FANONTANEA 6
Ino ty Hataoko Laha Misy Mitao Ahy Haheriloha?
INO TY HO NATAONAO?
Zao ty raha niseho: Mamonjy ani-Boba ty roe amy mpiaraky mianatsy aminy. Fa mitempo sahady ie, satria fa indroe zay rozy ro nampirisiky azy hitroky sigara tamy herinandro toy. Avy le fa hainy hoe ino lian-drozy bakao io.
Nivola tse raiky iny:
“Mangiky koahy rahabe ty! Aleo leroa iha amea nama!”
Sady manao pimaso ie ro mampiboaky raha baka am-posony ao. Avy le haini-Boba hoe tsy olo “nama” teany hovolany io. Atorony ani-Boba amy zay raha iny.
Kay hondy sigara an-tanany eny io. Vomaiky tofotsy Boba.
Nivola Boba hoe: “Zalahy e! Zaho hoasako tsy...”
Avy le nivola raiky faharoe iny hoe: “Ka manao favakà raty ho io koahy e!”
Mbo kely nahavola ho zao avao Boba: “Tsy mavaka raty zao koahy aho!”
Manambitamby ani-Boba raiky faharoe iny sady mandrakoky azy amy tanany raiky. Hoy ty asany: “Mba andramo tse moa!”
Ataoni-raiky voalohany iny marìny vavani-Boba eo sigara iny, sady bisibisihiny ie hoe: “Ao fa tsy ambarambaranay olo. Ka matahotsy iha!”
Laha iha ro tamy pilasini-Boba, ino ty ho nataonao?
MIERITSERETA SOA TSE!
Nieritseritsy hanjary mpitroky sigara va namani-Boba reo? Fa naniry hanao ani-zay va rozy? Aha. Naneky hotaomin’olo rozy, laha ty marina. Mba ta ho teani-naman-drozy avao rozy, ka nanaraky ty raha ataon-drozy.
Laha tojiky raha manao ho io iha, ino ty azonao atao mba tsy ho voatao haheriloha?
-
MIOMÀNA SANDRANY
Hoy ty Baiboly: “Mahihitsy ty olo raiky laha mahajilo loza ka mivony, fa ty tanora fanahy mbo mamonjy avao ka voa.”—Ohabolana 22:3.
Fa hainao matetiky ty raha hiseho. Eritsereto, ohatsy, hoe misy mpiaraky mianatsy aminao vitsivitsy mitroky sigara alohaloha eny. Laha mioma sandrany iha, le tsy hatahotsy.
-
MANDINIHA SOA
Hoy ty Baiboly: “Manàna feoni-fieritsereta malio avao.”—1 Petera 3:16.
Mieritsereta hoe: ‘Hay ndre haneny aho laha manaraky an-drozy?’ Marina fa mety ho teani-namanao tse iha. Fe hanao akory iha bakeo? Le hanjary haheriloha va iha mba hahafalifaly ty mpiaraky mianatsy aminao?—Eksodosy 23:2.
-
TAMPAHO TY HEVITSINAO
Hoy ty Baiboly: “Ty mahihitsy mandiniky ty liany.”—Ohabolana 14:15.
Tsy maintsy mandramby fanapahan-kevitsy noho mibaby ty vokatsini-fanapahan-kevitsy nirambesintsika tsika. Resahini-Baiboly fa nandramby fanapahan-kevitsy soa ry Josefa, Joba, noho Jesosy. Volaniny koa fa mifanohitsy amy zay ty nataon-dry Kaina, Esao, noho Jodasy. Ka iha?
Hoy ty Baiboly: “Ze azo atokisa amin-draha kelikely le azo atokisa amin-draha bevata koa.” (Lioka 16:10) Ho hitanao fa ho mora aminao ty hivola ty hevitsinao laha fa nidinihinao ty ho vokatsiny. Hahasoa anao koa raha zay.
Tsy voatery hanazava raha maro iha. Fa ampy lafa mivola iha hoe AHA, sady tsy misomonga. Na laha mbo tsy ampy zay, le mivolana hoe:
-
“Ka ampilimpiliry amy zao aho!”
-
“Tsy manao ani-zao aho!”
-
“Oh! Zaho hoasako tsy hanao ani-zao!”
Ka mihatsàtsy sady ka misomonga. Ho hitanao fa avy le hiala teo ie.
INO TY ATAO LAFA MISY MIKIZAKY?
Laha maneky hotaomini-namanao haheriloha iha, le hanahaky robot io, ka rozy ro hikomandy anao
Manao akory laha mikizakizaky anao ty namanao? Akory laha mivola rozy hoe: “Mba raha mavaka raty iha io!” Tiarovo fa mbo fitaoman-drozy anao haheriloha iaby zay. Ino ty azonao atao? Retoa misy soso-kevitsy roe:
-
Maneky ani-kizaky iny. (Mivolana hoe: “Ee, mavaka vatany aloha aho!” Bakeo volano tsiela ty antony.)
-
Mampieritseritsy azy. Hazavano ty antony tsy anekeanao, le mivolana raha hahavy azy handiniky. (Mivolana hoe: “Tsy nampoiziko hoe olo mahihitsy manahaky anao ro hitroky sigara!”)
Laha mbo kizahin-drozy avao iha, le mialà teo! Tiarovo fa arakaraky ty ijanònanao eo ro vomaiky hampanjeky an-drozy. Fe hitan-drozy hoe tsy haneky mihintsy iha laha miala teo.
Tsy maintsy mbo hitao anao avao rozy, fe afaky manapa-kevitsy iha hoe haneky sa handà. Afaky mivola ty hevitsinao amin-drozy koa iha sady tsy miovaova mihintsy. Zany hoe, anjaranao ty mifily!—Josoa 24:15.
