FIZARÀ 1
Ty Fivavaha Iaby va ro Mampianatsy Fahamarina?
1. Ino iaby ty fivavàha misy an’Afriky atoy?
FA HO ty ankamaroa’ty olo an’Afriky atoy ro maneke fa ilà vata’e ty mivavake ami-Ndranahare. Fe, tsy mitovy ty fomba ivavàha’ty olo. Misy ty mandeha ami’y mosiké any, ty ila’e mandeha ami’y toera fanamasìna (hazomanga, tany faly, ...) any, ty hafa mandeha an-degilizy any. Tsy midika zay fa telo avao ty fivavàha an’Afriky atoy. Ndre amin-droze samby Silamo io aza, le mbo misy lalàna noho finoa samby hafa. Miovaova arakaraky ty faritsy koa ty fivavàhan-draza. Mbo mizarazara maro koa ndre aze fivavàha mivòla ty vata’e ho kristiana reo. Ankoatsy egilizy kristiana bevata reo, le mbo misy egilizy tsy mianky arivo mahere an’Afriky atoy.
Toko’e hifototse ami’y fahamarìna ty fivavàhantsika
2. a) Ino matetike ro mahavy ty olo hanorike ty fivavàha’e? b) Ino ty tsy azo anekea fa tea-Ndranahare ty fivavàhantsika?
2 Ino ty mahavy olo hanorike ty fivavàha misy azy? Maro ty nanorike ty fivavàha ty rae amin-drene’e. Eo kea ty voka’y raha niseho tami’y andro taloha. Hoy boky Ty Lova Telo Soso’y Afrikany (angilé): “Ty fanafiha ro nahavy faritsy avaratsi’i Saharà iny ho Silamo ... Manahake zay kea ty niparitaha’y Kristianisma antimo’i Saharà any. Ty fitaovam-pialia avao ro samby hafa, fa ty fomba nanafìha nitovy avao.” Fe ndre manao akory ndre manao akory, le mino avao ty ankamaroantsika fa eke-Ndranahare ty fomba ivavàhantsika. Fe tsy voatery ho tò ty fivavàhantsika, foto’e hoe, nanoriky azy io ty rae noho ty renentsika, ndra nampanorihi’ty mpanjana-tany ty razambentsika raha io.
3-5. Ino ty fanohara manampe antsika hahita fa tsy ty fivavàha iaby ro mampianatsy ty fahamarìna?
3 Samby hafa ty fampianara amea’ty fivavàha, ndre samby mivòla aze ho mpitari-dala azo itokisa ami’y fanompoa an’Andranahare aza rozy iaby. Tsy mitovy ty raha ampianarin-droze mikasike an’Andranahare noho ty raha ilà’e amintsika. Toy misy fanohàra: Ataontsika hoe nahita asa tami’y orinasa bevata raiky iha. Tami’y andro voaloha’e niasa’ao, le nihai’ao fa, nandeha an-tany lavitse mpampiasa iny. Bakeo manontany mpiasa telo iha hoe ino ty asa toko’e hatao’ao. Nivòla ty voaloha’e fa nampamafà mpampiasa iny trano iha. Ty faharoa nivòla fa toko’e handoko trano io iha. Voho fahatelo iny kea nivòla fa toko’e hizara taratasy iha.
4 Laha fa bakeo, nanontanea’ao mikasikasike mpampiasa iny rozy telo reo. Nivòla raiky voaloha’e iny fa mbo mpamaraky, lava, noho masiaky mpampiasa io. Faharoa iny nivòla fa, nahoda fa be tao, boribory, soa fanahy olo io. Ty fahatelo nivòla fa, tsy lahilahy mpampiasa io, fa ampela. Atokìsa fa hai’ao hoe tsy ho marina iaby raha nivolàni’y mpiasa telo reo. Ka laha tea’ao ty hitanjake asa’ao vaovao io, le azo antoke fa hanao fikaròha iha mba hahaìza ty tò mikasike mpampiasa’ao io noho ty raha tea’e hatao’ao.
5 Manahake zay kea ty fivavàha. Maro maré ty hevitse mikasike an’Andranahare noho ty raha ilà’e amintsika, ka toko’e hahazo antoke tsika hoe mifanarake ami’y fahamarìna ty fivavàhantsika sa tsy mifanarake. Fe manao akore ty ahaìzantsika ty fahamarìna mikasike an’Andranahare?
