Tsy ela tafarani-zay, le nanohitsy ani-Mosesy noho Arona ry Kora noho Datana voho Abirama. Nisy 250 koa niaraky tamin- drozy. Nivola rozy hoe: ‘Fa entsaky anareo zahay! Miaraky amintsika iaby anè Jehovah fa tsy raha aminareo roe amy Arona avao. Ka nanino ro iha avao ro mitariky anay sady Arona ro mpisorobe?’ Tsy nahafaly ani-Jehovah raha zay. Sahala manohitsy azy ty fahitany an-drozy!

Hoy Mosesy tamy Kora noho azy niaraky aminy rey: ‘Miavia amy tranolay masy any hamaray, miaraky amy ty fandesa afonareo, le asio emboky manitsy. Hatoroni-Jehovah antsika ze olo hofiliny.’

Niavy tamy tranolay masy tany Kora noho lahilahy 250 rey, hamarain’iny, mba hahita ani-Mosesy. Nandoro emboky manitsy rozy. Le atao raha mpisoro io rozy. Nivola tamy Mosesy noho Arona amy zay Jehovah hoe: ‘Ka miharìny an-dry Kora noho lahilahy miaraky aminy reo nareo.’

Tsy nahefa niaraky tamy Kora tamy tranolay masy tany ry Datana, Abirama, noho ty fianakavian-drozy. Nitsanga tamontoni-tranolain-drozy teo avao rozy. Nivola tamy Israelita rey Jehovah mba tsy hiharìny ty tranolain-dry Kora, Datana, noho  Abirama. Avy le nisitasitaky Israelita rey. Tampoky teo le nitresaky tany iny, le nilatsaky ambany tany any ry Datana noho Abirama miaraky amy ty fianakavian-drozy! Nisy afo nilatsaky koa ty tamy tranolay masy tany, le nimatimaty Kora noho lahilahy 250 niaraky taminy rey.

Nivola tamy Mosesy amy zay Jehovah hoe: ‘Mangalà fitono raiky baka amy mpitariky foko kiraidraiky, le sorato eo ty anarany. Fe ty anarani-Arona ro sorato amy fitono baka amy fokoni-Levy. Apetraho amy tranolay masy ao amy zay raha rey. Hitiry folera ty fitononi-ze hofiliko.’

Naboakini-Mosesy iaby amy zay fitono rey, hamarain’iny, le natorony ani-mpitariky rey. Fitononi-Arona iny raiky avao ro nitiry folera sady nisy voankazo masaky. Voaporofo tamy zay hoe Arona ro nifilini-Jehovah ho mpisorobe.