Asyrianina ty olo nipetraky ta Ninive tao. Raty fanahy biby rozy. Nirahini-Jehovah ta Ninive tany amy zay Jona, soa hivola amin-drozy hoe mila miova rozy. Fe lala hafa ro nombani-Jona. Nandeha sambo ie, le nilay nana Tarsisy any.

Lafa tan-driaky eny sambo iny, le nisy ora noho tsioky marè biby, sady nisy varatsy iaby. Navaka biby mpiasan-tsambo rey ka samby nivavaky tamy ty ndranaharin-drozy sady nifanontany hoe: ‘Fa misy ino?’ Farany Jona nivola tamin-drozy hoe: ‘Zaho ’o! Tsy nanoviko raha nampanovini-Jehovah ahy zay fa nilay aho. Atoraho an-driaky any aho, amy zay hijano andro raty toy.’ Nanaly tsy nahefa tse mpiasan- tsambo rey, fe tsy nety Jona. Laha vo natorakin-drozy any amy zay ie, le nieny andro raty iny.

Lafa nilentiky an-driaky any Jona, le nivavaky tamy Jehovah. Ataony fa ho nimaty vasa ie io! Nisy fia bevata biby zay amy zay nalefani-Jehovah. Natelini-fia iny Jona, fe tsy nimaty. Nivavaky ndraiky ie lafa tanatini-fia iny tao hoe: ‘Ao fa hataoko iaby ze raha volaninao.’ Narovani-Jehovah avao ie ka tsy nimaty. Telo andro ie tanatini-fia iny tao avao. Tafarani-zay, le naloani-fia iny tan-tety eny ie.

Fa tsy nila nandeha ta Ninive tany sasy va Jona lafa niavotsy? Mbo nirahini-Jehovah nanany ndraiky ie. Nandeha vatany ie tamy zay, le nivolaniny ty olo tany hoe: ‘Ho rava Ninive lafa afaky 40 andro.’  Nahatseriky fa nijanjy azy ty olo ta Ninive tao ka niova. Nivola ho zao ty mpanjakan-drozy: ‘Ndao hivavaky amy Ndranahary, le ndao hiova. Vasa mba tsy haripakiny avao tsika.’ Tsy niravani-Jehovah Ninive lafa nihitany hoe niova olo rey.

Neloky Jona lafa tsy niravà Ninive. Mba eritsereto tse moa! Nandeferani-Jehovah ie, le niferinesani-Jehovah koa, fe ie tsy niferinay ty olo ta Ninive tao. Ino ty nataony? Niankenjy ie ka niboaky ivelani-tanà iny any, le nialoky tambanini-hazo raiky zay. Fe nimaty hazo iny, ka nimeloky Jona. Le hoy Jehovah taminy: ‘Aleonao zany hazo ’o ro velo tozay ty olo a Ninive ao. Niferinesako rozy le zay tsy nahafaty an-drozy io.’ Ino ty teani-Jehovah hovolany? Ta hivola Jehovah hoe mbo vatan-draha mandilatsy ty hazo ty olo ta Ninive tao.