Fianara 7
Ino Fanjakà Ndranahary Zao?
1. Ino Fanjakà Ndranahary zao?
Nanino Jesosy ro Mpanjaka farany ze soa?—MARKA 1:40-42.
Fanjakà an-danitsy any Fanjakà Ndranahary zao. Handrava ze kila fanjakà an-tany etoy Fanjakà io. Hanao ty sitrapo Ndranahary an-danitsy any noho an-tany etoy raha io. Sisa kely le hanome ze raha ilà ty olombelo Fanjakà io. Hahavy kila olo iaby an-tany etoy hifankatea koa ie. Vaovao soa vatany raha zay.—Vakio Daniela 2:44; Matio 6:9, 10; 24:14.
Ia ro ho mpanjaka Fanjakà io? Nifily Jesosy ho Mpanjaka Fanjakany io Jehovah.—Vakio Apokalypsy 11:15.
Henteo ty video hoe Ino Fanjakà-Ndranahary Zao?
2. Nanino Jesosy ro Mpanjaka farany ze soa?
Mpanjaka farany ze soa Jesosy satria soa fanahy, tea raha mahity. (Jaona 1:14) Mana hery hanampea olo koa ie satria handay tany toy baka an-danitsy any. Lafa novelomy Ndranahary ie, le niakatsy an-danitsy any, le nipetraky noho nandiny tamy tana havana Jehovah teo. (Hebreo 10:12, 13) Natao Jehovah Mpanjaka ie lafa tafara atoy.—Vakio Daniela 7:13, 14.
3. Ia ro handay miaraky amy Jesosy?
Misy olo maromaro volany ty Baiboly hoe ‘olo masy’ hiaraky handay amy Jesosy an-danitsy any. (Daniela 7:27) Ia rozy reo? Ze apostoly tsy niala tamy Jesosy ro finily voalohany tamy olo reo. Mbo mifily lahilahy noho ampela ho olo masy manahaky reo koa Jehovah zisiky henanizao. Hovelomy ho an-danitsy any hana vata fanahy manahaky Jesosy koa rozy.—Vakio Jaona 14:1-3; 1 Korintianina 15:42-44.
Olo firy ro hiakatsy an-danitsy any? Kaihy Jesosy hoe ‘aondry vitsy’ ze olo handay tany toy miaraky aminy. (Lioka 12:32) Hisy 144 000 rozy.—Vakio Apokalypsy 14:1.
4. Ino ty raha niseho lafa nanomboky nanday Jesosy?
Nanomboky nanday ty Fanjakà Ndranahary tamy 1914. * Ino ty raha niseho tamy fotoa zay? Natora Jesosy tan-tany etoy Satana noho demoniany reo. Neloky marè Satana ka nanjary nisy loza maro tan-tany etoy. (Apokalypsy 12:7-10, 12) Nanomboky tamy fotoa io ro nanjeky ty fijalea. Misy aly, mosary, arety mandripaky, horohoron-tany henanizao. Reo ro ‘famantara’ fa sisa kely le halà ty Fanjakà Ndranahary ty raha raty an-tany etoy.—Vakio Lioka 21:7, 10, 11, 31.
5. Ino iaby ty raha hatao Fanjakà Ndranahary io?
Fa mamory olo maro baka amy kila tany Fanjakà Ndranahary io. Ty asa fitoria mikasiky vaovao soa ro ampiasany hanaova raha zay. Fa misy an-tapitrisany vahoaky Fanjakà io henanizao sady mifankatea. Lafa ho ravà ze raha raty misy etoy, le harova Jehovah rozy. Ka ze olo ta handesy Fanjakà io, le mila manoriky safà Jesosy soa ho sambatsy.—Vakio Apokalypsy 7:9, 14, 16, 17.
Anaty ty 1 000 tao ro hanaova Fanjakà io ty raha soa, tea Ndranahary hatao ho ahy ty olombelo. Hataony manjary paradisa iaby tany toy. Lafa vita raha iaby reo, le hampoly Jesosy amy Babany Fanjakà io. (1 Korintianina 15:24-26) Ia ty olo teanao hivolana mikasiky Fanjakà Ndranahary io?—Vakio Salamo 37:10, 11, 29.
^ feh. 6 Henteo amy pejy 217-220 amy boky Ino ty Azonao Ianara amy Baiboly Ao? ty mikasiky tao 1914 volany ty faminania amy Baiboly, laha teanao ty hahazo fanazava maromaro.
