1. Laha ty fivavàha ro resahy, ino ro toko’e ho filìn’olo?

HOY Jesosy: “Ze tsy miarake amiko le manohitse ahy.” (Matio 12:30) Ka, ndra hanorike an’i Jehovah ty olo, ndra hanorike an’i Satana. Maro ro mihevitse, fa manompo an’Andranahare arake ty toko’e ho ie. Fe, mivòla ty Baiboly, fa “mamitake ty tany iaby misy olo” Satana. (Apokalypsy 12:9) Olo an-tapitrisa ro mino, fa mivavake ami-Ndranahare, fe Satana Devoly ro vata’e tompoen-droze! Toko’e hifìly ty olo: Ndra hanompo an’i Jehovah, “Andranahare’ty fahamarìna”, ndra hanompo an’i Satana, “rae’ty vande.”—Salamo 31:5; Jaona 8:44.

2. Ino ty fomba raike ampiasà’i Satana hanakàna ty olo tsy hivavake ami’i Jehovah?

² Mampiseho fahendrea sady ahazoa fitiava baka ami’i Jehovah ty fanapahan-kevitsika hifily hanompo aze. Fe, tsy mahafale an’i Satana ty olo mifily hanompo an’Andranahare, ka mamòro raha hampanahìra an-drozy ie. Fomba raike ampiasà’i Satana ami’y zay ty kizaky noho ty fanohéra baka amin’olo hafa ndra baka ami’ty nama noho ty longo. Fe, fa nivòla Jesosy fa, “ty longo’ty olo avao ro ho fahavalo’e.”—Matio 10:36.

3. Ino ro hatao’ao, laha manohitse ty fivavàha’ao ami-Ndranahare ty longo na ty nama’ao?

³ Ino ty hatao’ao laha avy ami’ao raha zay? Maro ty mahay fa diso ty fivavàha’e, fe misalasala ty hiala ao ie, foto’e atao’e fa  mivalike ami’ty fianakavia’e ie laha manao zay. Mety va eritseritse io? Tsy hananatse ty longo’ao va iha, laha ohatsy ka hai’ao, fa mampiasa jamala hanimba aze ie? Tsy mety laha iha ndraike ro handeha hanorike aze hampiasa jamala io.

4. Ino ty nivolàni’i Josoa tami’y Israelita, mikasike ty fivavàha tami’ty andro’e?

⁴ Nampirisike ty Israelita hiala tami’ty fivavàha diso noho ty fomban-draza diso Josoa. Hoy ty asa’e: “Henany zao, matahòra an’i Jehovah, ka manompoa Aze ami’ty fahitia noho ty fahamarìna; ka arìo ty andranahare notompoe’ty raza’areo tan-dafi’ty Ony noho ta Egypta tane, ka manompoa an’i Jehovah.” (Josoa 24:14) Tsy nivalike tami’i Jehovah i Josoa, ka notahì’i Jehovah. Hitahy antsika kea Jehovah, laha tsy mivalike ami’e tsika.—2 Samoela 22:26.

5. Nanino ty aòly ro toko’e hotorotoroantsika?

⁵ Laha fa miala ami’ty fivavàha diso, le toko’e ho torotoròa kea ty aòly, ndra fiàro zay, ndra peratse ndra ravake, ndra raha hafa miharo ami’ty aòly. Ilà vata’e raha zay, foto’e hanoroantsika fa mianky tanterake ami’i Jehovah tsika.

6. Natao’ty Kristiana voaloha’e reo akore ty boki’e mikasike ty fanaòva mazỳ ?

⁶ Diniho ty natao’ty Kristiana voaloha’e, laha fa nanorike ty fivavàha marina rozy. Hoy ty Baiboly: “Maro tami’aze mpanao mazỳ reo ro namòry ty boki’e, ka nandòro aze tamason’olo iaby teo.”—Asan’ny Apostoly 19:19.

7. Ino ro azontsika atao laha mampijale antsika ty demonia?

⁷ Mety hisy hampijalea’ty demonia olo manomboke manompo an’i Jehovah henany zao reo, laha nanao aòly ndra namorike ndra nanao raha manahake zay ie taloha. Kaìho maré ami’y vavake ty anara’i Jehovah, laha avy ami’ao raha zay. Hanampe anao ie.—Ohabolana 18:10; Jakoba 4:7.

8. Akore ro fihevera’ty Kristiana ty sampy noho ty sary masy, ampiasà ami’ty fivavàha diso?

⁸ Tsy mahazo manajàry ndra mampiasa sampy, ndra sary masy nampiasà tami’ty fivavàha diso ze maniry hanompo an’i Jehovah. Ty Kristiana marina le ‘mandeha ami’y finòa, fa tsy ami’ty raha hita’ty maso.’ (2 Korintianina 5:7) Mandràra ty fampiasà sary natao ivavàha ty lalà-Ndranahare, ka le orihin-drozy raha zay.—Eksodosy 20:4, 5.

9. Ino ro atoro’ty Baiboly mba hahahendry antsika?

⁹ Hoy ty Baiboly: “Ze miharo lia ami’ty hendry le ho hendry.” (Ohabolana 13:20) Mila miarake ami’ty Vavolombelo’i Jehovah tsika, laha ta ho hendry. Manorike lala mandeha ami’y fiaìna any iny rozy.—Matio 7:14.

10. Akore ro hanampia’ty Vavolombelo’i Jehovah anao hanompo an’Andranahare?

¹⁰ Le vata’e karakarà’ty Vavolombelo soa ty olo. Manampe ty olo soa fo, hahatakatse ty fahamarìna, mitarike ho ami’y fiaìna mandrakizay ami’y Baiboly ao, ty asan-drozy. Afake manampe anao hianatse Baiboly rozy, fe tsy karamà. Hamaly ty fanontanea’ao rozy, sady hanòro anao ty fomba hampiasà’ao ami’y fiaìna’ao fahalalà baka ami’y Baiboly ao io.—Jaona 17:3.

11. Akore ro anampea’ty fivoria kristiana anao?

¹¹ Hianatse raha maro bibike mikasike ty lalà’i Jehovah iha ami’y fivorian-drozy, atao ami’y Efitrano Fanjakà ane. Hampitombo maré ty faniria’ao hanorike ty fivavàha marina raha zay. Hampianare kea iha laha fa avy any mba hanampe olo hafa hianatse ty fahamarìna ami’y Baiboly ao.—Hebreo 10:24, 25.

12. Nanino ty vavake ro manampe anao hanompo an’Andranahare?

¹² Laha mazoto mianatse raha maro mikasike ty sitrapò’i Jehovah noho ty raha tea’e hatao iha, le hitombo ty fitiava’ao aze noho ty lala’e. Toko’e hitombo kea ty  faniria’ao hampifaly aze noho ty faniria’ao hanalavitse ty raha tsy tea’e. Tiaròvo, fa afake mangatake fanampea ami’y vavake iha, mba hanaòva’ao ty soa noho hanalavira’ao ty raty.—1 Korintianina 6:9, 10; Filipianina 4:6.

13. Akore ro ampifalea’ao ty fo’i Jehovah?

¹³ Laha fa mitombo ara-panahy iha le ho hita’ao, fa mila manolo-tena noho atao batisa iha mba ho Vavolombelo’i Jehovah. Hampifaly ty fo’i Jehovah iha, laha fa manjary raike ami’ty vahoake’e. (Ohabolana 27:11) Ho anati’y vahoake sambatse volàni-Ndranahare manahake zao iha: “Hipetrake amin-drozy eo noho handeha ami’e eo aho, le ho Andranahare’e, sady ho oloko ie.”—2 Korintianina 6:16.