Tam-prizon tao Josefa tamy zay. Nanonofy Farao mpanjakani- Ejipta, fe tsy nisy nahay ty dikani-nofiny io. Nivola tamy Farao amy zay ty mpanompony raiky hoe ie koa nanonofy, fe nihaini-Josefa ty dikany. Avy le naniraky olo Farao hangalaky ani-Josefa.

Nivola Farao hoe: ‘Mba hazavano amiko hoe nofiko zay!’ Namaly Josefa hoe: ‘Hana hany maro biby Ejipta anatini-7 tao, bakeo hisy kerè 7 tao koa. Mitingina olo hendry raiky hanajary hany, soa tsy ho maty mosary eto ty olo.’ Le hoy Farao: ‘Iha ty filiko! Iha ty ho lahilahy manam-pahefà manarakaraky ahy!’ Akory hoasanao ty nahaizani- Josefa nofini-Farao io? Nampeani-Jehovah ie.

Nanajary hany Josefa tanatini-7 tao tafarani-zay. Bakeo nisy kerè tamy tany toy iaby, araky ty fa nivolanini-Josefa. Niavy iaby ty olo hivily hany tamy Josefa teo. Naharè babany hoe nisy hany ta Ejipta tany, farany nirahiny hivily any koa ty anakiny folo.

Nana amy Josefa any anakini-Jakoba rey. Avy le nihaini-Josefa rahalahiny rey, fa rozy ro tsy nahay azy. Niankohoky taminy teo rozy, manahaky ninofisiny tamin’ie mbo nikely iny. Teani-Josefa ho hay laha mba fa niova zokiny rey, ka nivola ie hoe: ‘Mpisafo tany nareo. Niavy nareo soa hanenty hoe aia ty azo anafiha anay.’ Nivola rozy hoe: ‘Tsy zay! Baka Kanana any zahay. Nisy 12 mirahalahy zahay, fe nimaty ty raiky, fa azy faralahinay iny miaraky amy babanay ao.’ Le hoy Josefa: ‘Andeso atoy faralahinareo zay, zay aho vo hino anareo.’ Nandeha noly amy zay rozy.

 Lafa nilany ndraiky ty hany tamin-dry Jakoba ao, le nirahiny himpoly a Ejipta any anakiny rey. Nandesin-drozy tamy zay Benjamina, azy faralahin-drozy iny. Mana kôpy volafoty zay Josefa. Ta hitsapa ani-rahalahiny reo ie, ka navoniny tanaty gonini-Benjamina tao kôpy io, bakeo nasarany hoe nangalariny. Nitaitsy rahalahiny rey lafa nihita tamy gonini- Benjamina tao kôpy iny. Nisoloho tamy Josefa rozy hoe aleo rozy ro sazỳ fa tsy Benjamina.

Haini-Josefa amy zay hoe fa niova rahalahiny reo. Tsy nitanjakiny sasy ty ainy, fa nirohaky ty tany ie sady nivola hoe: ‘Zaho anè Josefa rahalahinareo iny. Mbo velo va babako zay?’ Nitampoky ani- rahalahiny rey vatany raha zay ka hoy Josefa: ‘Ka atao mampalahelo anareo raha nataonareo tamiko iny. Hanavotsy anareo ty nandefasa- Ndranahary ahy atoy. Ndany mana amy baba any malaky, le andeso bakao ie.’

Noly rozy, le nitantara ani-vaovao soa rey tamy baban-drozy, bakeo nandesin-drozy a Ejipta any ie. Ela ty ela ka tafiaraky ndraiky Josefa noho babany.