Manao asa samby hafa ty fianakaviany Betela. Natao raha zay soa hahavy ty asa fitoria ho vita soa amy tany raiky na maromaro. Misy ty mandika teny, ao koa ty miasa amy fanamboara boky noho gazety, miasa amy trano fametraha boky, fanaova video, fangalà feo, na mikarakara raha hafa.

Ty Komity ty Sampana ro mikarakara ty asa amy taniny ao. Misy Komity ty Sampana apetra ty Filan-kevi-pitantana hikarakara ty asa samby hafa misy amy Betela ao. Anti-panahy telo na mihoatsy ro voafily hanao raha zay. Atao Komity io ze hahaiza ty Filan-kevi-pitantana ty fivoara ty asa amy tany iasan-drozy eo, noho ty raha manahira misy ao. Raha zay ro hanampy ty Filan-kevi-pitantana hahita hevitsy mila aboaky amy boky noho gazety, fivoria noho fivoriambe hatao amy manaraky. Misy solontena alefa ty Filan-kevi-pitantana. Misafo ty sampana kiraidraiky noho manome torohevitsy ty Komity ty Sampana, mpiandraikitsy io. Hanampy Komity reo hahavita soa ty asan-drozy raha zay. (Ohabolana 11:14) Misy fandahara maro atao lafa mandalo solotena ty foibe io. Tafilitsy anaty raha zay ty lahateny ataony, mba hampahereza ty olo amy tany andehanany.

Mikarakara fiangona. Rahalahy amy birao ty sampana ro maneky ty fiforona fiangona vaovao. Mbo rozy avao koa ro mikarakara ty asa atao ty mpisava lala, misionera noho mpiandraikitsy faritsy amy sampana misy an-drozy. Mandamy fivoriambe, fanamboara Efitrano Fanjakà vaovao koa rozy. Manenty koa rozy hoe niavy soa amy fiangona any va ty boky noho gazety ilan-drozy. Ze kila asa atao amy sampana ao, le natao hampandehana soa ty asa fitoria.—1 Korintianina 14:33, 40.

• Manao akory ro anampea ty Komity ty Sampana ty Filan-kevi-pitantana?

• Ino iaby ty asa karakara ty birao ty sampana?