Niavy tan-tany etoy Jesosy mba hitory mikasiky ty Fanjakà- Ndranahary. Teani-Jehovah ho hain’olo hoe ino ty raha hataoni- Jesosy lafa ie Mpanjaka. Nameani-Jehovah fanahy masy amy zay Jesosy soa ho afaky hanao fahagagà, ka niafakiny iaby ze kila arety. Ze tany nombany tsy maintsy nisy olo marary namonjy azy avao. Nitahany rozy ka ty jiky nanjary nahita, ty mareny naharè, ty kombo iaby nandeha, le ty olo nisy demonia niafaky. Ndre nikasiky ty akanjoni-Jesosy kelikely avao aza ty olo raiky, le fa niafaky ty aretiny. Nanoriky ze nombani-Jesosy avao ty olo, fe tsy niroasiny ndre fa vozaky aza ie.

Ndraiky andro, le nisy lahilahy kombo nandesin’olo tamy trano nisy ani-Jesosy tao. Fe tsy afaky nilitsy tao rozy, satria nimaro marè ty olo. Farany niloahin-drozy tafo iny, le najotson-drozy mbeo lahilahy iny. Le hoy Jesosy tamy lahilahy iny: ‘Mitsangana, le mandehana.’ Nitseriky iaby olo rey lafa nandeha vatany ie.

Nisy fotoa koa Jesosy nana amy tanà raiky zay. Nisy lahilahy folo rezay ty tao. Boka rozy. Tsy nahazo niharìny olo tamy zay ty boka, farany rozy nipetraky lavidavitsy eny avao. Lafa nilitsy tao Jesosy, le nikaikaiky rozy hoe: ‘Jesosy e, ampeo zahay!’ Nampandehanini-Jesosy amy tempoly any amy zay rozy. Ino ty antony? Satria mivola ty Lalànani-Jehovah hoe tsy maintsy manao ani-zay ty olo boka lafa janga. Niafaky any  aretin-drozy rey lafa tan-dala teny rozy. Samby nahita ani-zay iaby rozy, fe ty raiky amin-drozy avao ro nimpoly amy Jesosy any mba hisaotsy azy noho hidera a Ndranahary.

Nisy ampela zay narary tanatini-12 tao. Naniry ho afaky amy aretiny io ie, ka norihiny baka afara ao Jesosy lafa nihitany tanaty olo tao. Laha vo nikasihiny ty sisini-akanjoni-Jesosy, le niafaky aretiny iny. Hoy amy zay Jesosy: “Ia nikasiky ahy zay?” Natahotsy biby ampela iny, fe namonjy azy avao le nivola ty marina. Hoy Jesosy taminy: ‘Soasoava lahy!’

Nisy manam-pahefà mana anara Jairo zay nisoloho tamy Jesosy hoe: ‘Mba miavia an-tranoko any lahy fa marary mafy anakampelako zay!’ Mbo tsy niavy any iaby Jesosy le fa nimaty ajà iny. Lafa niavy amy zay ie, le nahita olo maro namangy ani-fianakavia io. Hoy ty asany: ‘Fa soa zay fa miroro avao anè ie io.’ Bakeo nirambesiny tanani-ajà iny, le nivola ie hoe: ‘Miongaha!’ Niongaky vatany ajà ampela iny. Nivolanini-Jesosy amy zay Jairo morovaly mba hanome hany azy. Azo antoky fa nifalifaly biby rozy tamy zay!