Lafa nihabe Jaona, azy anakilahini-Zakaria noho Elizabeta iny, le nanjary mpaminany. Nampiasa azy Jehovah mba hampianatsy ty olo hoe fa ho avy ty Mesia. Fe tsy nampianatsy tamy synagoga tany na tan-tanà tao ie fa nitory tan-diomonto any. Niavy iaby ty olo baka a Jerosalema noho Jodia any mba hijanjy azy. Nampianariny rozy hoe tsy tokony hanao raha raty sasy rozy laha tean-drozy ho falifaly Ndranahary. Maro ty nibebaky lafa baka nijanjy ani-Jaona, ka nataony batisa tamy Vavaranoni-Jordana eo.

Nana fiaina tsotra Jaona. Volon-drameva ty akanjony, le galala noho tantelinala ty fihaniny. Ta hahay azy iaby ty olo. Ndre Fariseo noho Sadoseo mpirengirengy rey aza namonjy teny. Hoy Jaona: ‘Mila miova noho mibebaky nareo! Ao nareo tsy hieritseritsy hoe olo miavaky nareo satria anakini-Abrahama. Tsy zay ty haha anaki- Ndranahary anareo.’

Maro biby ty olo niavy tamy Jaona teo, le nanontany hoe: ‘Ino ty tokony hataonay mba hahafalifaly a Ndranahary?’ Nivola tamy Jiosy rey Jaona hoe: ‘Laha mana akanjo roe iha, le ameo raiky ze tsy mana.’ Hainao va hoe nanino ie ro nivola ani-zay? Teany ho haini- mpianatsiny rey hoe tokony ho tea olo rozy laha ta hampifalifaly a Ndranahary.

Nivola tamy mpamory hetra rey Jaona hoe: ‘Manaova ty marina fa ka mamerivery olo.’ Hoy koa ie tamy maramila rey: ‘Ka mavandy, le ka manao kolikoly.’

 Namonjy ani-Jaona teny koa mpisoro noho Levita rey, le nanontany azy hoe: ‘Ia va iha io? Ta hahay anao iaby ty olo.’ Namaly Jaona hoe: ‘Zaho azy feo an-diomonto any nivolanini-Isaia mpaminany iny hoe mitao ty olo hamonjy ani-Jehovah.’

Nitean’olo ty raha nampianarini-Jaona, ka maro ty nieritseritsy hoe ie ro Mesia. Fe hoy Jaona: ‘Mbo ho avy azy bevata mandilatsy ahy iny. Ndre zaho aza ka tsy maeva hamotaky ty kapany. Zaho manao batisa amy rano, fa ie hanao batisa amy fanahy masy.’