Lafa nitampitsy Paska iny, le nimpoly ta Galilia any ndraiky Jesosy noho mpianatsiny rey. Lafa nariniriny ani-tanà Sykara teo Jesosy, le nijano tamy pilasy raiky kaihy hoe vovoni-Jakoba zay. Nitofatofa teo ie fa mpianatsiny rey nandeha nivily hany tan-tanà ao.

Nisy ampela raiky zay niavy teo fa hantsaka. Hoy ty asani-Jesosy taminy: “Mba ameo rano aho hinomiko.” Namaly ie hoe: ‘Zaho anè Samaritanina. Ka manino iha miresaky amiko, kanefa ty Jiosy tsy miresaky amy Samaritanina?’ Le hoy Jesosy: ‘Laha nihainao hoe ia aho, le ho nangataky rano amiko iha, ka ho nameako rano velo.’ Le hoy ampela iny: ‘Aia koa, iha aza tsy mana sihoa iaby.’ Le nivola Jesosy hoe: ‘Ze mino ty rano ameako, le tsy haran-drano sasy.’ Hoy ampela iny: “Mba ameo amy rano zay lahy aho.”

Nivola amy zay Jesosy hoe: ‘Andeso bakao valinao.’ Namaly ie hoe: ‘Tsy manambaly aho.’ Hoy Jesosy: ‘Marina zay. Fa indimy nanambaly iha zay, le tsy valinao lahilahy miaraky mipetraky aminao ao henanizao ’o.’ Nivola amy zay ampela iny hoe: ‘Kay hondy iha io mpaminany! Mino zahay hoe afaky mivavaky amy Ndranahary amy vohitsy toy etoa zahay, fe Jiosy reo mivola hoe a Jerosalema any avao ro tokony hivavaha. Mino aho fa hampianatsy antsika hivavaky ty Mesia lafa avy.’ Bakeo hoy Jesosy: ‘Zaho Mesia zao.’ Mbo tsy nisy olo nivolana- ni-Jesosy ani-zay mihintsy.

Nilay nana an-tanà any malaky ampela iny, ka nivola tamy Samaritanina rey hoe: ‘Ho  raha Mesia nihitako zay! Hainy iaby ty mikasikasiky ahy. Ndao moa tsika hanenty azy any!’ Nanaraky azy am-bovo eny iaby rozy, le nijanjy ty raha nampianarini-Jesosy.

Nivolanini-Samaritanina rey Jesosy mba hijano amy tanàn-drozy ao. Nampianatsy tao ie tanatini-roe andro ka maro biby ty olo nino azy. Hoy ty asan-drozy tamin’ampela iny: ‘Lafa nijanjy ani-lahilahy iny zahay, le hainay fa ie vatany ro hanavotsy ani-zao tontolo zao.’