Zao ty raha niseho: Nandeha amy tanà mbo tsy nandehanany mihintsy Mosa, le nitratsy ty haly. Naìky marè ty andro ka tsy nisy famantaran-dala hitany sasy. Lafa lisatsy lavitsy ie vo naharaky hoe trobo. Evàny nivio lala hafa ie io.

Laha iha ro tamy pilasini-Mosa, ino ty ho nataonao?

Misy raha maromaro azonao atao:

1. Manontany olo.

2. Mampiasa jiro.

3. Mandeha avao, sady mitamà hoe ho potitsy amy lala iny any avao.

Tsy de soa aloha azy Fahatelo farany io.

Azy Faharoe io ro tena soa laha ampitovizy amy raiky voalohany io, satria azonao andesy miaraky aminao avao jiro iny mba hanazava ze lala ombànao.

Manahaky ani-zay koa fa afaky manampy anao ty Baiboly!

Maro mpana boky io, sady afaky

• mitariky anao lafa tojiky raha manahira iha

• manampy anao handiniky ty vatanao ka hanjary olo soa

• manampy anao hahay hoe akory ty hanananao fiaina farany ze soa

Laha vo mahay mivola tsika, le fa mametraky fanontanea.

• Manino ty lanitsy ro bolebolè?

• Manino ty basia ro mamirapiratsy?

Lafa mandeha ty fotoa, le manomboky mametraky fanontanea mikasiky ty raha manodidy antsika tsika.

• Manino ro misy ty raha raty?

• Manino ty olo ro maty?

Hay ndre fa amy Baiboly ao avao ty valini-fanontanea reo?

Maro ty mivola fa tapasiry avao ty raha volany amy Baiboly ao. Fa lany daty zao hoe raha io, sady sarotsy biby ty mahazo ty raha volaniny. Ty Baiboly va ro manahira, sa ty raha volanin’olo mikasiky ty Baiboly? Hay ndre nampianary raha diso rozy?

Mieritseritsy, ohatsy, ty olo fa Ndranahary ro manday ani-tontolo toy. Marina va raha zay? Mikoronta marè tontolo toy! Manjeky ty fijalea, ty arety noho ty fahafatesa, ty fahantrà noho ty loza. Ndranahary be fitiava va le hahavita raha manahaky ani-reo?

Teanao ho hay va ty valini-fanontanea zay? Mety hahatseriky anao ty raha volanini-Baiboly mikasiky ani-zay!

Arakinao vasa fa mifototsy amy Baiboly ty torohevitsy anatini-bokikely toy ato. Resy lahatsy ty Vavolombeloni-Jehovah fa misy tari-dala azo antoky amy Baiboly ao. Ino ty antony? Satria “lafa atao raha voasoratsy amy Soratsy Masy ao le baka amy herini-fanahy masi-Ndranahary, sady mahasoa mba hampianara, hananara, hanarena ze diso.” (2 Timoty 3:16, 17) Ka laha zay ie, le soa laha ianaranao ty Baiboly!