mandrengy olombelo na fikambana tsika, sirtò azy manoha hevitsy mifanipaky amy fikasàny rey?

3. Manino koa ty fety sisany ro tsy mety amy ty Kristiana?

Helofani-Baiboly “ty fiboboha divay, noho ty fety feno habaleha, [voho] ty fanaova kirebaky amy finoma.” (1 Petera 4:3) Amy fety sisany, tsy mahatanjaky ty ainy noho maloto fandaisam-bata ty olo. Ka laha teantsika ty ho namani-Jehovah avao, le mila manalavitsy ani-raha rezay tsika.

DINIHO LALIKY

Hodinihintsika hoe ino ty tokony hataonao mba hampifalifaly ani- Jehovah ty fanapahan-kevitsinao amy resaky fety noho fankalazà.

4. Ka manao fety tsy manome voninahitsy ani-Jehovah

Vakio Efesianina 5:10, bakeo iaraho midiniky fanontanea retoa:

Laha hanapa-kevitsy hankalaza fety raiky tsika, ino ty raha mila haintsika?
Ino iaby ty fety fataon’olo mbaminareo etoy?
Akory ty hevitsinao, mahazo hatò amy Ndranahary va fety rezay?

Fa nieritseretinao va ohatsy hoe manao akory ty fahità-Ndranahary ty aniversera? Tsy mivola mihintsy ty Baiboly hoe nisy mpanomponi-Jehovah nanao aniversera. Misy olo roe nankalaza aniversera aloha resahy ao, fe olo reo samby tsy mpanomponi-Jehovah iaby. Vakio Genesisy 40:20-22 noho Matio 14:6-10. Bakeo iaraho midiniky fanontanea retoa:

Ino ty raha itovizani-aniversera roe reo?
Laha hentea tantara reo, akory ty fahitani-Jehovah ty aniversera araky ty hevitsinao?

Mety mbo hieritseritsy ho zao avao iha: ‘Tena halani-Jehovah vatany va ty mandramby anjara amy aniversera na amy fety hafa tsy mifanaraky amy Baiboly?’ Vakio Eksodosy 32:1-8. Alefaso VIDEO toy, le iaraho midiniky fanontanea reo.

VIDEO: Fety Tsy Tea-Ndranahary (5:07)

Manino ro mila ataontsika azo antoky hoe teani-Jehovah va ty fety raiky, sa tsy teany?
Akory ty anaovantsika ani-zay?

Akory ty ahaiza hoe tsy teani-Jehovah ty fankalazà na ty fety raiky?

Miory amy fampianara tsy mifanaraky amy Baiboly. Ilao hoe nanao akory ty nampisy azy tamy voalohany any.
Mandrengy noho manome voninahitsy olombelo, fikambana, na tanindraza. Jehovah avao ro ameantsika voninahitsy marè sady atokisantsika fa hamaha ty problemo iaby mahazo antsika olombelo an-tany etoa.
Mifanohitsy amy Baiboly ty fombafomba atao aminy. Tokony halio fandaisam-bata avao tsika.

5. Ino ty azonao atao mba hanaja ty raha inoanao ty olo?

Sarotsy kindraiky ty mandà lafa misy olo miforosè antsika hanao fety tsy teani-Jehovah. Fe miezaha ho soa fanahy noho hahaliny raha lafa manazava ty hevitsinao. Akory ty hanaova ani-zay? Alefaso VIDEO toy.

VIDEO: Miezaha ho Soa Fanahy Lafa Manazava ty Raha Inoanao (2:01)

Vakio Matio 7:12, bakeo iaraho midiniky fanontanea retoa:

Laha hentea andinin-teny io, hahasoa raha va ty ivolananao amy ty fianakavianao tsy mitovy finoa aminao hoe tsy tokony hankalaza na hanao fety rozy?
Ino ty azonao atao mba hahatsapani-fianakavianao hoe teanao avao rozy ndre tsy miaraky manao fety amin-drozy iha?

6. Teani-Jehovah ho falifaly tsika

Teani-Jehovah hiaraky mifalifaly amy ty nama noho ty fianakaviantsika tsika. Vakio Mpitoriteny 8:15, bakeo iaraho midiniky fanontanea retoa:

Manino andinin-teny io ro mampiseho hoe teani-Jehovah ho falifaly tsika?

Teani-Jehovah hiaraky hifalifaly ty vahoakiny. Ahitantsika ani-zay zao fivoriambe iraisam-pirenena rey. Alefaso VIDEO toy.

VIDEO: Mampiseho ty Fahaiza Mandramby Vahiny ty Fivoriambe Iraisam-pirenena (5:40)

Vakio Galatianina 6:10, bakeo iaraho midiniky fanontanea retoa:

Mila manao ani-fety fataon’olo rey va tsika vo afaky ‘manao raha soa’ amin’olo?
Aia ty tena mahafalifaly anao: Voatery tsy maintsy manome kadò olo saky misy fety va? Sa manome kadò olo amy ze fotoa ahafahanao manao ani-zay?
Maro ty Vavolombeloni-Jehovah manao raha miavaky ho ahi-ty anakiny, na manome kadò an-drozy amy fotoa tsy ampoizy. Laha manan’anaky iha, ino ty raha miavaky azonao atao fanomeza ho an-drozy?

MIERITSERITSY TY OLO SISANY HOE: “Tsy manino ndre baka aia ndre baka aia ty nanombohani-fety io, fa ty vatan-draha le hoe miaraky mifalifaly amy fianakavia.”

Ino ty hovolaninao?

FAMINTINA

Teani-Jehovah hiaraky mifalifaly amy ty fianakaviantsika noho ty namantsika tsika. Fe misy fety tsy tokony hataontsika satria tsy teany.

Famerena

Ino iaby ty fanontanea mila dinihintsika mba hahaiza laha teani-Jehovah ty fety raiky na tsy teany?
Ino ty azontsika atao mba hanaja ty hevitsintsika ty namantsika noho ty fianakaviantsika?
Ino ty mampiseho hoe teani-Jehovah ho falifaly tsika?

Daty nahavita ani-fianara toy:

Raha kendrè

Vetsevetseo ty raha nianaranao tatoa, le diniho hoe mety va sa tsy mety ty fety fataon’olo mbaminareo mbetoy.

Raha hafa:

Raha hafa kendrènao