Josafata henanizao ty mpanjakani-Joda. Nipotehiny iaby ze kila alitara na sarini-Bala tamy tany iny. Teany laha mahay ty lalànani- Jehovah ty vahoaky, ka nirahiny ty andriana noho ty Levita soa hampianatsy an-drozy.

Tsy nahasaky nanafiky ani-Joda ty tanà mariniriny mbeny, satria hain-drozy fa miaro ani-vahoakiny reo Jehovah. Nanateran-drozy kadò mihintsy aza Josafata Mpanjaka. Fe bakeo niavy ty Moabita noho ty Amonita, voho ty olo baka amy faritsy be vohitsy a Seira any mba hialy amy Joda. Haini-Josafata hoe tena nila ani-Jehovah rozy, ka navoriny ta Jerosalema ao iaby ty lahilahy, ty ampela, noho ty ajà. Bakeo ie nivavaky ho zao: ‘Jehovah Ndranaharinay! Ho resy zahay laha tsy ampeanao. Ka ino ty tokony hataonay?’

Namaly Jehovah hoe: ‘Ka matahotsy fa hampeako nareo. Samby mangalà pilasy iaby nareo le mitsangana soa avao. Ho hitanareo fa havotako nareo.’ Ino amy zay ty raha niseho?

Lafa hiala a Jerosalema any rozy hamarain’iny, le nisy mpihira maromaro nampandehanini-Josafata talohani-maramila rey eo. Nandeha zisiky a Tekoa any rozy, satria any hialia io.

Nifalifaly biby mpihira rey sady nihira marè biby mba hiderà ani- Jehovah. Tamy fotoa zay mihintsy Jehovah ro nialy ho ani-vahoakiny rey. Nakorontani-Jehovah Amonita noho Moabita rey, le rozy samby rozy avao ro nialy. Nimatimaty iaby rozy. Fe narovani-Jehovah ty vahoaky, ty maramila, noho ty mpisoro iaby baka a Joda any. Niren’olo iaby mbamy tanà marìny mbeny ty raha nataoni-Jehovah, sady nihain-drozy hoe mbo miaro ty vahoakiny avao Jehovah. Ino ty ataoni-Jehovah lafa manavotsy ty vahoakiny? Maro ty raha ataony, sady tsy mila olo hanampy azy ie.