Niaro ani-Abrahama noho Isaka avao Jehovah. Nampitamà koa ie fa hiaro ani-Jakoba. Nipetraky tamy tanà atao hoe Harana zay Jakoba, le nanambaly, bakeo nana fianakaviambe ie sady nanjary mpanarivo.

Nivola tamy Jakoba amy zay Jehovah hoe: ‘Molia amy tanindraza- nao any.’ Farany noly Jakoba noho ty fianakaviany. Lavitsy biby lala io. Nisy mpanomponi-Jakoba namonjy azy, le nivola hoe: ‘Bakao Esao ie, le misy 400 lahy miaraky aminy!’ Natahotsy Jakoba tsy no hamango an-drozy moroanaky Esao. Nivavaky tamy Jehovah ie hoe: ‘Arovo lahy aho tsy ho matini-rahalahiko iny.’ Hamarain’iny, le nandefa aondry, aosy, aomby, rameva noho ampondra maro ho ani- Esao Jakoba.

Lafa nihariva ty andro, le nahita anjely Jakoba. Ie raiky avao ty teo tamy zay. Nifampitolo taminy amy zay anjely iny. Teo, le teo avao zisiky maraindray. Tsy nanekineky mihintsy Jakoba ndre fa voa aza. Nivola tamy Jakoba anjely iny hoe: ‘Abotoro aho.’ Fe namaly ie hoe: ‘Aha, tsy engàko iha laha tsy mitso-drano ahy.’

Farany nitso-drano azy anjely iny. Nanjary haini-Jakoba amy zay hoe tsy hengani-Jehovah hamango azy Esao.

Vo maraindray, le hitani-Jakoba lavidavitsy eny Esao miaraky amy lahilahy 400 rey. Nandeha aloha tse Jakoba, le nihohoky impito  talohani-zokiny iny teo. Nilay nana amy Jakoba eny Esao, bakeo nandrakoky azy. Samby nirohaky ty tany rozy mirahalahy, bakeo nilongo soa ndraiky. Niezaky hilongo amy Esao Jakoba. Nahafalifaly ani-Jehovah va ty raha nataony laha ty fahitanao azy?

Noly Esao lafa kanikanin’iny, fa Jakoba nanohy ty liany. Nanan’anakilahy 12 Jakoba. Retoa iaby ty anaran-drozy: Robena, Simeona, Levy, Joda, Dana, Naftaly, Gada, Asera, Isakara, Zebolona, Josefa, Benjamina. Nampiasani-Jehovah ty raiky amin-drozy mba hanavota ty vahoakiny. Tsy ia zay fa Josefa. Hainao va hoe ino ty nataony? Ndao hodinihintsika zay.