Nanan’anakilahy roe Ely Mpisorobe. Tsy ia zay fa Hofinia noho Finehasa. Samby mpisoro tamy tranolay masy tao rozy roe lahy. Raty fanahy rozy sady tsy nanoriky ty lalànani-Jehovah. Lafa nanatitsy biby hatao soro ho ani-Jehovah Israelita reo, le nalani-Hofinia noho Finehasa ho an-drozy ty hena farani-ze soa. Naharè mikasiky ty raha tsy nety nataoni-anakilahiny reo avao Ely, fe tsy mba nanasazy an-drozy. Nengani-Jehovah amy zao avao va raha zay?

Mbo nikely Samoela tamy zay, fe tsy nanahaky ani-Hofinia noho Finehasa. Nahafalifaly ani-Jehovah ty raha nataoni-Samoela. Lafa niroro ie ndraiky haly zay, le naharè feo nikaiky azy. Nifoha ie, bakeo nilay nana amy Ely any. Le hoy ty asany: ‘Akory zay?’ Namaly Ely hoe: ‘Ndany miroro fa tsy nikaiky anao aho.’ Nandeha niroro ndraiky Samoela. Bakeo nisy nikaiky ndraiky ie. Lafa nisy nikaiky azy fanintelony, le nihaini-Ely hoe Jehovah nikaiky azy io. Nivolanini-Ely amy zay Samoela hoe laha mbo misy mikaiky ndraiky iha, le ataovo ho zao hoe: ‘Mivolana Jehovah, fa mijanjy mpanomponao toy.’

Niroro amy zay ndraiky Samoela. Bakeo nisy feo reny nanao ho zao: ‘Samoela! Samoela!’ Namaly ie hoe: ‘Mivolana, fa mijanjy anao mpanomponao toy.’ Nivola Jehovah hoe: ‘Ambarao ani-Ely fa hosaziko ie miaraky amy ty fianakaviany. Hainy fa manao raha raty  amy tranolaiko masy ato anakilahiny reo, fe tsy nanasazy an-drozy ie.’ Lafa niavy ty maraindray, le nanao ty asa fataony sanandro avao Samoela. Nivohàny varavarani-tranolay masy iny. Mbo tsy nisakiny volany tamy mpisorobe iny ty raha nivolanini-Jehovah. Fe nikaiky azy Ely, le nanontany azy hoe: ‘Ino aka ty raha nivolanini-Jehovah taminao? Volano iaby fa ka avonivony.’ Farany nivolanini-Samoela amy Ely iaby raha rey.

Nampeani-Jehovah avao Samoela lafa nihabe. Nanjary nihain’Israelita iaby amy tany iny fa nifilini-Jehovah ho mpaminany noho mpitsara Samoela.