‘Tokony ho mpampianatsy nareo.’ (Heb. 5:12) Tena miavaky safà zay! Jehovah mihintsy ro manasa antsika hampianatsy mikasiky azy, kanefa ie ro Mpampianatsy farani-ze soa amy kila raha iaby! Tombontsoa lafovily noho andraikitsy bevata ty hoe mampianatsy ty marina mikasiky ani-Jehovah, ndre amy fianakavia eo zay, ndre amy fiangona eo, ndre amy fanompoa an-tonda eny. Akory ty hahavitantsika ani-raha io?

Mamaly ani-zay ty safà nisoratini-apostoly Paoly ho ani-Timoty hoe: “Miezaha marè amy vakiteny ankavoria, amy fananara, amy fampianara.” Bakeo nitohizany hoe: “Laha manao ani-zay iha, le hanavotsy ty vatanao noho ze mijanjy anao.” (1 Tim. 4:13, 16) Manavotsy ain’olo ty hafatsy andesinao, ka tena mila miezaky iha mba hanasoa ty fahaizanao mamaky teny noho mampianatsy. Hanampy anao hanao ani-zay bokikely toy. Retoa ty raha sisany anatiny ato:

Jehovah ro “Mpampianatsy Be Voninahitsy.” (Isa. 30:20) Hanampy anao hanasoa ty fahaizanao mamaky noho mampianatsy bokikely toy, fe ka halino mihintsy fa baka amy Jehovah ty hafatsy andesintsika sady ie ro mitao ty olo hamonjy azy. (Jaona 6:44) Ka soa laha mangataky fanahy masy aminy matetiky iha. Ampiasao avao ty Safà-Ndranahary. Ampifantoho amy Jehovah avao ty sain’olo, fa tsy amy ty vatanao. Anovo ze azonao atao mba ho tena tea ani-Jehovah amy fony ty mpijanjy anao.

Nahazo fanasà hampianatsy ani-hafatsy farani-ze bevata namea ty olombelo iny iha. Matoky zahay fa lafa miantehitsy “amy hery amea-Ndranahary iny” iha, le ho vitanao raha zay.—1 Pet. 4:11.

Zahay mpampianatsy namanao,

Ty Filan-kevi-pitantanani-Vavolombeloni-Jehovah