Fa liany fa ela ro fa nitea Jehovah hanoka fotoa hanaova raha miaraky ty olo trano raiky. Laha manao raha zay rozy, le hitombo ty fitiavan-drozy Jehovah noho hifankantea soa koa rozy. (Deoteronomia 6:6, 7) Zay ro mahavy ty Vavolombelo Jehovah hanoka fotoa raiky anaty ty herinandro hanaova fotoa fivavaha ty fianakavia. Falifaly rozy lafa manao raha io, satria miresaky foto-kevitsy raiky baka amy Baiboly ao mifanaraky amy ty raha ilan-drozy trano raiky. Afaky mianatsy manahaky zay avao koa iha ndre mipetraky raiky. Hifandramby soa amy Ndranahary iha laha manao raha zay.

Fotoa hamonjea Jehovah. ‘Mamonjea Ndranahary, le hamonjy anareo ie.’ ( Jakoba 4:8) Hahay soa Jehovah tsika lafa mianatsy ty raha kiraidraiky mikasiky azy noho ty raha ataony volany amy Baiboly ao. Laha vo hanomboky hanao fotoa fivavaha ty fianakavia nareo, le soa laha miaraky mamaky Baiboly tse, satria zay ro mora atao. Azo atao ohatsy ty manaraky fandahara amy Fivoria Fiaina Noho Fanompoa ao. Zarazara ty famakia azy soa samby mamaky iaby ty kiraidraiky, bakeo samby afaky mivola ty raha nianarany baka amy Baiboly ao.

Fotoa mahavy ty olo trano raiky hifankatea. Hifankatea soa ty mpivaly, manahaky zay koa ty baba noho reny voho ty anaky, laha miaraky mianatsy Baiboly. Mahafalifaly fotoa io, ka le tsy linin-drozy trano raiky ty hanaova azy ndraiky amy herinandro manaraky. Mianky amy ty tao ty anany ro ifiliana ty rae noho ty reny foto-kevitsy ianara. Azo atao ohatsy ty mila raha zay amy Ny Tilikambo Fiambenana na Mifohaza! na amy www.pr418.com/jw-vz. Azonareo resahy ty mikasiky ty raha manahira mahazo ty ananareo an-dakilasy any noho ty raha mila atao lafa misy raha zay. Azo atao koa ty miaraky manenty fandahara amy tele JW (tv.pr418.com), bakeo miaraky midiniky ty raha tao. Lafa vita ty fotoa fivavaha ty fianakavia, le azonareo atao koa ty mihira ze hira hanovy amy fivoria any noho mifalifaly.

Fotoa mahafalifaly ty fotoa fivavaha ty fianakavia. Hanampy ty olo trano raiky ho tea mianatsy Baiboly raha io noho hahazoan-drozy fitahia maro baka amy Jehovah.—Salamo 1:1-3.

• Manino tsika ro manoka fotoa hanaova fotoa fivavaha ty fianakavia?

• Ino iaby ty raha atao ty rae noho ty reny, laha teany ho falifaly iaby rozy trano raiky lafa manao fotoa fivavaha ty fianakavia?