Zao ty raha niseho: Mbo tsy ampy tao Karen fe nandeha namonjy fety. Laha vo niavy betibety tao ie, le nisy namany nivola tafarany tao hoe:

Nitoliky Karen. Kay hondy Jessica io. Nanday tavoangy labiera roe fa misokatsy ie, le nameany ani-Karen ty raiky sady nivola ie hoe: “Tsy raha fa anakajà sasy any lie iha! Toy naiky e. Ndao mba hifalifaly!”

Ta handà Karen, fe tsy mahasaky satria mpinama rozy. Tsy teany koa tsy no hokizahini-Jessica hoe masera ie. Mieritseritsy amy zay Karen hoe: ‘Jessica aza hendry nefa mino ka! Sady hampanino koa moa zay! Raha labiera avao toy koa va? Zaho tsy raha hoe mijangajanga na mitroky jamala!’

Laha iha ro tamy pilasini-Karen, ino ty ho nataonao?

Mila mana hazon-dambosy iha laha ta hahay handramby fanapahan-kevitsy. Mana hazon-dambosy ty olo raiky lafa mana ty maha ie azy noho mitanjaky ty raha inoany. Hahavita hifehy ty fiainanao iha amy zay, fa tsy hanenga ty hafa hanao ani-zay.—1 Korintianina 9:26, 27.

Ino ty hanampy anao hana toetsy soa manahaky ani-zay? Soa laha valeanao tse fanontanea efatsy retoa.

Vomaiky hatòky ty vatanao iha lafa mahay ani-zay.

OHATSY AMY BAIBOLY: Nanoratsy ty apostoly Paoly hoe: “Ndre tsy mahay aza aho amy resaky fivolana, le tsy ho zay aho amy fahaiza.” (2 Korintianina 11:6) Nahay soa ty Soratsy Masy Paoly ka afaky nitanjaky ty safàny lafa nisy nanohitsy. Tsy niovaova hevitsy ie ndre nisy nanakivy.—2 Korintianina 10:10; 11:5.

DINIHO TY VATANAO: Sorato ze talenta na fahaiza anananao.

Sorato koa ty toetsy soa anananao. (Ohatsy hoe soa fanahy, matariky, azo atokisa, manaja fotoa)

Mety hanimba anao tsikelitsikely ty handranao laha engànao hifehy ty fiainanao.

OHATSY AMY BAIBOLY: Haini-Paoly ty handrany ka nanoratsy ie hoe: “Le vatany teako ty lalàna-Ndranahary, araky ty toetsy maha ie ahy, fe amy vatako ao le ahitàko lalàna hafa mialy amy lalànani-saiko sady manday ahy ho andevoni-lalànani-ota.”—Romanina 7:22, 23.

DINIHO TY VATANAO: Ino ty handra hitanao hoe tokony horesènao?

Manao akory laha misy olo miondra taxi le volaniny sofera iny mba hiodikodiky manodidy tranobe raiky zisiky ilaniani- esansiny? Gegy ty olo manao ani-zay sady mandany drala avao.

Ino ty fianara azo rambesy baka amy zay? Manjary hisy dikany ty fiainanao laha mana raha kendrè iha. Ho hainao soa amy zay ty raha teanao hatao noho ty fomba hahavità azy.

OHATSY AMY BAIBOLY: Nivola Paoly hoe: “Lafa lomay aho, le tsy lomalomay fahatany avao.” (1 Korintianina 9:26) Nana raha kendrè Paoly sady niezaky nanatratsy ani-raha zay. Tsy nipetrapetraky amy zao avao ie, ka hoe nandìny ze raha hiseho.—Filipianina 3:12-14.

DINIHO TY VATANAO: Sorato ty raha telo kendrènao hatao amy tao ho avy.

Hiovaova hevitsy manahaky sangorikità miovaova loko io iha, laha tsy mana ty hevitsinao manoka fa miezaky hitovy amy ty namanao avao. Ho hita amy zay fa tsy mana ty maha iha anao iha.

Mifanohitsy amy zay fa laha manao raha mifanaraky amy ty hevitsinao manoka iha, le tsy hiovaova hevitsy mihintsy ndre ino ndre ino raha ataon’olo.

OHATSY AMY BAIBOLY: “Tapa-kevitsy tam-pony ao” Daniela, tamy mbo nitanora, hoe hanoriky ty lalàna-Ndranahary avao ie ndre lavitsy ty fianakaviany aza. (Daniela 1:8) Nitanjaky ty safàny avao Daniela, ka tsy niovaova hevitsy mihintsy.

DINIHO TY VATANAO: Ino ty hevitsinao manoka? Ohatsy: Mino va iha fa misy Ndranahary? Ino ty antony? Ino ty mahavy anao ho resy lahatsy fa misy ie?

Mino va iha hoe mahasoa anao ty fitsipiki-Ndranahary mikasiky ty fandaisam-bata? Ino ty antony?

Olo manao akory amy zay iha? Manahaky ravinkazo mora andesin-tsioky rey, sa manahaky hazo mahatanty tsioky mahery? Miezaha avao hitanjaky ty hevitsinao, le hamahatsy soa manahaky hazo mahatanty tsioky mahery io iha. Ho hainao amy zay hoe Olo manao akory marina iha io!