Nisy mpianatsy Jesosy efatsy niresahany taloha ty nahafaty azy, tsy ia zay fa Petera, Jakoba, Jaona noho Andrea. Nivolany Jesosy an-drozy ty famantara ty andro farany. Bakeo nametraky fanontanea Jesosy: ‘Ia marina mpanompo azo atokisa noho mahihitsy, azy hofily ty tompony hikarakara ty mpanompo an-tranony ao noho hanome hany an-drozy amy fotoa ilà raha zay?’(Matio 24:3, 45; Marka 13:3, 4) Nivola Jesosy azy ‘tompo’ mpianatsy reo iny, fa hifily olo hikarakara noho hanome hany ara-panahy tsy tampaky ho ahy ty mpanoridia azy miay anaty ty fotoa ty farany ie. Ia ro mahavoaforo mpanompo io?

Rahalahy vitsivitsy voahosotsy ty fanahy mpanompo io. Ty filan-kevi-pitantana ty Vavolombelo Jehovah raha io. Manome hany ara-panahy ho ahy ty mpanompo Jehovah ie. Mianky amy mpanompo azo atokisa noho mahihitsy io ro ahazoantsika ‘hany ara-panahy ampy amy fotoa ilà raha zay.’—Lioka 12:42.

Mikarakara ty vahoaky Ndranahary ty mpanompo azo atokisa. (1Timoty 3:15) Namea Jesosy andraikitsy bevata mpanompo io hikarakara ty asa atao ty fandamina Jehovah an-tany etoy. Mikarakara ty hanana ty fandamina ie, mitariky ty asa fitoria noho mampiasa ty fiangona hampianara antsika. Manome antsika hany ara-panahy amy fotoa ilantsika azy ‘mpanompo azo atokisa noho mahihitsy’ io. Azontsika baka amy boky noho gazety ampiasantsika amy fanompoa noho ty fandahara maro hita amy fivoria na amy fivoriambe any raha rezay.

Azo atokisa tsy hivaliky amy ty raha marina amy Baiboly ao mpanompo io, sady hitory ty vaovao soa. Mahihitsy koa ie satria mikarakara soa ty hanana Kristy an-tany etoy. (Asan’ny Apostoly 10:42) Tahỳ Jehovah ty asa ataony ka manome hany ara-panahy farany ze maro. Mitombo maro koa ty vahoaky Jehovah.—Isaia 60:22; 65:13.

• Ia ro nofily Jesosy hanome hany ara-panahy mpianatsiny reo?

• Manino mpanompo reo ro azo atokisa noho mahihitsy?