Fa nampiavaky ty Vavolombelo Jehovah nainay ty fampiofana sankarazany mifototsy amy Baiboly. Manoka fotoa maro biby mba hitoria ty vaovao soa, ohatsy, ty Vavolombelo sisany, ka mahazo fampiofana manoka mba ‘hahavita soa ty fanompoany.’ (2 Timoty 4:5)

Sekoly ty Fanompoa Mpisava Lala. Afaky manao sekoly io ze mpisava lala maharitsy, nahavita tao raiky tamy fanompoa amy fotoa iaby. Atao anaty ty eninandro sekoly io. Mety ho amy Efitrano Fanjakà marìny eny ty anaova azy. Ino ty antony nanaova sekoly io? Mba hahavy ty mpisava lala hifandramby marè amy Jehovah, noho hahay soa ze karaza fanompoa iaby, sady tsy hiala amy ty asa ty mpisava lala.

Sekoly ty Mpitory Fanjakà Iny. Roe vola ty anaova sekoly io. Natao ho ahy ty mpisava lala fa nahita raha maro raha io. Afaky manao sekoly io ty mpivaly noho ty rahalahy noho anabavy tsy manambaly. Parè hanenga ty tanà misy azy rozy, mba hanompo amy ze pilasy handefasa an-drozy. Manahaky Jesosy, azy Mpitory farany bevata iny rozy, ka sahala mivola hoe: ‘Ntoy aho iraho.’ (Isaia 6:8; Jaona 7:29) Mety mila mizatsy fiaina tsotsotra rozy lafa mifindra. Mety tsy hitovy amy ty nahazatsy an-drozy koa ty hany, fomban-tany na ty hafanà noho nintsy amy ze andefasa an-drozy any. Mety hianatsy fivolàna vaovao koa aza rozy. Ino ty antony nanaova sekoly io? Voalohany, mba hanampy rahalahy noho anabavy reo hana toetsy soa marè ka hahavita soa ty fanompoany. Faharoe, mba hananan-drozy fahaiza, amy zay ho azo Jehovah noho ty fandaminany ampiasà soa.

Sekoly Mifototsy amy Baiboly ahy Gileada. “Vato navory natao vavolombelo” ty dika ty hoe “Gileada” amy safà hebreo. Nanomboky tamy 1943, le fa nisy misionera 8 000 mahery nahazo diploma baka Gileada ao bakeo nalefa hanao asa misionera rozy. Nanjary “vavolombelo zisiky amy farany tany” rozy. (Asan’ny Apostoly 13:47) Nahitam-bokatsy raha zay. Mbo tsy nisy fiangona, ohatsy, ta Peroa any tamy fotoa nandefasa misionera voalohany tao. Fe fa misy fiangona 1 000 mahery ty any henanizao. Manahaky zay koa ta Japon tao. Tsy ampy folo ty Vavolombelo tao tamy vo niavy tao voalohany ty misionera. Fe 200 000 mahery rozy henanizao. Ka ia iaby ty afaky manao sekoly io? Ty mpisava lala manoka, ty misionera, azy manompo amy birò sampana any reo, noho ty mpiandraikitsy faritsy. Mianatsy marè anaty dimy vola rozy, mba hampandeha soa ty asa amy tany toy iaby noho hanatanjaha ty finoa ty hafa.

• Ino ty antony nanaova ty Sekoly Fanompoa ty Mpisava Lala?

• Natao ho ahinia ty Sekoly ty Mpitory Fanjakà Iny?