Nalay ani-Jesosy Fariseo reo ka nila antony hanambora azy avao. Nivola rozy fa tsy tokony hitaha olo marary ie lafa Sabata. Nahita lahilahy jiky raiky nangataky tan-dala teny Jesosy ndraiky Sabata zay. Nivola tamy mpianatsiny rey ie hoe: ‘Henteo fa hanampy ani-lahilahy io ty heri-Ndranahary.’ Nafangaroni-Jesosy amy tany ty iviny, bakeo nataony tamy masoni-lahilahy iny eo. Nivolanini-Jesosy ie hoe: ‘Ndany manasa maso a Siloama any.’ Nataoni-lahilahy iny vatany raha zay, farany nahita ie. Sambany ie tamy zay vo nahita, liany nahaterahany.

Nitseriky ty olo. Hoy ty asan-drozy: ‘Lahilahy mpangataky an-dala eny iny va toy, sa olo manahaky azy avao?’ Namaly lahilahy iny hoe: ‘Zaho azy jiky baka an-kibon- dreniko any iny!’ Nanontany azy olo rey hoe: ‘Ka manino iha fa tsy jiky sasy io?’ Lafa nitantaraniny tamin’olo rey raha iny, le nandesin-drozy tamy Fariseo rey teo ie.

Nivola tamy Fariseo rey lahilahy iny hoe: ‘Nasiani-Jesosy fotaky tamy masoko teo le nampanasany ahy raha iny. Nataoko vatany raha zay, le toy aho mahita.’ Nivola Fariseo rey hoe: ‘Tsy baka amy Ndranahary herini-Jesosy zao, kanao ie mitaha olo amy andro Sabata.’ Nisy nivola koa hoe: ‘Tsy ho nahavita nitaha olo mihintsy ie laha tsy baka amy Ndranahary ty heriny.’

Nikaihini-Fariseo reo babani- lahilahy iny noho reniny, le  nanontanean-drozy hoe: ‘Ino nampahita anakilahinareo tia io?’ Fe natahotsy rozy, satria fa nivola Fariseo rey fa horoasy baka amy synagoga ao ze olo mino ani-Jesosy. Farany namaly rozy hoe: ‘Tsy hainay. Anontaneo ie.’ Nametrahani-Fariseo reo fanontanea maro lahilahy iny. Farany ie nivola hoe: ‘Ka fa nivolaniko aminareo iaby any ze raha haiko. Manino nareo mbo manontany avao ’o?’ Neloky Fariseo rey, ka niroasin-drozy ie.

Nandeha amy lahilahy iny any Jesosy. Lafa nihitany ie, le nanontaneany hoe: ‘Mino ani-Mesia va iha?’ Namaly lahilahy iny hoe: ‘Ho nino azy aho laha nihaiko ie.’ Nivola Jesosy hoe: ‘Zaho Mesia io.’ Soa fanahy vatany Jesosy zao. Sa akory? Tsy nitahany avao lahilahy iny fa mbo nampeany hana finoa koa.