FIANARA 55
Tohano ty Fiangona Misy Anao
Olo an-tapitrisany ro falifaly manompo ani-Jehovah amy fiangona an’arivony amy tany toy iaby. Mahafalifaly an-drozy ty mahazo tari-dala noho toromariky amy fiangona eo, le mazoto manoha noho manampy rozy. Mahatsapa ho zay koa va iha amy fiangonanareo eo?
1. Ino ty azonao atao mba hampiasà ty fotoanao noho ty herinao mba hanampea ty fiangona?
Samby afaky manampy amy fiangona eo iaby tsika. Misy olo be tao na manan-kandra va, ohatsy, ty amy fiangonanareo ao? Azonao ampea va ie mba ho afaky handeha am-pivoria any? Misy raha azonao atao ho azy va, ohatsy hoe manao ty bazariny na manao ty asany an-trano ao? (Vakio Jakoba 1:27.) Manampy ty fiangona koa tsika lafa mazoto manadio noho mikarakara Efitrano Fanjakà. Tsy misy manao forosè antsika hanao ani-raha rezay, fa ty fitiavantsika ani-Jehovah noho ty rahalahintsika ro manosiky antsika, le ‘manolo-tena an-tsitrapo’ hanampy tsika.—Salamo 110:3.
Mihamaro ty fomba azon’olo raiky anampea ty fiangona lafa vita batisa ie. Azo tendrè ho mpanampy amy fanompoa na anti-panahy, ohatsy, ty rahalahy mahafeno fepetra. Samby mahazo manao mpisava lala ndre rahalahy ndre ranabavy, ka tena afaky manampy amy fitoria ataoni-fiangona. Ty sisany koa afaky mandramby anjara amy fanorena Efitrano Fanjakà, na mifindra amy tanà hafa any mba hanampy fiangona.
2. Akory ty azontsika ampiasà ty drala na ty hananantsika mba hanampea ty fiangona?
Azontsika atao ty ‘manome voninahitsy ani-Jehovah amy ze raha lafovily ananantsika.’ (Ohabolana 3:9) Tena falifaly tsika fa afaky manome drala na raha hafa mba hanampea ty fiangona misy antsika noho hanohana ty asa fitoria amy tany toy iaby. (Vakio 2 Korintianina 9:7.) Ampiasà mba hanampea tra-boina koa drala fanomeza ataontsika rey. Maro ro fa ‘manoka drala’ sankerinandro na sambola mba hatao fanomeza. (Vakio 1 Korintianina 16:2.) Azontsika alatsaky amy boaty fanomeza amy Efitrano Fanjakà any ty drala ataontsika fanomeza na alefantsika amy alalani-Internet amy donate.pr418.com. Asehontsika hoe tea ani-Jehovah tsika lafa mahafoy drala na hanana mba hanampea ty fiangona.
DINIHO LALIKY
Hohenteantsika hoe ino ty raha sisany azonao atao mba hanampea ty fiangona.
3. Afaky mampiasa ty dralantsika noho ty hananantsika tsika
Falifaly Jehovah noho Jesosy lafa manome, le tean-drozy hanahaky ani-zay koa tsika. Niezaky nanao fanomeza, ohatsy, ampela mahantra maty valy iny. Nidera azy Jesosy lafa nahita ani-zay. Vakio Lioka 21:1-4, bakeo iaraho midiniky fanontanea retoa:
-
Mila manome drala be va tsika zay vo falifaly Jehovah?
-
Akory ty fahitani-Jehovah noho Jesosy ty fanomeza vokatsini-fo ataontsika?
Ampiasà amin’ino drala fanomeza ataontsika rey? Alefaso VIDEO toy, bakeo iaraho midiniky fanontanea io.
-
Ino iaby ty ampiasà ani-fanomeza ataontsika rey mba hahasoa ty fiangona amy tany toy iaby?
4. Afaky manolo-tena hanampy tsika
Nazoto nikarakara ty pilasy fivavaha amy Jehovah ty mpanompony tamy andro taloha. Fa nanome drala rozy, fe mbo nanome raha maro hafa koa. Vakio 2 Tantara 34:9-11, bakeo iaraho midiniky fanontanea toy:
-
Ino ty nataon’Israelita kiraidraiky mba hikarakarà ty tranoni-Jehovah, na ty pilasy fivavahan-drozy?
Manahaky ty modelin-drozy koa ty Vavolombeloni-Jehovah. Alefaso VIDEO toy, bakeo iaraho midiniky fanontanea io.
-
Manino ro mila atao malio noho karakarà soa avao ty Efitrano Fanjakà?
-
Ino ty azonao atao mba handrambesa anjara amy raha zay?
5. Afaky miezaky hahazo andraikitsy fanampiny ty rahalahy
Mampirisiky ty lahilahy kristiana ty Soratsy Masy mba hiezaky hahazo andraikitsy. Ho afaky hanampy soa ty fiangona rozy laha manao ani-zay. Ino, ohatsy, ty azon-drozy atao? Alefaso VIDEO toy, bakeo iaraho midiniky fanontanea io.
-
Ino ty ezaky nataoni-Ryan mba ho afaky hanampy marerè ty fiangona ie?
Volany mazava amy Baiboly ao ty fepetra takỳ amy mpanampy amy fanompoa noho anti-panahy. Vakio 1 Timoty 3:1-13, bakeo iaraho midiniky fanontanea retoa:
-
Ino ty fepetra takỳ amy rahalahy ta ho mpanampy amy fanompoa na anti-panahy?
-
Tokony hanao akory ty valy amin’anany laha mana ie?—Henteo ty andininy 4 noho 11.
-
Ino ty tombony ho azoni-fiangona laha miezaky mafy mba hahafeno ani-fepetra reo ty rahalahy?
METY HISY HANONTANY HOE: “Baka aia ty drala ampiasàni-Vavolombeloni-Jehovah?”
-
Akory ty havalinao?
FAMINTINA
Falifaly Jehovah lafa mahita antsika mampiasa ty fotoantsika, ty herintsika, noho ty dralantsika mba hanampea ty fiangona.
Famerena
-
Ino ty azontsika atao mba hampiasantsika ty fotoantsika noho ty herintsika mba hanampea ty fiangona?
-
Ino ty azontsika atao mba hampiasantsika ty dralantsika na ty hananantsika mba hanampea ty fiangona?
-
Ino iaby ty raha teanao hatao mba hanampea ty fiangona?
DINIHO KOA RETOA
Manino ro tsy itakia-Ndranahary ampahafolon-karena sasy ty mpanompony?
“Inona no Lazain’ny Baiboly Momba ny Ampahafolon-karena?” (Lahatsoratsy amy jw.org ao)
Misy andraikitsy sisany resahini-Baiboly hoe tokony rahalahy vita batisa avao ro manao azy. Fe manao akory laha tsy maintsy manao ani-raha rey ty ranabavy vita batisa?
“Manao Akory ty Fahefàni-Anti-panahy amy Fiangona Eo?” (Tilikambo Fiambena Fevriè 2021)
Ho hitanao ato ty ezaky mafy ataoni-Vavolombeloni-Jehovah sisany mba hanatera boky noho gazety ho ani-mpiara-manompo amin-drozy.
Mitovy amy fivavaha sisany rey va ty fomba ahazoani-Vavolombeloni-Jehovah ty drala ampiasàny?
“Avy Aiza ny Vola Ampiasain’ny Vavolombelon’i Jehovah?” (Lahatsoratsy amy jw.org ao)
Mety ho Teanao Koa
FANONTANEA FAPETRAKIN’OLO
Ino ro Atao hoe Fianara Baiboly?
Anovo hay ty valy fanontanea mikasiky fandahara fampianara Baiboly tsy andoava drala ataonay.
