Maro ty mpanjaka raty fanahy tamy fanjakàni-Israely teo, fe Ahaba ro niraty marè. Nanambaly ampela raiky mpivavaky amy Bala zay ie. Jezebela ty anarani-ampela raty fanahy biby io. Nampivavahin-drozy morovaly tamy Bala ty olo, le nivonoan-drozy iaby ty mpaminanini- Jehovah. Ino ty nataoni-Jehovah? Nirahiny ho amy Ahaba any Elia mpaminany.

Hoy Elia tamy Ahaba Mpanjaka: ‘Tsy hisy ora mihintsy Israely, satria raty fanahy iha.’ Tsy nisy ora vatany tanatini-3 tao eo ho eo, ka tsy nitiry iaby ty raha nambolè. Nimosarè ty olo. Tafarani-zay, le nampimpolini-Jehovah tamy Ahaba any ndraiky Elia. Le hoy Ahaba: ‘Iha avao nahavy loza toy io!’ Namaly Elia hoe: ‘Tsy zaho mihintsy io, fa ty fivavahanao amy Bala. Ndao avorio amy Vohitsy Karmela eny iaby ty olo miaraky amy mpaminanini-Bala rey, le hohenteantsika ty marina.’

Nivory tamy vohitsy teny iaby ty olo. Nivola Elia hoe: ‘Ka misalasala nareo. Laha Jehovah ro Ndranahary marina, le manaraha azy. Fa laha Bala ro ie, le manaraha azy. Zao ty hataontsika. Manaova fanatitsy nareo mpaminanini-Bala 450 reo, le kaiho ty ndranaharinareo. Hanao fanatitsy koa aho le hikaiky ani-Jehovah. Ka ze ndranahary mamaly ka mandefa afo, le ie ro Ndranahary marina.’ Naneky iaby ty olo.

Nanoma fanatitsy amy zay mpaminanini-Bala rey. Bakeo rozy nikaikaiky ty ndranaharin-drozy manomboky maray le zisiky hariva hoe: ‘Nao lahy Bala, mba valeo zahay!’ Tsy namaly mihintsy Bala, ka nikizakizahini-Elia rozy hoe: ‘Kaiho marè. Mety mbo miroro vasa ie, ka mila olo hamoha azy.’ Mbo nikaikaiky teo avao rozy ndre fa hariva aza ty andro. Fe tsy namaly an-drozy Bala.

Nataoni-Elia tanaboni-alitara teo koa ty fanatitsiny, le nilinany rano maro biby. Bakeo nivavaky ie hoe: ‘Mba anovo hain’olo retoa lahy Jehovah fa iha ro Ndranahary marina.’ Avy le nandefa afo baka an-danitsy any Jehovah ka nandoro ani-fanatitsy iny. Nitaitsy iaby olo rey ka nanao hoe: ‘Jehovah ro Ndranahary marina!’ Le  hoy Elia: ‘Ao tsy hilay mpaminanini- Bala reo!’ Nivonoa iaby mpaminanini- Bala 450 rey tamy andro iny.

Laha vo nisy rahona kelikely tanaboni-riaky teny, le hoy Elia tamy Ahaba: ‘Ho latsaky marè ora toy fa ndany iha moly. Andeso malaky kalesinao ’o.’ Nifeno rahona mainty lanitsy iny, le nisy tsioky marè biby, bakeo nilatsaky amy zay ty ora. Ela ty ela ka nisy ora avao! Nandesini-Ahaba marè biby kalesiny iny. Nampeani- Jehovah Elia ka nahalay mandilatsy ani-kalesy iny! Hilamy amy zay va zao ty fiainani-Elia? Handiniky ani-zay tsika henanizao.