Nisy lahilahy Israelita mana anara Elkana zay nanambaly roe. Hana noho Penina anarani-valiny reo, fe Hana ty teany marè. Nikizakizahini- Penina avao Hana satria tsy nanan’anaky. Nizesta Penina fa nanan’anaky maro. Nandesini-Elkana tamy tranolay masy ta Silo any avao valy amin’anakiny reo santao, mba hivavaky amy Jehovah. Niavy ta Silo any rozy ndraiky zay. Nihitani-Elkana hoe nalahelo biby Hana, le nivolaniny hoe: ‘Hana, fa soa moa zay! Zaho fa ahinao. Sady zaho tena tea anao!’

Tsy niaraky amin-drozy eo Hana tafarafarani-zay, fa nivavaky. Nitany avao ie sady nangataky fanampea tamy Jehovah. Nampitamà ani-Jehovah ie hoe: ‘Laha zaho ameanao anakilahy, le hameako anao ie ka hanompo anao zisiky farany.’

Nataoni-Ely Mpisorobe ho mamo Hana, lafa nihitany nikofìkofìky ty tany. Fe nivola Hana hoe: ‘Aia koa lahy! Tsy mamo zao aho. Miresaky amy Jehovah aho satria misy raha manahira ahy marè zay.’ Lafa nihaini-Ely hoe tsy mamo vatany Hana, le hoy ty asany: ‘Hameani- Jehovah anao lahy ty raha nangatahi- nao.’ Nandeha amy zay Hana, sady tsy nalahelo sasy. Tsy ampy tao raiky tafarani-zay, le niteraky anakilahy ie. Samoela ty anarany. Azo antoky fa nifalifaly biby Hana tamy zay!

 Tsy nihalinoni-Hana raha nampitamaniny ani-Jehovah iny. Lafa tsy ninono sasy Samoela, le nateriny amy tranolay masy any. Hoy ty asany tamy Ely: ‘Toy ajà nangatahiko tamy Jehovah iny. Ameako ani-Jehovah ie mba hanompo azy zisiky farany.’ Nandeha namangy ani-Samoela ry Elkana noho Hana santao, le nandesan-drozy akanjo vaovao ie. Akanjo lava tsy misy tanany raha io. Nameani-Jehovah anakilahy telo noho anakampela roe koa Hana tafarani-zay.