Niada ty Israelita tamy Solomona mbo nanompo ani-Jehovah. Fe niova tsikelitsikely ie lafa nanambaly ampela maro hafa firenena. Nanjary nanompo sampy ie. Neloky Jehovah, ka nivola taminy hoe: ‘Halàko aminao noho ty anakinao ty fanjakàni-Israely, le hozarako roe. Tampany kelikely avao ro ho ahi-ty anakinao fa ty tampany bevata ho ahi-ty mpanomponao.’

Mbo nisy raha hafa koa nataoni-Jehovah. Nandeha lavitsy ty mpanomponi-Solomona raiky atao hoe Jeroboama, ndraiky andro. Lafa nahita azy tan-dala teny Ahia mpaminany, le namotaky akanjo. Bakeo nizarazarany 12 akanjo iny. Nivola tamy Jeroboama amy zay ie hoe: ‘Halàni-Jehovah amy Solomona noho ty anakiny ty fanjakàni- Israely, le hozarany roe. Mangalà folo amy retoa iha satria iha ro ho mpanjakani-foko folo.’ Neloky Solomona lafa naharè ani-zay ka teany ho nivonoa Jeroboama. Farany Jeroboama nilay nana a Ejipta any. Nimaty Solomona tafara atoy, ka Rehoboama anakilahiny ro nisolo azy. Nimpoly tan’Israely any amy zay Jeroboama.

Nivola tamy Rehoboama ty anti-panahini-Israely hoe: ‘Tsy hivaliky aminao mihintsy vahoaky reo laha ampiadaninao.’ Fe  hoy ty mpamaraky nama-Rehoboama: ‘Ka mandefitsy zao! Ampanovo asa mafy rozy!’ Nanaraky ty torohevitsini- namany rey Rehoboama. Nampijali- jaliny vahoaky rey, farany nanohitsy azy. Nizara roe amy zay fanjakà iny. Nataon-drozy mpanjakani-foko folo tamy Israely teo Jeroboama. Fanjakàni-Israely ty fikaiha fanjakà io. Rehoboama ty mpanjakani-foko roe ambiny, azy kaihy hoe fanjakàni-Joda iny.

Anatini-faritsy andesini-Rehoboama io Jerosalema. Mandeha any ty olo iaby lafa hivavaky, ndre azy baka amy fanjakàni-Israely rey any aza. Tsy teani-Jeroboama raha zay. Hainao va ty antony? Natahotsy Jeroboama hoe hivaliky aminy vahoakiny reo, le hanoha ani-Rehoboama ndraiky. Farany ie namboatsy anak’aomby volamena roe, le nivolaniny olo rey hoe: ‘Aleo mivavaky etoa avao nareo, fa lavitsy loatsy ty a Jerosalema any.’ Lasa nivavaky tamy anak’aomby volamena rey amy zay vahoaky rey, ka nihalinon-drozy ndraiky Jehovah.