Fianara 8
Nanino ro Engà Ndranahary Hisy ty Fijalea?
1. Nombia ro nanomboky nisy tan-tany etoy ty raha raty?
Nengà Ndranahary handay tseky ty olo, soa hahità fa tsy mahavita manafaky ty raha manahira rozy
Nanomboky nisy tan-tany etoy ty raha raty lafa navandy tamy Eva Satana. Anjely soa Satana tamy voalohany, fe ‘tsy nanao raha marina sasy ie.’ (Jaona 8:44) Teany hivavaha ie, ndre Ndranahary raiky avao aza ro mila anaova raha zay. Navandesany Eva soa hanoriky ty safany fa tsy ty safà Ndranahary. Tsy nanoriky safà Ndranahary koa Adama, ka zay ro nahavy ty olo hijaly noho ho maty.—Vakio Genesisy 3:1-6, 19.
Ndranahary raiky avao ro mana fahefà handay kila raha iaby. Nanohitsy raha zay Satana lafa nitao Eva hanoriky azy. Olo maro koa ro nanoriky Satana. Tsy neken-drozy ho Mpanday an-drozy Jehovah. Zay ro nahavy Satana nanjary ‘mpanday tontolo toy.’—Vakio Jaona 14:30; 1 Jaona 5:19.
2. Nisy raty va ty raha namboary Ndranahary?
Soa iaby ty raha namboary Ndranahary. Afaky manoriky soa ty safàny iaby ty olo noho ty anjely niforoniny. (Deoteronomia 32:4, 5) Nanovy Ndranahary afaky mifily ty hanao raha soa na hanao raha raty tsika. Hifily hanoriky ty safany tsika laha tea azy vatany.—Vakio Jakoba 1:13-15; 1 Jaona 5:3.
3. Manino ro mbo engà Ndrahanary hisy ty fijalea henanizao?
Nanino ro mbo engà Jehovah eo avao ty mpanohitsy azy zisiky henanizao? Soa ho hita fa tsy ho sambatsy ty olo laha tsy ie ro manday an-drozy. (Mpitoriteny 7:29; 8:9) Marina raha zay laha hentea ty tantara ty olombelo tanaty 6 000 tao zay. Tsy vita ty olombelo ty tsy mampisy ty aly, ty fomonoa olo noho ty halatsy, tsy fanaova raha mahity, ty arety.—Vakio Jeremia 10:23; Romanina 9:17.
Mifanohitsy amy zay ty Fanjakà Ndranahary. Ho sambatsy ze olo maneky handesiny. (Isaia 48:17, 18) Sisa kely, le ho ravà Jehovah iaby ty fanjakà andesy ty olombelo. Ze olo mifily ty Fanjakà Ndranahary avao ro ho velo an-tany etoy.—Isaia 11:9.—Vakio Daniela 2:44.
Henteo ty video hoe Manino ro Engà-Ndranahary Hisy ty Fijalea?
4. Mbo amea Ndranahary fotoa hanaova ino tsika henanizao?
Nivola Satana fa kanao ty olo manompo Jehovah, le ta hahazo raha soa baka aminy avao fa tsy hoe tea azy. Fe azonao atoro fa vandy raha zay. Mbo amea Ndranahary fotoa hifily tsika henanizao, na ty Fanjakany na ty fanjakà ty olombelo. Ho hita amy ty raha ataontsika hoe ia ro filintsika.—Vakio Joba 1:8-12; Ohabolana 27:11.
5. Mila manao ino tsika laha ta hifily ty Fanjakà Ndranahary?
Hita amy ty raha ataontsika va fa ty Fanjakà Ndranahary ro filintsika?
Mifily ty Fanjakà Ndranahary tsika laha mianatsy Baiboly bakeo manaraky ty fivavaha marina. (Jaona 4:23) Mifily ty Fanjakà Ndranahary koa tsika laha tsy manao politiky noho tsy mialy manahaky ty natao Jesosy.—Vakio Jaona 17:14.
Anovy Satana ze hahavy ty olo hieritseritsy fa, soa ty maromaso, miboboky toaky noho ty raha raty hafa. Mety hikizaky noho halay antsika ty nama na ty longontsika, lafa tsy manao raha reo tsika. (1 Petera 4:3, 4) Fe mila manoriky ty safà Ndranahary tsika noho minama aminolo tea azy. Laha zay ro ataontsika le ho hita fa mavandy Satana lafa nivola hoe tsy hanoriky safà Ndranahary ty olo lafa misy raha sarotsy mahazo azy.—Vakio 1 Korintianina 6:9, 10; 15:33.
Tea antsika Ndranahary. Mampitamà ie fa hanoviny tsy misy sasy ty fijalea noho ty raha raty. Ho velo tsy misy farany an-tany etoy tsika laha atorontsika amy ty raha ataontsika fa inoantsika raha zay.—Vakio Jaona 3:16.
