Lafa nimaty Jesosy, le niera tamy Pilato lahilahy mana anara Josefa zay, satria ta hampijotso ani-faty iny baka amy tsato-kazo eny. Nifonosany karazan-damba tena soa sady nisy raha manitsy zay faty iny, bakeo naleviny tamy lolo vaovao namboariny zay tao. Nasiany vato be amy zay ty amy filira amy lolo iny eo. Le hoy sefoni-mpisoro rey tamy Pilato: ‘Matahotsy zahay tsy no hangalarini-mpianatsiny rey ao avao fatini-Jesosy io, bakeo rozy hivola hoe fa nivelo ndraiky ie.’ Le hoy Pilato tamin-drozy: ‘Asio tombo-kase lolo zao, le asio mpiamby.’

Telo andro tafarani-zay, le nisy ampela vitsivitsy nandeha tan-dolo any. Fa nivoha lolo iny tamy zay. Nisy anjely raiky zay tanatiny tao nivola hoe: ‘Ka matahotsy. Fa nivelomy ndraiky Jesosy. Ndany volano mpianatsiny rey fa a Galilia any ty hifakahitan-drozy aminy.’

Nandeha malaky Maria nila ani-Petera noho Jaona. Nivola tamin-drozy ie hoe: ‘Nisy nangalatsy lahy ty fatini-Jesosy.’ Nilay nana an-dolo any amy zay Petera noho Jaona. Fe fa tsy tao sasy ie, farany rozy noly.

Lafa nimpoly an-dolo any ndraiky Maria, le nahita anjely roe. Hoy ty asany tamy anjely rey: ‘Vasa nataon-drozy aia Tompoko zay!’ Bakeo ie nahita lahilahy raiky zay. Ataony fa mpikarakara zariday vasa ie io, ka nanontaneany hoe: ‘Nataonao aia lahy zafady ie?’ Fe nivola lahilahy iny hoe: “Maria!” Avy le nihainy hoe Jesosy io ka hoy ty asany: “Mpampianatsy!” Sady nitanjahiny ie. Le hoy Jesosy taminy: ‘Ndany volano rahalahiko rey hoe nihitanao aho.’ Avy le nandeha tamy mpianatsy rey tany malaky amy zay Maria, le nivolaniny rozy hoe nihitany Jesosy.

Tamy andro iny avao, le nisy mpianatsy roe lahy baka a Jerosalema any. Nandeha a Emaosy any rozy. Lafa tan-dala teny rozy, le namonjy an-drozy lahilahy raiky zay sady nanontany hoe ino raha niresahin-drozy io. Nivola rozy hoe: ‘Mbo tsy nirenao va? Nivonoani- sefoni-mpisoro reo Jesosy, fa telo andro zay. Fe nisy ampela rezay nandroany nivola hoe velo ie.’ Nanontany lahilahy iny hoe: ‘Nareo va  tsy mino raha nivolanini-mpaminany rey? Fa nivola rozy hoe ho maty Kristy, le bakeo hovelomy ndraiky.’ Bakeo nihazavaniny tamin-drozy ty Soratsy Masy. Lafa niavy ta Emaosy ao rozy, le nivolanin-drozy lahilahy iny mba hihina amin-drozy ao. Lafa baka nivavaky ie vo nihain-drozy hoe kay hondy Jesosy io. Nanjavo ie bakeon’iny.

Nandeha malaky tamy apostoly rey ta Jerosalema any mpianatsy roe lahy rey mba hitantara ty raha niseho. Nivory tamy trano raiky zay tao rozy, le tamy zay Jesosy ro niseho tamin-drozy iaby. Mbo tsy nino tse apostoly rey hoe Jesosy io. Fe hoy ty asany: ‘Henteo tanako toy. Mba tsapao moa! Fa voasoratsy anè hoe hovelomy ndraiky Kristy.’