Natao Jehovah ho firenena raiky ty taranaky Abrahama, bakeo nameany lalàna. Nikaihiny hoe ‘Israely’ firenena io. Nataony ho mpiaro ty fivavaha marina noho ty safany rozy. (Salamo 147:19, 20) Afaky nahazo raha soa koa ty firenena hafa lafa tafara atoy.—Vakio Genesisy 22:18.

Finily Ndranahary ho vavolombelony Israelita reo. Nilamy soa rozy lafa nanoriky ty lalà Ndranahary. Hana fiaina soa koa ze manoriky raha soa nataon-drozy zay. (Deoteronomia 4:6) Nanjary nahay Ndranahary ty olo hafa, lafa nandiniky mikasiky ty Israelita.—Vakio Isaia 43:10, 12.

Nihala Jehovah ty raha nanovy Israelita reo lafa tafara atoy. Ty fiangona kristiana ndraiky ro nasolony an-drozy. (Matio 21:43; 23:37, 38) Misy Kristiana marina henanizao nasolo Jehovah Israelita reo, soa ho vavolombelony.—Vakio Asan’ny Apostoly 15:14, 17.

Nalamy Jesosy ty mpanoridia azy soa hitory noho hampianatsy amy tany toy iaby. (Matio 10:7, 11; 24:14; 28:19, 20) Sisa kely le ho vita asa fitoria io, satria fa andro farany henanizao. Olo an-tapitrisany baka amy tany toy iaby ro miaraky manompo Jehovah. Mbo tsy nisy raha manahaky zay mihitsy bakany zay. (Apokalypsy 7:9, 10) Voalamy soa ty Kristiana marina sady mifanampy noho mifanome hery tsy ho kivy. Manaraky fianara Baiboly mitovy avao rozy, amy fivoria anovin-drozy, ndre aia ndre aia ty misy an-drozy.—Vakio Hebreo 10:24, 25.

Tafara 1870 ro nanomboha ty Vavolombelo Jehovah amy andro henanizao. Tsy nihay sasy ty raha marina tamy Baiboly ao tamy fotoa io. Fe nisy olo vitsivitsy niaraky nianatsy Baiboly, ka nihain-drozy ty marina. Nanjary nihain-drozy fa nalamy Jesosy ty fiangona kristiana soa hahavita ty asa fitoria. Zay ro nahavy an-drozy nanomboky nitory mikasiky Fanjakà Ndranahary io amy tany toy iaby. Tamy 1931 rozy vo nandramby ty anara hoe Vavolombelo Jehovah.—Vakio Asan’ny Apostoly 1:8; 2:1, 4; 5:42.

Fa nisy fiangona maro tamy taonjato voalohany. Jesosy ro loha ty fiangona, fe nampiasa apostoly noho anti-panahy vitsivitsy ie, soa hitariky ty asa. (Asan’ny Apostoly 16:4, 5) Misy anti-panahy vitsivitsy mahay koa henanizao mitariky ty asa anovy ty Vavolombelo Jehovah amy tany toy iaby. Filan-kevi-pitantana ro ikaiha an-drozy. Mampiboaky boky noho gazety misy fianara mifototsy amy Baiboly ty Filan-kevi-pitantana. Adika amy fivolana 600 mahery boky reo. Bakeo atao pirinty amy birao ty sampana any. Ty Filan-kevi-pitantana ro manao ze hampandeha soa raha iaby reo. Midika raha zay fa manome hery noho torohevitsy soa baka amy Baiboly, ho ahy ty fiangona 100 000 mahery an-tany etoy ty Filan-kevi-pitantana. Misy lahilahy voafily, kaihy hoe anti-panahy amy fiangona kiraidraiky. Mikarakara soa ty aondry Ndranahary rozy reo.—Vakio 1 Petera 5:2, 3.

Voalamy soa ty Vavolombelo Jehovah, soa hitory ty vaovao soa noho hanao mpianatsy. Mamonjy olo an-trano rozy lafa mitory, manahaky ty natao apostoly reny. (Asan’ny Apostoly 20:20) Ampianarin-drozy Baiboly koa ze olo ta hianatsy. Tsy hoe olo mpiaraky mivavaky avao ty Vavolombelo Jehovah. Fa manahaky olo trano raiky io rozy, ka Jehovah ro baban-drozy. Mifankatea koa rozy satria mpirahalahy noho mpianabavy. (2 Tesalonianina 1:3) Sambatsy noho falifaly avao rozy, satria manao ze raha tea Jehovah noho manampy olo sady voalamy soa ty raha anovin-drozy.—Vakio Salamo 33:12; Asan’ny Apostoly 20:35.