1. Ino paradisa ara-panahy zao, le tokony ho tapa-kevitsy hanao ino tsika?

 MISY paradisa raiky zay an-tany etoa amy zao, le an-tapitrisany ty olo mipetraky ao. Miasa mafy rozy mba hanaova raha soa sady milongo soa avao. Tapa-kevitsy tsy hiala ao mihintsy rozy satria hain-drozy fa tafilitsy ao rozy. Miezaky mitao olo maro araky ze azo atao koa rozy satria tean-drozy hisy olo maro hiaraky amin-drozy ao. Ino raha io? Ty paradisa ara-panahy! a

2. Ino ty raha mampiavaky ty paradisa ara-panahy?

² Tena feno faharatia tontolon’i Satana toy sady mampidi-doza. Mifankalay koa ty olo. Fe mahatseriky fa nanao raha Jehovah mba hahavy ty vahoakiny hilamin-tsay noho hiharo raiky avao. Namoro pilasy raiky an’ohatsy ie, le anatin’io ao ty mpanompony. (1 Jaona 5:19; Apok. 12:12) Hitan’ny Ndranaharintsika be fitiava iny fa tena misy vokany amintsika ty raha misy amy zao tontolo zao. Fe ataony ze hahavy antsika mpanompony ho voaro, amy zay tsika ho falifaly hanompo azy avao. Mivola ty Safàny fa manahaky pilasy “fialofa” azo antoky noho “tonda azon-drano soa” io, paradisa ara-panahy io. (Isaia 4:6; 58:11) Mitahy ty olo mipetraky amy paradisa ara-panahy io ao Jehovah ka mahatiaro sambatsy noho voaro rozy, amy andro farany zao.​—Isaia 54:14; 2 Tim. 3:1.

3. Akory ty nahatanteraky ty faminania amy Isaia toko faha-​65 ao, tamy andron’ny Israely?

³ Nampiasa an’i Isaia mpaminany Jehovah mba hanampy antsika hahay hoe hanao akory ty ho fiainani-azy hipetraky amy paradisa ara-panahy ao rey. Amy Isaia toko faha-​65 ao ty misy an’ny  raha io. Fa nitanteraky voalohany raha io tamy tao 537 T.K. Tamy fotoa io, le nafahy baka a Babylona any ze Jiosy nibebaky, ka noly an-tanindrazan-drozy any. Tena nirava tanteraky Jerosalema tamy zay. Fe nitahy ty vahoakiny Jehovah sady nanampy an-drozy hamboatsy ndraiky an’ny tanà io mba ho soasoa. Nampeany koa rozy mba hamboatsy ndraiky an’ny tempoly iny, satria io ro nampiasà mba ho foiben’ny fivavaha marina, tan’Israely tany.​—Isaia 51:11; Zak. 8:3.

4. Akory ty nahatanteraky ty faminania amy Isaia toko faha-​65 ao, henanizao?

⁴ Nitanteraky fanindroeny faminanian’i Isaia io nanomboky tamy tao 1919 A.K. Nafahin’ i Jehovah tsy ho andevo baka amy Babylona Bevata ao ty vahoakiny tamy zay. Bakeo nanomboky niitatsy maneran-tany amy zay ty paradisa ara-panahy, tafarani-zay. Tena nazoto nitory ty mpitorin’ny Fanjakà iny, ka lasa nihamaro ty fiangona sady lasa nana toetsy soa rozy. Nisy lahilahy noho ampela nanao toetsim-biby taloha sady naloto fandaisam-bata. Fe niova rozy ka ‘nisiky ty toetsy vaovao, azy niforony mifanaraky amy sitrapo-Ndranahary iny.’ (Efes. 4:24) Amy tontolo vaovao ao vo ho tanteraky ara-bakiteny ty ankamaroan’ny fitahia niresahin’i Isaia. Fe ndre henanizao le fa maro ty raha soa azontsika baka amy paradisa an’ohatsy iny. Ndao hohenteantsika hoe ino raha soa azontsika reo, le manino tsika ro tsy tokony hiala amy paradisa ara-panahy ao mihintsy.

INO TY TSAPANI-AZY AMY PARADISA ARA-PANAHY AO REY?

5. Laha hentea ty faminania amy Isaia 65:13, ino ty raha soa azontsika amy paradisa ara-panahy ao?

⁵ Salama soa noho velombelo. Hita amy faminanian’i Isaia ao fa tena hafa tanteraky ty fiainani-azy anatin’ny paradisa ara-panahy ao rey, laha ampitovizy amy ty ahini-azy tsy ao rey. (Vakio Isaia 65:13.) Matariky Jehovah ka ameany ze raha ilàny ty mpanompony amy zay rozy mifandramby soa aminy avao. Mana ty fanahiny masy tsika, mana ty Baiboly, noho boky noho gazety ara-baiboly, ka afaky ‘mihina, ... mino, ... [noho] falifaly.’ (Ampitovizo amy Apokalypsy 22:17.) Fe tsy manahaky ani-zay ty raha iainani-azy tsy anatin’ny paradisa ara-panahy ao rey. “Mosarè [rozy], ... , marandrano ... , [sady] afa-baraka.” Mosarè ara-panahy rozy ka tsy mifandramby soa amy Ndranahary.​—Amosa 8:11.

6. Ino ty raha resahin’ny Joela 2:21-24 mikasiky ty raha amean’i Jehovah antsika, le manino raha rey ro mahasoa antsika?

⁶ Lafa naminany Joela le niresaky raha ilàntsika andavanandro ie, ohatsy hoe varimbazaha, divay, noho menaky oliva. Teany haseho baka amin’io fa tena matariky Jehovah ka manome ze raha ilàn’ny vahoakiny, anatini-zay ty hany ara-panahy. (Joela 2:21-24) Manome antsika ty Baiboly, ohatsy, Jehovah. Eo koa ty boky noho gazety ara-baiboly, ty tranonkalantsika, ty fivoria, noho ty fivoriambe. Afaky mandramby soa baka amy raha reo tsika sanandro. Vokany, lasa salama amy lafiny ara-panahy tsika sady vomaiky mihamatanjaky ty finoantsika.

7. Ino ty hanampy antsika ho “falifaly”? (Isaia 65:14)

⁷ Sambatsy noho afa-po. Afaky ho “falifaly” ty vahoaki-Ndranahary satria tena mankasitraky azy rozy. (Vakio Isaia 65:14.) Tena mampahery noho mampionona antsika ty fahamarina noho ty fampitamana amy Safà-Ndranahary ao ka ‘falifaly ty fontsika.’ Eo koa ty raha azo antoky tamanintsika amy hoavy satria nanao soro ty ainy Kristy. Ka laha resadresahintsika amy rahalahy noho anabavintsika reo raha reo, le vomaiky hahatiaro sambatsy tsika!​—Sal. 34:8; 133:1-3.

8. Ino ty raha roe bevata hita amy paradisa ara-panahy ao?

⁸ Tena mifankatea ty vahoakin’i Jehovah sady miharo raiky avao. Raha roe reo ro anisan’ny raha tena mampiavaky ty paradisa ara-panahy.  Manahaky ‘taly mampifehy’ antsika raha io ka manampy antsika hangalaky sary an-tsay hoe hanao akory ty fiaina amy tontolo vaovao ao. Vomaiky tena hifankatea noho hiharo raiky ty vahoakin’i Jehovah lafa any. (Kol. 3:14) Niresaky ty raha nihitany ranabavy raiky zay, tamy ie vo nifankahita tamy vahoakin’i Jehovah, le zao ty nivolaniny: “Tsy nihaiko mihintsy hoe ino ty hatao mba hahafalifaly ahy, ndre tamy fianakaviako eo aza. Fe lafa nifankahita tamy Vavolombelon’i Jehovah aho, le hitako hoe tena mifankatea rozy.” Hitantsika baka amin’io fa mila miaraky amintsika amy paradisa ara-panahy ao ze olo ta ho sambatsy noho afa-po. Tsy manino ndre ino ino fiheveran’ny tontolo toy ty mpanompon’i Jehovah. Fa amy Jehovah noho ty fianakaviany iaby, le mana anara misy hajany na laza soa rozy.​—Isaia 65:15.

9. Ino ty volanin’ny Isaia 65:16, 17 mikasiky ty raha mampalahelo noho mampijalijaly antsika henanizao?

⁹ Milamin-tsay noho kalma. Mivola ty Isaia 65:14 fa ‘hitaraintaray noho hirohadrohaky ty tany’ ze olo tsy mety militsy amy paradisa ara-panahy ao, satria ‘malahelo ty fony, satria kivy.’ Fe manao akory raha iaby mahavy ty vahoaki-Ndranahary halahelo noho hiasa loha rey? “Ho halino” raha rey lafa afarafara ao ka “havony tsy ho hitan’ny maso-[Ndranahary].” (Vakio Isaia 65:16, 17.) Hafahin’i Jehovah ty raha sarotsy mahazo antsika. Lafa mandeha ty fotoa, le tsy ho tiarontsika iaby hoe nampijaly antsika raha rey.

10. Manino iha ro mahatsapa hoe anisan’ny fitahia ty hoe miaraky amy rahalahy noho anabavy reo? (Henteo koa sary io.)

¹⁰ Ndre amy zao aza, le milamindamy ty saintsika lafa am-pivoria any satria tsy mifantoky amy ty raha mampiasa loha antsika tsika lafa any. Manampy ty rahalahy noho anabavintsika hahatsapa manahaky ani-zay koa tsika lafa mampiseho an’ny toetsy anisan’ny vokatsin’ny fanahy rey, ohatsy hoe fitiava, fifalea, fiadana, hasoa fanahy, noho fahalemeam-panahy. (Gal. 5:22, 23) Tena tombotsoa vatany ty hoe anisan’ny fandamina-Ndranahary! Ze olo tsy miala amy paradisa ara-panahy io ao avao ro hahita ty hanatanteraha-Ndranahary ty fampitamanany hoe hamoro “lanitsy vaovao noho tany vaovao.”

11. Laha hentea ty Isaia 65:18, 19, ino ty tokony ho vokatsin’ny paradisa ara-panahy niforonin’i Jehovah io amintsika?

¹¹ Mahay mankasitraky noho falifaly. Nanazava Isaia tafarani-zay hoe manino tsika ro tokony ho “falifaly” lafa amy paradisa ara-panahy ao. Jehovah ro namoro an’ny paradisa an’ohatsy io. (Vakio Isaia 65:18, 19.) Tsy mahatseriky zany laha mampiasa antsika Jehovah mba hanampy ty olo hiala amy tontolo fa miala ay toy! Tsy mba  mampianatsy ty olo hahay mikasiky a-Ndranahary tontolo toy, sady tsy manampy ty olo ho tafilitsy amy paradisa ara-panahy misy antsika toy. Anatin’ny fahamarina ato tsika ka falifaly biby satria maro ty fitahia azontsika. Teantsika koa ty hiresaky an’ny raha rey amin’olo hafa.​—Jer. 31:12.

12. Ino ty tsapanao lafa mandiniky an’ny fitahia voaresaky amy Isaia 65:20-24 ao reo, le ino ty antony?

¹² Misaotsy an’i Jehovah koa tsika sady falifaly satria mana raha tamany. Mana ani-zay tsika satria tsy miala amy paradisa ara-panahy ao. Mba eritsereto moa ty raha iaby ho hitantsika noho hataontsika lafa amy tontolo vaovao ao! Mampitamà ty Baiboly hoe: “Tsy hisy ... sasy ty hoe ajà velo andro vitsivitsy avao zao, na hoe olo antitsy tsy mahatampitsy ty androm-piainany.” “Hanao trano [tsika] ka hipetraky ao, le hamboly voaloboky ka hihina ty vokatsy baka aminy.” ‘Tsy hisera fahatany ty asa mafy ataontsika’ satria ho “tahin’i Jehovah” tsika. Mampitamà ie fa tsy hisy raha hampatahotsy antsika, sady tena hahafa-po antsika ty fiainantsika satria tena hisy dikany. “Ndre mbo tsy mikaiky aza [tsika]”, le fa hainy ty raha ilàntsika kiraidraiky ka hanome “fahafaham-po ty fanirian’ny rahamananay iaby” ie.​—Isaia 65:20-24; Sal. 145:16.

13. Ino ty volanin’ny Isaia 65:25 mikasiky ty fiovà ataon’olo lafa rozy manomboky manompo an’i Jehovah?

¹³ Milongo soa amin’olo sady voaro. Maro ty olo nisatà, mpanerisery olo, na mpamitaky olo taloha, fe nahavita nanova tanteraky ty fiainany rozy satria nanampy an-drozy ty fanahi-Ndranahary. (Vakio Isaia 65:25.) Niezaky mafy rozy mba hiala amy toetsy raty nananan-drozy rey. (Rom. 12:2; Efes. 4:22-24) Mbo tsy lavorary aloha tsika vahoaki-Ndranahary, ka azo antoky hoe mbo hanao hadisoa avao. Fe ndre zay, le nanao raha Jehovah mba hahavy “ty karazan’olo iaby” hiharo raiky. Naharony raiky ze olo tea azy noho mifankatea, ka tena milongo soa. (Tit. 2:11) Tsy misy olo mahavita manao ani-zay laha tsy Ndranahary Farani-Ze Mahery iny avao!

14. Manino ty raha niainan’ny rahalahy raiky io ro manaporofo fa tena marina ty Isaia 65:25?

¹⁴ Tena afaky manova ty toetsiny vatany va ty olo? Henteo tse moa tantaran’ny pamaraky raiky toy. Tena naloto fandaisam-bata ie sady tena nisatà. Vo 20 tao ie le fa nilitsy noho niboaky tam-prizon ao. Nigadrà ie satria nangalatsy tomobily, namaky trano, noho nanao raha farani-ze raty hafa. Tsy misy olo atahorany zao fa ialiany ze bakeo. Fe lafa naharè ty fahamarina amy Baiboly ao noho nanatriky ty fivorian’ny Vavolombelon’i Jehovah ie, le avy le ta hanompo an’i Jehovah. Niresy lahatsy ie hoe zay ro hampisy dikany ty fiainany. Natao batisa moa ie tafara atoy. Matetiky ie mieritseritsy ty Isaia 65:25 hoe akory ty nahatanterahan’ny andinin-teny io taminy. Nisatà manahaky liona io ie taloha, fe lasa tea filongoa manahaky anak’aondry io.

15. Manino tsika ro ta hitao olo mba hiaraky amintsika amy paradisa ara-panahy ao, le akory ty anaovantsika ani-zay?

¹⁵ Ho zao ty raha voalohany resahin’ny Isaia 65:13: “Zao ty safàn’i Jehovah Tompo Fara Tampony.” Ho zao koa ty volaniny farany amy andininy faha-25 eo: “Hoy Jehovah.” Tsy maintsy tanteraky avao ze raha volanin’i Jehovah. (Isaia 55:10, 11) Tsy nofinofy sasy henanizao ty paradisa ara-panahy fa tena misy. Namoro fianakavia raiky Jehovah, sady tena miharo raiky rozy. Tena milamin-tsay noho mahatiaro voaro tsika amy tontolo satà toy eto, satria anisan’ny fianakavia io. (Sal. 72:7) Zay ty antony mahavy antsika ta hanampy olo farani-ze maro mba ho anisan’ny fianakavia io. Akory ty ahavitantsika ani-zay? Ho vitantsika zay laha mazoto manao mpianatsy tsika.​—Mat. 28:19, 20.

 INO TY AZONAO ATAO MBA HITAOMA OLO HILITSY AMY PARADISA ARA-PANAHY AO?

16. Akory ty hahavy ty olo haniry hilitsy amy paradisa ara-panahy ao?

¹⁶ Samby afaky manao raha tsika iaby mba hahavy ty olo hafa ta hilitsy amy paradisa ara-panahy ao. Tsy maintsy manahaky an’i Jehovah anefa tsika laha ta hahavita ani-zay. Tsy forosevany hilitsy amy fandaminany ao ty olo, fa taominy moramora rozy mba hamonjy azy. (Jaona 6:44; Jer. 31:3) Be fitiava Jehovah sady mana toetsy soa maro. Ka lafa mianatsy mikasiky an’ny toetsiny reo ty olo mana fo soa, le voatosiky ho azy hamonjy azy. Akory koa ty ampisehoantsika hoe mana toetsy soa noho soa fandaisam-bata tsika mba hahavy ty olo ho voatao amy paradisa ara-panahy ao?

17. Ino ty azontsika atao mba hahavy ty olo haniry hilitsy amy paradisa ara-panahy ao?

¹⁷ Laha asehontsika hoe teantsika ty mpiara-manompo amintsika sady soa fanahy amin-drozy tsika, le haniry hilitsy amy paradisa ara-panahy ao ty olo hafa. Zay ty fomba raiky azontsika anampea an-drozy. Lafa misy olo vo sambany mivory miaraky amintsika, le teantsika laha mahatsapa manahaky olo tsy Kristiana vo sambany nanatriky fivoria ta Korinto any rey ie. Nivola rozy hoe: “Aminareo eo vatany lahy Ndranahary.” (1 Kor. 14:24, 25; Zak. 8:23) Tokony hiezaky zany tsika mba hanoriky an’ny torohevitsy toy: “Milongoa soa nareo samby nareo.”​—1 Tes. 5:13.

18. Ino ty mety hahavy ty olo ho tea ty fandaminantsika?

¹⁸ Tokony hiezaky avao tsika mba hanahaky an’i Jehovah ty fomba fahitantsika an’ny rahalahy noho anabavintsika reo. Manao ani-zay tsika laha mifantoky amy toetsy soan-drozy fa tsy amy ty raha tsy mety ataon-drozy. Kely sisa le tsy hanao ani-zay sasy rozy satria ho lavorary. Manao akory laha tsy mifanaraky amy Kristiana hafa tsika? Afaky alamintsika moramora raha iny. Hahavita  ani-zay tsika laha miezaky avao mba ‘ho soa fanahy amy namantsika, ka hiferinay noho hifanenga hadisoa tanteraky.’ (Efes. 4:32) Lafa mahita ani-zay ty olo hafa, le lasa ta hilitsy amy paradisa ara-panahy ao. Ie koa moa lahy mba ta hampisehoantsika fitiava manahaky mpiara-manompo amintsika reo ka! b

MIJANÒNA AMY PARADISA ARA-PANAHY AO AVAO

19. a) Laha hentea ty efajoro hoe “ Niala Rozy Bakeo Nimpoly Ndraiky”, ino ty nivolanin’olo sisany lafa rozy nimpoly amy paradisa ara-panahy ao? b) Tokony ho tapa-kevitsy hanao ino tsika? (Henteo koa sary io.)

¹⁹ Tena misaotsy an’i Jehovah tsika nanao ty paradisa ara-panahy! Vomaiky mihasoa avao raha io sady vomaiky mihamaro avao ty olo manompo an’i Jehovah ao. Enga anè tsika hankasitraky avao an’ny paradisa niforonin’i Jehovah ho antsika io. Laha misy olo ta hahatiaro velombelo, afa-po, kalma, noho hahatiaro voaro, le tsy maintsy militsy ao ie sady tsy miala ao mihintsy! Fe mila mitandrina soa avao tsika satria manao ze azony atao Satana mba hamitaha antsika, amy zay tsika hiala ao. (1 Pet. 5:8; Apok. 12:9) Tsy tokony hengantsika hanao ani-zay ie. Enga anè tsika hiezaky mafy mba hiaro an’ny paradisa ara-panahy soasoa, malio, noho milamy toy.