Firy amy Vavolombelo Jehovah reo ro hainao? Misy aminay mety ho mipetraky mariny anao eny na miaraky miasa aminao na miharo fianara aminao. Ty sisany aminay mety fa niresaky taminao mikasiky ty raha amy Baiboly ao. Ia marina zahay io? Manino zahay ro mivola aminolo mikasiky ty finoanay?

Mitovy aminolo iaby zahay. Baka amy foko samby hafa zahay, samby hafa koa ty fahaizanay noho ty fivelomanay. Samby nana ty fivavaha nisy anay koa zahay taloha. Ty sisany aza tsy nino Ndranahary. Fe nianatsy soa ty raha baka amy Baiboly ao zahay, taloha ty naha Vavolombelo Jehovah anay. (Asan’ny Apostoly 17:11) Naneky zahay hoe marina ty raha nianaranay, le zay ro nahavy anay hifily ty hanompo Jehovah.

Misy raha soa azonay baka amy fianara Baiboly. Mitovy aminolo iaby avao zahay. Misy koa ty raha manahira noho mampijaly anay. Fe lafa orihinay soa avao ty raha volany amy Baiboly ao, le hitanay fa mihasoa ty fiainanay. (Salamo 128:1, 2) Zay ro mahavy anay mizara aminolo hafa koa ze raha nianaranay baka amy Baiboly ao.

Manoriky torolala baka amy Ndranahary zahay. Mahavy olo ho soa fanahy, manaja olo, manao raha marina ty torolala baka amy Baiboly ao. Mahavy ty olo ho salama noho hanjary ho olo soa raha io. Mampirisiky ty olo trano raiky hifankatea noho samby hahay manday soa ty vatany koa raha io. Ekenay fa ‘tsy mitingy volon’olo Ndranahary.’ Zay ro mahavy anay ho raiky avao tsy misy mainty noho foty zao, ndre olo maro baka amy firenena samby karazany aza zahay. Tsy sarahy ty politiky koa zahay. Mitovy aminolo iaby zahay, ka anovinay ze hahavy anay ho olo raiky.—Asan’ny Apostoly 4:13; 10:34, 35.

• Ino ty mampitovy ty Vavolombelo Jehovah aminolo hafa?

• Ino iaby ty torolala nianara ty Vavolombelo Jehovah baka amy Baiboly ao?