Nino ty olo tamy faritsy antinanani-Israely tany hoe afaky mitari- dala an-drozy ty basia. Ndraiky haly, le nahita raha atao ho basia mazava biby tan-danitsy eny lahilahy baka antinana any rezay. Narahin-drozy raha iny. Nitariky an-drozy ta Jerosalema any “basia” iny. Nanontany olo amy zay rozy lafa niavy tany hoe: ‘Nateraky aia ajà ho mpanjakani-Jiosy zao? Niavy hiankohoky aminy zahay.’

Niasa loha biby Heroda, azy mpanjakani-Jerosalema iny lafa naharè hoe nisy mpanjaka vaovao. Nanontaneany sefoni- mpisoro rey hoe: ‘Tokony ho teraky aia moa hoe mpanjaka zao?’ Nivola taminy rozy hoe: ‘Hateraky a Betlehema any ie, hoasani-mpaminany rey.’ Nikaihini-Heroda amy zay lahilahy baka antinana any rey, le nivolaniny hoe: ‘Mandehana a Betlehema any le ilao ajà zay, fa hiankohoky aminy eo koa aho.’ Fe vandy raha zay.

Nandeha ndraiky “basia” iny. Nanaraky azy zisiky a Betlehema any lahilahy rey. Nijano tanaboni-trano raiky zay teo amy zay “basia” iny, farany nilitsy tao rozy. Nahita ani-Jesosy noho Maria reniny rozy. Niankohoky tamy ajà iny teo rozy, bakeo nanome azy volamena, emboky manitsy noho miora. Jehovah vatany va ro naniraky ani-lahilahy rey mba hila ani-Jesosy? Aha.

Niresaky tamy Josefa tamy nofy Jehovah tamy haly iny. Hoy ty asany: ‘Teani-Heroda hovonoa Jesosy. Milaisa mana a Ejipta any nareo morovaly, miaraky amy anakilahinareo ’o, le mijanòna any. Mbo hivola aminao aho lafa afaky mimpoly nareo.’ Tonga de nandeha a Ejipta any Josefa miaraky amy ty fianakaviany.

Nivolanini-Jehovah koa lahilahy baka Antinana any rey hoe tsy tokony himpoly amy Heroda any rozy. Lafa nihaini-Heroda hoe tsy himpoly sasy rozy, le neloky biby ie. Tsy nihainy ty misy ani-Jesosy, farany nampa- monoany iaby ze anakajà lahilahy a Betlehema ao mitovy tao amy Jesosy. Fe fa nilavitsy biby Jesosy ka tsy nanahy. Fa ta Ejipta any ie.

 Lafa nimaty Heroda, le nivolanini-Jehovah Josefa hoe: ‘Mandehana amy zay moly.’ Nimpoly tan’Israely tany Josefa noho Maria voho Jesosy, le liany nipetraky ta Nazareta tao.