FIANARA FAHA-80
Nifily ani-Apostoly 12 rey Jesosy
Tao raiky noho tampany zay ty nitoriani-Jesosy. Tsy maintsy hifily amy zay ie hoe ia ty tena hiaraky hiasa aminy. Hohenteany soa ze olo hampiofaniny mba hitariky ty fiangona Kristiana. Vatan-draha raha reo ka teani-Jesosy laha manampy azy Jehovah. Farany ie nana amy vohitsy raiky zay eny, le nivavaky zisiky maraindray. Lafa niavy ty maraindray, le nikaihini-Jesosy ty mpianatsiny ilany. Nifily 12 baka amy reo ie, le nataony apostoly. Ia iaby ty tiaronao? Retoa iaby ty anaran-drozy: Petera, Andrea, Jakoba, Jaona, Filipo, Bartolomeo, Tomasy, Matio, Jakoba anakini-Alfeo, Tadeo, Simona, le Jodasy Iskariota.
Andrea, Petera, Filipo, Jakoba
Nandeha nitory niaraky amy Jesosy rozy 12. Nampiofaniny tse rozy, bakeo nirahiny hitory amy zay. Nameani-Jehovah hery rozy, soa ho afaky handroaky demonia noho hanafaky arety.
Jaona, Matio, Bartolomeo, Tomasy
Nikaihini-Jesosy hoe namany apostoly 12 rey sady natokisany. Kanefa Fariseo rey nieritseritsy an-drozy ho olo tsotra noho tsy nahita fianara. Fe nampiofanini-Jesosy rozy soa hahay soa ani-asa
anirahany an-drozy iny. Niaraky tamy Jesosy avao rozy tamy fotoa niavaky tamy ty fiainani-Jesosy. Teo, ohatsy, rozy talohani- nahafatesany noho tafarani-nameloma azy ndraiky. Baka amy faritsy niaviani-Jesosy a Galilia any ty ankamaroani-apostoly reo, le ty ilany nanambaly.Jakoba anakini-Alfeo, Jodasy Iskariota, Tadeo, Simona
Nanao hadisoa avao koa apostoly reo satria tsy lavorary. Tsy nieritseritsy soa rozy kindraiky ka nanaontao fahatany. Nisy fotoa koa rozy tsy nahaliny. Nialy hevitsy iaby rozy hoe ia amin-drozy ty ambony. Fe ndre teo zay, le olo soa rozy sady tea ani-Jehovah. Rozy ro hitariky ty fiangona kristiana lafa tsy eo sasy Jesosy.
“Kaihiko hoe nama nareo, satria ambarako anareo iaby ze raha reko baka amy Babako.”—Jaona 15:15