Ndao tse hohenteantsika ty raha niseho, tao maromaro lasa zay. Nisy lahilahy Israelita mana anara Nehemia zay nipetraky ta Sosana, a Persa any. Mpanomponi-Artaksersesy Mpanjaka ie. Nanday vaovao raty baka a Joda any rahalahiny zay ndraiky andro, le nivola hoe: ‘Mampatahotsy ty a Jerosalema ao. Mbo tsy namboary avao lakoro noho vavahady naropakini-Babylonianina rey.’ Nalahelo Nehemia. Ta handeha a Jerosalema any ie mba hanampy an-drozy any. Farany ie nivavaky, soa hengani-mpanjaka handeha.

Lafa afaky andro vitsivitsy, le nihitani-mpanjaka iny fa nalahelohelo avao Nehemia. Nivola mpanjaka iny hoe: ‘Mbo tsy nahita anao manao ho zao ndraiky aho. Misy ino kay?’ Le hoy Nehemia: ‘Ino moa lahy mpanjaka ty tsy hampalahelo ahy? Mbo simbasimba avao Jerosalema tanà niaviako.’ Nanontany azy mpanjaka iny hoe: ‘Ka ino ty azoko anampea anao?’ Tonga de nivavaky tam-pony tao Nehemia. Bakeo nivola ie hoe: ‘Mba engao handeha a Jerosalema any aho, fa hamboariko ndraiky lakoro any io.’ Naneky handefa ani-Nehemia Artaksersesy Mpanjaka, sady nataony azo antoky hoe tsy hanahy ty lian-drozy. Nataony governorani-Joda koa Nehemia sady nameany hazo mba hanamboara vavahadini-tanà iny.

Lafa niavy ta Jerosalema ao Nehemia, le nihenteany soa lakorobe iny. Bakeo navoriny mpisoro noho mpitariky reo, ka hoy ty asany: ‘Mila miasa tsika fa tsy misy tavin-draha toy.’ Naneky iaby ty olo ka namboarin-drozy amy zay lakorobe iny.

Fe nikizakizaky ani-Israelita reo ty fahavalon-drozy hoe: ‘Lakoro amboarinareo tia, ndre ty amboanala mahavita mandropaky azy.’ Tsy nidareani-mpiasa rey kizakizaky iny, fa niasa avao rozy. Niakatsy niakatsy avao lakoro iny sady nihanatanjaky.

Nanapa-kevitsy fahavalo rey fa hataon-drozy anivo Jerosalema, bakeo hotafihin-drozy tampoky. Lafa nireni-Jiosy reo raha zay, le natahotsy rozy. Fe nivola Nehemia hoe: ‘Ka matahotsy fa hanampy antsika Jehovah.’ Samby nasiany olo hiamby azy mpiasa rey, ka tsy afaky nanafiky an-drozy ty fahavalo.

 Tanatini-52 andro avao, le nivita lakorobe iny miaraky amy ty vavahadiny. Nandesini-Nehemia a Jerosalema ao amy zay ty Levita iaby mba hanao fitokàna. Nizaràny ho antoko-mpihira roe Levita rey, bakeo nampiakariny amy eskaliè amy Vavahadin-doharano eo. Lafa niavy anaboni-lakorobe iny eny rozy, le nandeha nihodidy ani-tanà iny, ka ty ilany mbankavia mbao, le ty sisany mbankavana mbao. Nandefa moziky tamy trompetra, kipantsona noho harpa rozy, sady nihira ho ani-Jehovah. Niaraky tamy ilany rey Ezra, fa Nehemia niaraky tamy ty sisany. Nifankatojiky amy zay rozy lafa tamy tempoly teo. Nanome soro ho ani-Jehovah ty olo iaby ndre lahilahy, ndre ampela, ndre ajà, le bakeo nifety. Nifalifaly biby rozy, ka le nirè zisiky a lavitsy any ty feon-drozy.