1. Mba tantarao ty mikasike finoan-draza’y Afrikany reo.

AZO ampitovỳ ami’y vohitse ty finoan-draza’ty Afrikany. Ami’ty fara’e anabo any ty misy an’Andranahare, mana hery ara-panahy fara’e ty mahery. Bakeo, misy andranahare mbo ambanembani’e, na fanahy manarakarake aze eo sady manompo Aze. Ambani’y zay kea ty raza, mbo mahatiaro ty fianakavia’e an-tane etoy, sady mikarakara ze hahasoa an-drozy. Ami’y fara’e ambane ane, ty hery ara-panahy mbo ambanen-drozy iaby reo: ty fisà aòly, ty fanaòva sikily, voho ty mazỳ.

2. Misy heri’e ami’y fivavàha va ty finoan-draza arake ty fivolàna afrikany?

² Nanan-kery bevata tami’y fivavàha hafa an’Afriky atoy finoan-draza reo. Hoy ty fivolàna afrikany raike: “Tsy misàka antsika tsy hanompo ty andranahare’ty razantsika ty fanorìha ty Finoa (Kristiana ndra Silamo).”

3. Aia ro ahaìzantsika ty marina mikasike aze mipetrake ami’y tsy hita maso any reo?

³ Marina va finoan-draza afrikany reo? Mivòla amintsika ty marina mikasike aze mipetrake ami’y tsy hita maso any reo ty Baiboly.

4. Ino ty eke’y fivavàha bevata an’Afriky atoy?

⁴ Samby maneke fivavàha telo bevata an’Afriky atoy reo, fa misy Andranahare, sady ie ro fara’e anabo bibike. Volàni’ty Baiboly ie io, fa “Andranahare Fara’e Anabo Bibike noho Tompo’ty tompo, Andranahare bevata, mahery ndreke mahatahotse.” (Deoteronomia 10:17) Mino kea ty Silamo, fa misy Andranahare fara’e anabo bibike. Hoy Profeséra Geoffrey Parrinder, mikasike ty fivavàhan-draza afrikany: “Inoa’ty ankamaroa’ty Afrikany, fa misy Andranahare fara’e anabo bibike, rae’ty andranahare noho ty olombelo, sady mpamoro ty raha iaby.”

5. Ino ty anara sasa’e azo ikaìha an’Andranahare?

⁵ Ndre maro aza ty olo mino an’Andranahare, le azo isahy avao ty mahay aze soa. Voaloha’e, le toko’e ho hay tseky ty anara’ty olo raike laha tean-tena ty hahay aze soa. Samby mana ty anara ikaìha’e an’Andranahare ty fivavàha. Ty Kristiana mikaike aze hoe Andranahare, ty dika’y zay “Ie ro Mahere.” Allah ro ikaìha’ty Silamo aze. Ami’y fivavàhan-draza reo ao, le miovaova arakarake ty fivolàna ty fomba ikaìha aze Fara’e Anabo Bibike iny. Ami’y boki’e hoe Hevitse Mikasike An’Andranahare An’Afriky Atoy (angilé) John Mbiti, le manòno fomba 500, ikaìha’ty Afrikany an’Andranahare. Retoa misy ohatse: ami’y fivolàna yoruba (Nizeria), Andranahare kaìhy hoe Olodumare; ami’y fivòlana  kikuyu (Kenya), Ngai ro ikaìha aze; voho ami’y fivolàna zolò (Afriky Antìmo), kaìhy hoe Unkulunkulu ie.

6, 7. Ia ty anara-Ndranahare, sady manao akory ty ahaìzantsika raha zay?

⁶ Ino ty volàni-Ndranahare mikasike ty anara’e? Laha fa nampitarihi-Ndranahare an’Israelita reo hiboake baka Ejipta tao Mosesy, le nanontany aze hoe: “Ndao atao hoe, avy ami’y anak’Isiraely reo any aho, le mivòla ami’e hoe: Andranahare’ty raza’areo ro fa nanirake’ahy ho ami’areo atoy, le hanontany ahy rozy hoe: Ia moa ty anara’e? Le ino ty havaliko aze?”—Eksodosy 3:13.

⁷ Namale aze Andranahare hoe: “Zao ro hovolàni’ao ami’y Anak’Isiraely: Jehovah, Andranahare’ty raza’areo ... ro fa nanirake ahy ho ami’areo atoy. Io ty anarako mandrakizay sady zay ro hahatiaròva’ty taranake mifandimby Ahy.” (Eksodosy 3:15) Hita im-7 000 mahery anara-Ndranahare io anaty Baiboly ao, ndre nisy aza mpandika Baiboly hafa nanòva anara io tami’y hoe “Andranahare”, na “Tompo.”

8. Manao akore ty toe-bata’i Jehovah, ndreke ino ty toko’e hataontsika, laha ta ho tea’e tsika?

⁸ Manao akore ty toe-bata’i Jehovah zao? Fanahy ie, mahery bibike, sady be voninahitse. Andranahare fara’e anabo ie, tsy hay ampitovỳ ami’ty hafa, tsy misy mindry ami’e. (Deoteronomia 6:4; Isaia 44:6) Nivòla tami’i Mosesy Jehovah hoe: “Zaho, Jehovah Andranahare’ao, le Andranahare mamarahe.” Laha ta ho tea’e tsika, le toko’e ho ie raike avao ro hivavàhantsika. Tsy tea’e hanompo raha ndra olo hafa tsika.—Eksodosy 20:3-5.

9. Ino ty ahafahantsika mivòla, fa tsy mitovy ami’i Jehovah Jesosy?

⁹ Henany zao, le misafotofoto biby ty raha inoa’ty olo mikasike Jesosy. Mivòla ty Kristianisma Anara, fa tafilitse anati’y Andranahare Rae Anake Fanahy Masy ao ie. Fe ty Baiboly tsy mampianatse fa, Andranahare le olo telo fe raike. Ndreke tsy mampianatse kea ie io hoe, mitovy ami’i Jehovah Jesosy. Jesosy mihitsy ro nivòla hoe: “Ty Rae le mbo anabo mandilatse ahy.”—Jaona 14:28.

10. Taìa va Jesosy taloha’ty niavia’e tan-tany etoy?

¹⁰ Volàni’ty Baiboly, fa taloha’ty niavia’i Jesosy tan-tany etoy, le fa zavaboary mahery nipetrake tan-danitse any ie. Namòro an’i Adama ndreke Eva tan-tany etoy Jehovah, sady namòro zavaboary fanahy tan-danitse any. Jesosy ro zavaboary fanahy noforòni’e voaloha’e.—Jaona 17:5; Kolosianina 1:15.

11. Nanao akore ty nahavy an’i Jesosy ho olombelo?

¹¹ Fa ho 2 000 tao lasa zay, ty namalòza-Ndranahare tan-tròki’i Maria, ampela virijiny, ty ai’y zavaboary fanahy io. Hoy anjele Grabriely tami’i Maria: “Ho bevòka iha, ka hiterake anake lahy, voho hatao’ao hoe Jesosy ty anara’e. Ho mpanjaka ... ie, ndreke tsy ho tampitse mihitsy ty fanjakà’e.”—Lioka 1:31, 33. *

12. Ino ty anto’e raike niavia’i Jesosy tan-tany etoy?

¹² Ka le naterake Jesosy, nihabé, voho nampianatse ty olo mikasike an’i Jehovah noho ty fikasà’e. Hoy ty asa’e tami’y governera romany raike: “Zao ro nahaterahako, sady zao ro niavìako ho ami’zao tontolo zao, le ty hanambara ty marina.” (Jaona 18:37) Laha mandinike ty raha nampianari’i Jesosy tsika, le hahay ty fahamarìna mikasike ty sitrapò ndreke ty fikasà’Andranahare. Ho haintsika ty raha toko’e hatao mba hitiava-Ndranahare antsika.

13. Ino ty anto’e faharoe niavia’i Jesosy tan-tany etoy?

 ¹³ Ty anto’e faharoa niavia’i Jesosy tan-tany etoy, le ty hanome ty ai’e ho soro ho ahi’ty olombelo. (Matio 20:28) Nanao soro io ie mba hanafàha antsika ami’ty fahotà nolovantsika tami’i Adama razambentsika. Ie io kea ro hahafahantsika hiay mandrakizay. Hoy Apostoly Jaona: “Bevata vata’e ty fitiava-Ndranahare zao tontolo zao, ka namea’e ty Ana’e lahitoka, soa tsy ho ripake ze olo iaby maneho finoa aze, fa hana fiaìna mandrakizay.”—Jaona 3:16.

14. a) Ino ty raha nahazo an’i Jesosy laha fa nimaty ie? b) Ino ie henàny zao an-danitse ane?

¹⁴ Maty tami’naha olombelo aze Jesosy, voho novelòmy ho an-danitse ane, ka nimpoly ho zavaboary fanahy mahery ndraiky. (Asan’ny Apostoly 2:32, 33) Tafara tatoy, le namea’i Jehovah “fanapàha noho voninahitse voho fanjakà Ie, mba hanompoa’ty fokom-pirenena noho ty firenena ndreke ty olo samby hafa safà iaby Aze.” (Daniela 7:13, 14) Nanjary Mpanjaka mahery vata’e Jesosy ka Mpanjaka’ty fanjakà’i Jehovah an-danitse ane. Tsy ho ela ie le hampiseho ty heri’e an-tany etoy.

15. Ombia noho taìa ty anjele ro noforòny?

¹⁵ Tsy Jehovah noho Jesosy avao ro mipetrake ami’y tsy hita maso any. Namòro zavaboary fanahy hafa, kaìhy hoe anjele, Jehovah. Gabriely, aze niresake tami’i Maria iny ty raike amin-drozy. Tsy olombelo baka an-tany etoy ty anjele, fa noforoni-Ndranahare tan-danitse ane, fa ela biby taloha’ty namoròna’e ty olombelo. (Joba 38:4-7) Misy an-tapitrisa ty anjele.—Daniela 7:10.

16. Nanino ty olo ro tsy toko’e hivavake ami’ty anjele?

¹⁶ Tsy maniry ty hanompoantsika an-droze ty anjele tsy mivalike. In-droe ty anjele ro nananatse maré ty apostoly Jaona, laha fa ho nivavake tami’e ie, ka nanao hoe: “Raràko iha! Ka manao ho io! ... Andranahare avao ro ivavàho.”—Apokalypsy 19:10; 22:8, 9.

17. Ino ro ahità, fa afake miaro ty mpanompo-Ndranahare ty anjele? Nanino ty fahaìza raha zay ro manatanjake antsika?

¹⁷ Nisy anjele nanavotse ty apostoli’i Jesosy laha fa tam-pigadrà tany rozy. Fe, fa tsy misy anjele miseho ami’ty olo’i Jehovah sasy henàny zao. (Asan’ny Apostoly 5:18, 19) Azontsika antoke kea, fa hiaro antsika anjele-Ndranahare tsy hita maso noho mahery reny, laha mivavake ami-Ndranahare araky ty Safà’e tsika. Hoy ty Baiboly: “Ty anjele’i Jehovah mipetrake manodìdy ze mavàka Aze ka manavotse aze.” (Salamo 34:7; 91:11) Nanino ty fahaìza raha zay ro manatanjake antsika? Foto’e, misy fahavalo tsy hita maso le vata’e raty, ta hanimba antsika!

18. a) Nanino ty anjele raike ro nanohitse an’Andranahare? b) Ia iaby ty anara namea anjele nanohitse io?

¹⁸ Tsy ty anjele-Ndranahare iaby ro tsy nivalike  tami’e, fa nisy kea ty nanohitse aze. Nanao ty vatan-drozy ho fahavalo-Ndranahare noho ty olo’e an-tany etoy rozy. Ino ty nahavy raha zay? Marina noho soa iaby ty anjele noforoni’i Jehovah. Fe, naniry hivavàha’ty olo kea ty raike tami’y anake ara-panahy lavorare reny, ka natao’e ty hahatanterake ty faniria’e. Namea anara hoe Satana, midika hoe “Mpanohitse [an’Andranahare]” zavaboary fanahy io. Kaìhy hoe Devoly kea ie, midika hoe “Mpanoso-potake”, foto’e nivòla vande fara’e ze raty mikasike an’Andranahare ie.

19. Ino ty anto’e nampijalea’i Satana an’i Joba? Manao akore ty fomba nanaòva’e raha zay?

¹⁹ Anovi’i Satana forosé hiarake hanohitse ami’e ty olo. Ahità zay ty raha natao’e tami’i Joba mpanompo-Ndranahare tsy nivalike. Nipanarivo biby Joba. Nana aondry 7 000, rameva 3 000, aombe 1 000 noho borikivavy 500 ie. Nanan’anake folo noho mpiasa maro biby kea ie. Novonò’i Satana tseky ty biby noho ty mpiasa’i Joba. Bakeo notorotorò’e tami’y “tsioke mahere” ty trano raike, ka maty tao iaby ty ana’i Joba. Nampijalea’e kea Joba, ka nasia’e ‘bàe rate bakan-tombo’e, zisik’andoha’e any.’—Joba 1:3-19; 2:7.

20. a) Ino ty raha niazo’i Joba laha fa tsy nivalike ie? b) Fe, ino ro atao’i Satana ami’ty olo maro hafa?

²⁰ Tsy nivalike tami’i Jehovah Joba, ndre nijaly maré bibike manahake zay aza. Ka nitàha aze Jehovah, sady “nanome aze in-droe’ty fanana’e taloha.” (Joba 42:10) Tsy nahavoatarike an’i Joba hivalike Satana, fe nahavita nampiala olo maro tami-Ndranahare. Hoy ty Baiboly: “Zao tontolo zao iabiaby, le ambany fahefà’y aze raty iny eo.”—1 Jaona 5:19.

21. a) Akore ty nampisehoa’i Satana, fa tea’e ty hivavàha ami’e? b) Nanino Jesosy ro tsy nimety nivavake tami’i Satana?

²¹ Tea’i Satana hivavake ami’e tsika. Hita mazava raha zay tami’y fitsapà natao tami’i Jesosy fa ho 2 000 tao lasa zay. Hoy ty Baiboly: “Nanday aze [Jesosy] ho am-bohitse fara’e anabo eny ndraike ty Devoly, ka nanoro aze ty fanjakà iaby ami’zao tontolo zao, noho ty voninahi’y fanjakà reny. Le hoy ty asa’e tami’e: ‘Hameako anao raha iaby reo, laha miankohoke in-draike alohako etoa iha.’ ” Tsy naneke Jesosy, fa nivòla hoe: “Mandehana any iha Satana, fa voasoratsy hoe: ‘Jehovah Andranahare’ao ro toko’e iankohofa’ao, voho ho aze raike avao, ro toko’e anaòva’ao fanompoa masy.’ ” (Matio 4:8-10) Hai’Jesosy soa ty lalà’i Jehovah, ka tsy nanao ze tea’i Satana hatao ie.

22. Ino ty natao’ty demonia tami’ty olo?

²² Nisy anjele hafa nivalike tami-Ndranahare, nanorike an’i Satana. Favalo’ty olombelo, anjele demonia reny. Tea mampijale noho raty fanahy rozy reny. Nisy olo nanòvi’e mòa noho jiky taloha. (Matio 9:32, 33; 12:22) Ty hafa natao’e narare noho nanjare gege. (Matio 17:15, 18; Marka 5:2-5) Nampijale ajà mihitsy aza rozy reny.—Lioka 9:42.

23. a) Tea’ty fanahy raty hanao ino ami’e ty olo? b) Nofitahi’i Satana noho ty demonia hanao ino ty olo?

²³ Te hivavàha manahake Satana kea fanahy raty reny. Ilà’e vata’e sady ampirisihi’e ty hivavàha’ty olo ami’ty anjele, ndre fa hai’e aza fa Jehovah avao ro toko’e hivavàha. Mampiasa fitake noho vande voho fampitahòra Satana noho ty demonia’e, mba hivavàha’ty olo ami’e. Mazava ho azy, fa olo vitsivitsy avao ro mahay, fa Satana noho demonia reo ro ivavàha’e. Maro ty ho tserike laha fa mahay, fa manome voninahitse an’i Satana ty fivavàha’e. Mananatse ty Baiboly fa “ze raha amea’ty hafa firenena ho soro, le amea’e ho ahi’ty demonia, fa tsy ho an’Andranahare.”—1 Korintianina 10:20.

24. Ino ty fomba raike amitaha’i Satana ty olo?

²⁴ Fomba raike amitaha’i Satana noho demonia’e ty olo mba hivavake ami’e, ty fanaparitàha vande mikasike ty maty. Ndao, ho henteantsika ze volàni’ty Baiboly mikasike zay.