Mba hahavitanay manambara ty ‘vaovao soa’ amy ‘firenena noho foko noho ty olo iaby samby hafa fivolana voho ty kila olo iaby’ le mampiboaky boky noho gazety amy fivolana 750 eo ho eo zahay. (Apokalypsy 14:6) Manao akory ro hanaovanay asa zay? Manampy anay ty komitini-fanorata noho ty ekipa mpandika teny Vavolombelo Jehovah amy tany toy.

Fivolana angilisy ro anomana ty lahatsoratsy hadika. Filan-kevi-pitantana ro miandraikitsy ty asa atao ty Sampan’asa ty Fanorata amy foibe any. Sampan’asa io ro manome ty asa atao ty mpanoratsy miasa amy foibe ao noho amy birao ty sampana hafa any. Mahavy anay hahavita manoratsy hevitsy ilà ty olo samby karazany raha zay. Manjary teanolo amy firenena iaby any koa ty boky noho gazetinay.

Alefa amy mpandika teny any ty lahatsoratsy. Lafa vita oma soa lahatsoratsy iny, le alefa amy mpandika teny amy tany toy iaby. Ty ekipa mpandika teny ro mandika noho manenty soa laha mitovy amy lahatsoratsy angilisy sady mazava soa amy ty fivolanan-drozy ty raha adika. Fily mpandika teny reo ty ‘safà marina tsy misy diso’ soa ho voadika soa amy ty fivolanan-drozy iaby ty hevitsy baka amy lahatsoratsy angilisy.—Mpitoriteny 12:10.

Mampalaky asa ty fampiasà ordinatera. Tsy mahasolo ty olo manoratsy noho mpandika teny ty ordinatera. Fe mampiasa diksionera noho fitaova hafa fanaova fikaroha amy ordinatera ao ty mpandika teny soa hampalaky ty asan-drozy. Mampiasa fandahara elektroniky mandamy ty sary noho ty soratsy amy fivolana maro na MEPS koa ty Vavolombelo Jehovah. Azo atao pirinty na aboaky amy taratasy ty raha baka amy MEPS ao.

Manino zahay ro manao ezaky bevata manahaky zay, ndre tsy maro mampiasa loatsy aza ty fivolana sisany? Satria tea Ndranahary ‘ty hamonjea ty karazanolo iaby noho ty hahaizany soa ty raha marina’ amy Baiboly—1 Timoty 2:3, 4.

• Ino iaby ty asa mila atao zay vo vita dika ty boky noho gazetinay?

• Manino zahay ro mandika boky noho gazetinay reo amy fivolana maro?