Manao akory ty fahitanao ty fisikina Vavolombelo Jehovah amy sary amy bokikely toy? Milamy noho malio soa ty sikin-drozy lafa mamonjy fivoria. Manino ro ataonay milamy soa ty siky noho ty volonay?

Soa hanajà Ndranahary. Mivola ty Baiboly fa tsy mandiniky marè ty raha amy ty vatantsika eny Ndranahary. (1 Samoela 16:7) Fe ndre zay, lafa mamonjy fivoria zahay, le ta hanaja Ndranahary noho ty Kristiana namanay. Laha tsarà amy tiribinaly any ohatsy tsika, le manao siky soa satria ta hanaja mpitsara iny. Mitovy amy zay koa fa ‘Mpitsara tany toy iaby’ Jehovah. Manaja azy noho ty trano anompoa azy tsika laha misiky soa lafa mamonjy fivoria.—Genesisy 18:25.

Soa ahaiza fa mpanompo Ndranahary zahay. Mampirisiky ty Kristiana ty Baiboly mba hanao siky ‘milamy soa noho tsy mahamenatsy.’ (1 Timoty 2:9, 10) ‘Milamy soa’ ty siky lafa tsy maifitsy marè, tsy mihanto marè noho tsy mampiboaky tratra. ‘Tsy mahamenatsy’ koa ty siky lafa tsy itserehanolo. Manampy ty olo hahay mifily soa ty siky sikininy torolala reo. Laha milamy noho malio soa ty sikintsika noho ty volontsika le ‘hampamirapiratsy ty fampianara Ndranahary Mpanavotsy antsika’ noho ‘manome voninahitsy’ azy. (Titosy 2:10; 1 Petera 2:12) Laha misiky soa tsika lafa mivory, le ho hitanolo hoe manao akory manompo Ndranahary zao.

Mety hieretseritsy iha hoe tsy soa iaby ty sikinao, fe ka engà hisaka anao tsy hivory raha zay. Tsy ty siky sarotsy ro ilà, fa lafa malio noho milamy soa avao, le fa zay ro ie.

• Manino tsika ro mila misiky soa lafa manompo Ndranahary?

• Ino ty torolala amy Baiboly orihinay mikasiky ty siky noho ty volo?