Nilitsy tanatini-sambofiara iny ao ry Noa moroanaky noho ty biby. Bakeo, narindrini-Jehovah varavara iny, le nilatsaky ty ora. Nizinja avao ty ora, ka nanomboky nihafo sambofiara iny. Farany, nidobon-drano tany toy. Nimatimaty iaby olo raty fanahy rey. Fe niavotsy Noa noho ty fianakaviany, satria nanoriky ty safàni- Jehovah. Nifalifaly biby rozy.

Niavy avao ty ora tanatini-40 andro noho 40 haly, le bakeo nijano. Niharìtsy tsikelitsikely rano iny. Nipetraky tanaboni-vohitsy eny amy zay sambofiara iny tamy farany. Fe mbo niatsiky rano tany toy, ka mbo tsy afaky niboaky tse ry Noa.

Niharìtsy niharìtsy avao rano iny. Lasa ty tao raiky. Mbo nijano tanatini-sambofiara iny tao avao ry Noa. Tafarani-zay, le nivola tamin-drozy Jehovah mba hiboaky bakao. Atao ho raha vaovao ty tany tamy zay, satria tsy nisy olo raty sasy. Falifaly biby rozy satria navotani- Jehovah, ka nanao fanatitsy mba hisaora azy.

Nahafalifaly ani-Jehovah fanatitsy iny. Nampitamà ie hoe tsy haripakiny amy ranobe sasy ty raha iaby an-tany etoy. Mba ho famantara amy raha nampitamaniny zay, le nasiany sadiananahary ty amy lanitsy eny. Fa nahita sadiananahary va iha?

Nivola tamy Noa noho ty fianakaviany koa Jehovah mba hiteraky noho hameno tany toy.