1. Ino ty hiseho laha ‘mamonjy an’Andranahare’ tsika?

TEA’I Jehovah ty olo manompo aze. Laha mivavake ami’e iha, le hitahy anao ie henany zao noho ami’ty hoavy kea. Hoy ty Baiboly: “Mamonjea an’Andranahare, le hamonjy anareo ie.”—Jakoba 4:8.

2. Fomba manao akore ro hamonjeantsika an’Andranahare, ka ìno ty vokai’y raha zay ami’ty vavake ataontsika?

² Toko’e hianatse noho hanatanterake ty Safà’Andranahare tsika laha ta hamonjy aze. Laha mivavake mifanarake ami’ty sitrapò’i Jehovah iha, le hijànjy noho hamale anao ie. Hoy apostoly Jaona: “Zao ro toky ananantsika ami-Ndranahare: Ndre ino ndre ino angatahintsika mifanarake ami’ty sitrapò’e, le mijànjy antsika ie. Voho laha haintsika fa mijànjy antsika ie ndre ino ndre ino angatahintsika, le haintsika fa ho azontsika raha zay, foto’e nangatahantsika tami’e.”—1 Jaona 5:14, 15.

3-7. Akore ro ahazoantsika ty fahendrea-Ndranahare? Akore ty anampea’y raha io antsika?

³ Hamea-Ndranahare fahendrea hahazakà ty fiaìna iha, laha fa mamonjy aze. Hoy ty Baiboly: “Laha misy ami’areo tsy ampy fahendrea, amporisihy ie tsy hijano hangatake raha zay ami-Ndranahare.”—Jakoba 1:5.

⁴ Akore ty hanampea’ty fahendrea-Ndranahare anao? Voaloha’e: manampe anao hahay ty raha hala’i Jehovah noho ty antoi’y zay ie io. Ho hai’ao kea ze toko’e hatao’ao mba hanalavìra raha rezay. Miaro anao tsy ho voa’ty raha manahìra mahazo ty olo ie io. Laha fa orìhi’ao ohatsy, ty torohevitsi-Ndranahare mikasike ty fomba fandesam-bata ami’y fomba malio, le tsy hahavoa anao raha reto: anake tsy nirỳ, arete azo baka ami’ty fiaràha amin’olo, voho ty tsy fahasambàra noho faharavà’ty fanambalia.

⁵ Ino kea ty soa azo’ao baka ami’y fahendrea io? Manampe anao hahita soa maro bibike ami’ty fiaìna ie io. Tafilitse ami’y zay ty fahaìza manao fanapaha-kevitse soa ami’ty raha atao mahazatse, manahake ty fomba fampiasà drala, ohatsy. Ho azo’ao farìta ty hikendry raha hahasoa noho handà ty raha tsy handay soa maharitse ho anao.

⁶ Manampe anao hifanarake amin’olo kea fahendrea io. Ho sambatse ty tokatrano’ao. Hahazo nàma soa tsy hahafoy anao iha, ka hohajà’ty olo iaby, ndra olo tsy manompo an’Andranahare reo aza.

⁷ Hahasoa ty fomba fahaìza’ao ty dika’ty fiaìna kea ty fahendrea baka ami-Ndranahare. Hanampe anao hiaritse fahasahìrana noho ty raha nitamàni’ao tsy tanterake ie io. Ho voalanjalanja ndreke ho soa kea ty fahità’ao ty hoavy. Hahasoa ty fahasalama’ao ara-tsay noho ara-bata ndraike ty fahita’ao hoavy io.—Ohabolana 14:30; Isaia 48:17.

8. Ino iaby ty raha tsy havakà’ao, laha manompo an’Andranahare iha?

⁸ Ho afake ami’ty favakà mahazo ty olo tsy manompo an’Andranahare iha, laha manompo aze. Tsy havàka lolo iha, foto’e hai’ao fa tsy misay rozy an-dolo ao io. Tsy havakà’ao kea ty ho maty, foto’e hai’ao  fa nampitamà Andranahare fa hovelòmi’e ndraike ty maty. Tsy havàka ty mpanao aòly noho ty mpamorike kea iha, foto’e hai’ao fa mahery vata’e Andranahare.—Jaona 8:32.

9-11. Ia ro hiay ami’y Paradisa ao, ndreke ia ro tsy hiay ao?

⁹ Tsy havàka ty hoavy iha laha mamonje an’Andranahare. Nihitantsika fa ty Baiboly le fa nanambara ty raha manahìra maro hitantsika henany zao. Volàni’i Jehovah amintsika fa mandalo avao raha reo, foto’e fa hanòva ty tany ho paradisa ty Fanjakà’Andranahare.—Lioka 21:10, 11, 31; 23:43.

¹⁰ Ze mamonje noho manompo an’Andranahare avao ro hiay ami’y Paradisa ao. Hoy ty Baiboly: “Laha fa afake kelikele, le tsy hisy ty raty fanahy; handinike ty misy aze iha, fa tsy ho hita ie. Fa ze mpandefitse ro handova ty tany ka ho falefale ami’ty habe’ty fiadàna.”—Salamo 37:10, 11.

¹¹ Ho maty mandrakizay ze mizìzo mandà ty lalà’Andranahare. (2 Tesalonianina 1:8, 9) Tsy hisy sasy rozy reo. Ho maty mandrakizay manahake Satana noho ty demonia’e rozy reo. (Apokalypsy 20:10, 14) Fe ze mianatse mikasike an’i Jehovah ndreke manompo aze, le ho falefale mandrakizay ami’y Paradisa an-tany etoy.

12. Ino ty volàni’ty Baiboly mikasike ty hoavy?

¹² Nanòma raha mahatserike sady soa bibike ho ahi’ze olo tea aze Jehovah! Henteo avao ty volàni’ty Safà’e mikasike ty fiaìna ami’y Paradisa an-tany etoy:

• Hany tsiefa: “Hahavokatse vary [ndra hany] maro ty tany, ndra am-bohitse eny aza.”—Salamo 72:16.

• Trano soa: “Hanao trano ty olo ka hipetrake ao.”—Isaia 65:21.

• Asa mahafalefale: “Ze voafiliko le hanao ze mahafa-po aze ami’ty asa’ty tana’e. Tsy ho vozake fahatane ie.”—Isaia 65:22, 23.

• Tsy hisy arete: “Tsy hisy ami’ty olo ao hivòla hoe: Marare’aho.”—Isaia 33:24.

• Tsy hisy handra: “Hampahità ty maso’ty jiky, ndreke haharé ty sofi’ty gy. Le hitsambòko tsy misy hafa ami’ty diera ty kombo, voho hiantsa ty lela’ty mòa.”—Isaia 35:5, 6.

• Tsy hisy raha mahararirare, ndra alahelo, ndra fahafatesa: “Hofafa’e [Andranahare] ty ranomaso iaby ami’ty mason-droze, ka tsy hisy fahafatesa sasy, sady tsy hisy sasy ty alahelo ndra ty raha mampitaray ndra ty raha mahararirare, foto’e fa tsy eo ty raha taloha.”—Apokalypsy 21:4.

• Tsy hisy aly: “Mampijàno ty aly zisike ami’ty fara’y tany [Andranahare].”—Salamo 46:9.

• Fiaìna mandrakizay: “Ty olo marina ro handova ty tany ka hipetrake ami’e eo mandrakizay.”—Salamo 37:29.

13. Ia avao ro ho afake hanòva ty tany ho paradisa, ndreke ino ty anto’e?

¹³ Tsy hahavita raha iaby rezay mihitsy ty olo, fa, Jehovah raike avao ro mana hery hanatanteràha raha novolàni’e iaby reo. Tsy misy afake manàka aze ami’y zay. Hoy ty Baiboly: “Tsy hisy tsy ho tanterake ty raha volàni-Ndranahare.”—Lioka 1:37.

14. Akore ro hahita’ao ty lala mandeha ami’y fiaìna mandrakizay?

¹⁴ Ampiasà’Andranahare ty Vavolombelo’e mba hanome fahafaha ty olo ‘hilitse ami’ty vavahady maifitse’ noho hanorike lala mandeha ami’y fiaìna mandrakizay any iny. Irì’ay iha mba ho tafilitsy anati’ty olo sambatsy maneke fanasà io. Tsofy rano iha hanarake ty fivavàha marina, ka hahazo ty fitahia’i Jehovah mandrakizay!—Matio 7:13, 14.