Fianara 2
Ia Ndranahary Zao?
1. Manino tsika ro mila mivavaky aminy?
Azy Ndranahary marina iny ro Namoro kila raha iaby. Tsy nana fiatomboha ie sady ho eo avao ie zisiky farany. (Salamo 90:2) Baka aminy iaby kila vaovao soa hita amy Baiboly ao reo. (1 Timoty 1:11) Mila mivavaky aminy tsika satria ie raiky avao ro nanome fiaina antsika.—Vakio Apokalypsy 4:11.
2. Manao akory Ndranahary zao?
Fanahy Ndranahary, ka tsy misy olo afaky mahita azy. Midika raha zay fa anabo karaza mandilatsy ty vatanolo ty vatany. (Jaona 1:18; 4:24) Fe ndre tsy hita ie, le afaky mahay azy soa tsika lafa mandiniky ty raha niforoniny. Laha hentea ohatsy ty folera noho hazo sankarazany manahaky manga noho tsoha io, le hita fa hendry noho be fitiava ie. Mana hery faratampony koa ie kanao nahavita namoro basia noho lanitsy reo.—Vakio Romanina 1:20.
Ho haintsika soa koa Ndranahary lafa mamaky Baiboly tsika. Volaniny amintsika ao ohatsy hoe, ino ty raha teany noho ino ty raha tsy teany. Manao akory ty fandaisany ty olo. Manao akory ie lafa misy raha sankarazany miseho.—Vakio Salamo 103:7-10.
3. Mana anara va Ndranahary?
Nivola Jesosy hoe: ‘Babanay an-danitsy any, hohamasiny lahy ty anaranao.’ (Matio 6:9) Maro ty anaram-boninahitsy ikaiha Ndranahary, fe raiky avao ty anarany. Jehovah anarany zao.—Vakio Salamo 83:18.
Maro ty Baiboly tsy ahità anara Ndranahary io. Nisoloa hoe Tompo na Ndranahary anara io. Tamy vo nisoraty ty Baiboly, le nimpolipoly tao im-7000 ty anara hoe Jehovah. Nambara Jesosy olo anara Ndranahary io lafa nampianatsy mikasiky Ndranahary ie.—Vakio Jaona 17:26.
Henteo ty video hoe Mana Anara va Ndranahary?
4. Tsy midary antsika va Ndranahary?
Mitovy amy Baba soa fanahy io Ndranahary. Hitany ty fijaleantsika
Olo maro ro mijaly, midika va raha zay fa tsy midary antsika Ndranahary? Maro ty olo mivola fa fitsapà baka aminy fijalea mahazo antsika reo. Fe diso raha zay.—Vakio Jakoba 1:13.
Tea Ndranahary ty olo kiraidraiky. Nengàny hifily ze raha teantsika hatao tsika. Falifaly tsika fa afaky mifily ty hanompo azy. Sa tsy zay? (Josoa 24:15) Fe maro ty olo ro mifily hanao raha raty, ka manjary maro ty olo mijaly. Malahelo Jehovah lafa mahita raha ho zay.—Vakio Genesisy 6:5, 6.
Mikarakara antsika Jehovah. Teany ho sambatsy tsika. Sisa kely le hataony tsy misy sasy ty fijalea noho ze raha mahavy raha io. Misy dikany kanao mbo engàny hisy ty fijalea. Ho hitantsika amy fianara faha-8 ao ty dika raha zay.—Vakio 2 Petera 2:9; 3:7, 13.
5. Manao akory ty hamonjeantsika Ndranahary?
Afaky mamonjy Ndranahary tsika lafa miresaky aminy amy vavaky. Teany hataontsika raha zay. Ataony ze hahasoa antsika kiraidraiky. (Salamo 65:2; 145:18) Tsy mità heloky ie. Hainy lafa miezaky hampifaly azy tsika, ndre misy raha tsy mety ataontsika aza kindraiky. Ka ndre mpanota aza tsika, le azo atao ty mifandramby soa amy Ndranahary.—Vakio Salamo 103:12-14; Jakoba 4:8.
Jehovah ro nanome fiaina antsika. Ie ro mila teantsika marè mandilatsy ty olo hafa. (Marka 12:30) Laha mianatsy mikasiky Ndranahary noho manao ze raha ilàny iha, le midika raha zay fa teanao ie. Mamonjy azy iha laha manao raha reo.—Vakio 1 Timoty 2:4; 1 Jaona 5:3.
