Lafa nivory ty Kristiana voalohany, le nihira, nivavaky, namaky noho niaraky nianatsy Baiboly. Fe tsy nisy fombafomba ty tao ndre raiky. (1 Korintianina 14:26) Raha reo avao koa ro ho hitanao amy fivorianay any.

Fianara mifototsy amy Baiboly noho azo orihy. Mivory ty fiangona kiraidraiky lafa fara ty herinandro. Misy lahateny mifototsy amy Baiboly miresaky mikasiky ty fiainantsika noho ty fotoa misy antsika ty ao. Ampirisihy zahay iaby hanaraky soa amy Baibolinay ao. Lafa vita lahateny io le misy Fianara “Ny Tilikambo Fiambenana” atao anaty ty lera raiky. Misy foto-kevitsy raiky dinihy amy gazety fianara Ny Tilikambo Fiambenana ao. Afaky manome valin-teny iaby ze olo avy ao. Manampy anay hanoriky ty raha volany amy Baiboly ao fianara zay. Fiangona 110 000 mahery amy tany toy ro mianatsy amy gazety io.

Ampianary hahay mampianatsy zahay. Misy andro hafa koa anaovanay fivoria amy hariva. Kaihy hoe Fiaina Noho Fanompoa Kristiana fivoria misy fizaràny telo ataonay io. Misy fitaova raiky atao hoe Fiaina Noho Fanompoa: Kahiem-pivoria miboaky sambola, le ao ro iorena ty raha atao amy fivoria io any. Hanana Lafovily Baka amy Baiboly ro fizarà voalohany amy fivoria io. Natao hanampea antsika hahay soa ty fomba hampihara ty toko amy Baiboly ao natao ho vakỳ amy herinandro iny fizarà io. Fianara Manompo ty fizarà manaraky. Misy fampisehoa ahità ty fomba azo anazavà ty raha amy Baiboly ao amin’olo hafa ao sady misy toro-hevitsy anasoava ty vakiteny noho ty fahaiza miresaky. (1 Timoty 4:13) Ty Fiainantsika Kristiana ro fizarà farany. Dinihy ao ty fomba fampihara ty torolalani-Baiboly amy ty fiainantsika andavanandro. Misy fiaraha midiniky mampitombo ty fahaizantsika Baiboly koa ao.

Lafa mamonjy fivoria miaraky aminay iha, le ho tseriky mahitaky ty hasoa ty raha ianara ao.—Isaia 54:13.

• Ino ty raha ho renao amy fivoria Vavolombelo Jehovah reo any?

• Ia amy fivorianay reo ro teanao hovonjea?