Nivola tamy Mosesy Jehovah hoe: ‘Miakara amiko am-bohitsy etoy ndraiky. Hisy lalàna hosoratiko amy vato pisaky, le hameako anao.’ Niakatsy tam-bohitsy eny Mosesy, le nijano teny 40 andro noho 40 haly. Nisoratini-Jehovah tamy vato pisaky roe ty Didy Folo tamy zay, le nameany ani-Mosesy.

Lafa elaela tany Mosesy, le nieritseritsy Israelita reo hoe nengany rozy. Nivola tamy Arona amy zay rozy hoe: ‘Mila olo hafa hitariky anay zahay. Anamboaro ndranahary zahay.’ Le hoy Arona: ‘Ameo bakao moa ty volamenanareo.’ Natranakiny amy zay raha rey le namboarany sarivongana anak’aomby. Le hoy olo rey: ‘Anak’aomby toy azy Ndranaharintsika nitariky antsika baka a Ejipta any iny!’ Nivavaky tamy anak’aomby volamena iny rozy sady nanao fety. Tena raty raha nataon-drozy zay, satria fa nampitamà ani-Jehovah rozy hoe Jehovah raiky avao ro hivavahan-drozy. Tsy nataon- drozy raha nampitamanin-drozy iny.

 Nihitani-Jehovah raha nataon-drozy io ka nivola tamy Mosesy ie hoe: ‘Ndany mijotso fa mivaliky amiko vahoaky rey. Mivavaky amy ndranahary hafa rozy ao.’ Nijotso Mosesy nanday ani-vato pisaky roe rey.

Lafa nariniriny Mosesy, le naharè an’olo rey nihirahira. Nihitany koa rozy nitsinjatsinjaky noho niankohoky tamy anak’aomby iny. Neloky biby Mosesy. Natontany an-tany eo vato pisaky rey, le nivakivaky. Avy le nipotepotehiny koa sarivongana iny. Nanontany ani-Arona amy zay ie hoe: ‘Le naneky avao iha laha nampanovini-vahoaky reo raha manahaky ani-toy?’ Le hoy Arona: ‘Ka meloky iha. Hainao avao vahoaky retoa. Nila ndranahary rozy, le natorako tanaty afo tao volamenan-drozy rey, le io ty niboaky bakao!’ Tena tsy mety raha nataoni-Arona io. Nana amy vohitsy iny eny ndraiky Mosesy, le nangataky ani-Jehovah mba hanenga ty hadisoani-vahoaky iny.

Tsy nihelofani-Jehovah sasy ze nanoriky ty safàny. Fe tena nila nanoriky ty safàni-Mosesy koa rozy, satria ie ro nitariky an-drozy.