Manoma soa iha aloha ty hianaranao Baiboly miaraky amy Vavolombelo Jehovah. Laha manoma manahaky zay koa iha aloha ty handehana mivory, le ho hainao soa ty raha ianara any. Soa laha zatsy manao raha zay iha.

Henteo hoe ombia noho aia iha ro afaky mianatsy. Fotoa manao akory iha ro afaky mianatsy soa? Maraindray be va, sa aloha ty handehananao miasa, sa amy haly fa tsy misy ajà mitabataba iny? Ndre tsy mana fotoa maro aza iha, le henteo hoe saky ino iha ro afaky mianatsy. Ka engà hisy hanampaky ty fianara ataonao. Milà pilasy mangiky, vonò ty radio, ty telè noho ty telefony. Mivavaha aloha ty hianara, soa iha tsy hiasa loha amy raha hafa. Laha orihinao raha reo, le ho vita soa ty fianara ataonao.—Filipianina 4:6, 7.

Manomana, soa hanome valin-teny. Anovo tseky ze ahaiza hoe miresaky mikasiky ino fianara io. Diniho soa ty titira amy boky ianaranao. Diniho koa hoe ino ro ifandrambesa anaka titira reny amy ty hevitsy bevata ao. Henteo koa ty sary noho ty fanontanea famerena ahità ty hevitsy bevata amy lahatsoratsy io. Vakio kiraidraiky ty fehitsoratsy noho ty fanontanea mifanaraky aminy, bakeo ilao ty valiny. Vakio ty andinin-teny voasoratsy ao, le diniho ty hevitsy mampifandramby raha reo. (Asan’ny Apostoly 17:11) Lafa hitanao ty valy fanontanea anaty fehitsoratsy ao, le ze safà mavesatsy ao avao ro tsipiho soa ho tiaronao ty valiny. Laha teanao le afaky mananga tana iha lafa avy amy fivoria any noho afaky manome valin-teny amy ty fivolananao.

Lafa omaninao iaby ty raha ianara amy fivoria any, le hampilitsy hevitsy vaovao amy ‘trano fanajaria’ ty raha hainao baka amy Baiboly ao iha.—Matio 13:51, 52.

• Ino iaby ty raha azonao atao laha ta hanoma fivoria iha?

• Ino ty fiomana mila ataonao lafa ta hanome valin-teny amy fivoria any?