1. Ino ty raha takin’i Jehovah amintsika?

 FALIFALY biby ty mpivaly laha vo mahita an’ny anan-drozy vo nateraky iny. Io ro anisan’ny fotoa tena mamy amin-drozy. Teatean-drozy aloha ty mahita an’ny ajà iny mbo kelikely iny. Fe ndre zay, tsy tean-drozy ho ajà avao zisiky farany ie. Zay ty antony mahavy an-drozy miasa loha biby lafa tsy mitombo ajà iny. Mitovy amy zay koa Jehovah. Falifaly ie lafa tsika nanao dingana voalohany mba hanara-dia an’i Jesosy. Fe tsy teany hijano amy zay eo avao tsika. (1 Kor. 3:1) Vomaiky aza ie mampirisiky antsika “ho lasa olobe.”​—1 Kor. 14:20.

2. Ino ty hodinihintsika ato?

² Manao akory Kristiana matotsy zao? Ino ty raha mila ataontsika mba hahavy antsika ho matotsy? Manino tsika ro mila mianatsy soa ty fahamarina amy Baiboly ao laha ta hifandramby soa amy Jehovah avao? Le manino tsika ro tsy tokony hatòky tena marè ka hieritseritsy hoe fa matotsy? Handiniky ty valin’ny fanontanea reo tsika amy lahatsoratsy toy ato.

MANAO AKORY KRISTIANA MATOTSY ZAO?

3. Manao akory Kristiana matotsy zao?

³ Amy Baiboly ao, ty safà grika nadika hoe “olobe” le midika koa hoe “matotsy.” a (Efes. 4:13, f.a.p.) Mihamitombo avao zao ty ajà zisiky hahabe azy. Manahaky ani-zay koa fa tokony hiezaky hifandramby soa amy Jehovah avao tsika. Ho lasa Kristiana matotsy tsika laha manao ani-zay. Lafa matotsy amy zay tsika, midika va zay hoe tokony hieny amy zay tsika fa tsy handroso sasy? Aha, mbo mila mandroso avao tsika. (1 Tim. 4:15) Afaky ho Kristiana matotsy tsika iaby, le anatini-zay koa ty tanora. Fe akory ty ahaizantsika hoe matotsy tsika?

4. Akory ty ahaizanao hoe matotsy ty Kristiana raiky?

 ⁴ Matotsy ty Kristiana raiky laha manao ze raha iaby ampanaovin’i Jehovah azy. Tsy mifilifily ie hoe ze fitsipiky metimety aminy avao ro orihiny. Tsy lavorary aloha ie ka azo antoky hoe hanao hadisoa. Fe ndre zay, le asehony amy fomba fiainany andavanandro hoe mifanaraky amy sitrapo-Ndranahary ty raha eritseretiny noho ataony. Misiky ty toetsy vaovao ie sady miezaky mafy mba tena hitovy fomba fihevitsy amy Jehovah. (Efes. 4:22-24) Fa nianatsy hahay hanapa-kevitsy ie ka nandiniky soa ty lalàna noho ty torolalan’i Jehovah. Tsy mila fitsipiky maro be zany ie mba hanoro azy amy ze raha hataony. Lafa misy fanapahan-kevitsy horambesiny, le miezaky mafy ie mba hanao an’ny raha fa nieritseretiny hatao iny.​—1 Kor. 9:26, 27.

5. Ino ty raha mety hahazo ty Kristiana tsy matotsy? (Efesianina 4:14, 15)

⁵ Fe tsy manahaky ani-zay ty Kristiana tsy miova fa mijano tsy ho matotsy avao. Mora voafitaky ie sady mora veriverè. Mety hino ie lafa misy olo manaparitaky vaovao tsy marina, tsaho, noho fampianaran-diso amy tele noho gazety. b (Vakio Efesianina 4:14, 15.) Mety hialona ie, hifamaly amin’olo, na mora meloky. Mety manao raha raty koa ie lafa misy fakam-panahy.​—1 Kor. 3:3.

6. Manino ro azo ampitovizy amy ajà mitombo rey ty raha ataontsika mba hahavy antsika ho matotsy? (Henteo koa sary io.)

⁶ Fa niresahy tambony eroy moa fa ampitovizin’ny Soratsy Masy amy ajà mitombo ho olobe io ty ezaky ataon’ny Kristiana mba ho matotsy. Maro biby ty raha tsy hain’ajà ka mila olobe hiaro noho hanoro azy ze tokony hataony ie. Toy misy ohatsy. Mety hivola amy ty anakampelany kelikely ty ampela raiky mba hitanjaky ty tanany lafa rozy mandeha an-dala eny. Lafa miha somonjara anany iny, le mety hengany handeha raiky an-dala eny ie. Fe mbo hovolaniny avao ie mba hanentinenty soa vo manapaky lala. Lafa olobe amy zay ajà iny, le fa tsy mila ani-zay sasy satria hainy hoe akory ty atao lafa mandeha an-dala eny mba tsy ho azon-doza. Azo ampitovizy amy ajà kelikely mila fanampea baka amin’olobe io ty Kristiana  tsy matotsy. Mila fanampea baka amy Kristiana matotsy avao ie mba hiaro azy tsy hanao raha hanimba ty fifandrambesany amy Jehovah noho hanampy azy hahay hanapa-kevitsy. Fe tsy manahaky ani-zay ie lafa mihamatotsy. Mandiniky soa ty raha volanin’ny Baiboly ie lafa misy fanapahan-kevitsy horambesiny, mba hahaizany ty hevitsin’i Jehovah. Bakeo orihiny amy zay ze raha nianarany.

7. Mbo mila fanampea baka amin’olo hafa va ty Kristiana matotsy?

⁷ Midika va zay hoe tsy mila fanampea baka amin’olo hafa mihintsy ty Kristiana matotsy? Aha. Mila fanampea koa ty olo matotsy kindraiky. Fe tsy manahaky ani-zay ty olo mbo tsy matotsy. Teany laha misy olo hanoro azy ze raha ataony avao na hanapa-kevitsy ho azy. Fa ty Kristiana matotsy, mila fanampea amin’olo hendry noho mana traikefa mandilatsy azy. Fe hainy fa tsy misy olo afaky manapa-kevitsy ho azy. Hainy koa fa ie avao ro “handay ty entany.”​—Gal. 6:5.

8. Amy raha manao akory ty Kristiana matotsy ro mety tsy hitovy hevitsy?

⁸ Tsy mitovy ty olo ndre samby olobe aza fa samby mana ty mampiavaky azy. Manahaky ani-zay koa ty Kristiana matotsy. Samby mana ty toetsiny rozy. Mety ho hendry kokoa, ohatsy, ty sisany fa ty ilany mety be herim-po. Misy koa tena matariky, fa ty hafa mety mahay miferinay olo. Ankoatsini-zay, laha misy Kristiana matotsy roe miatriky raha mitovy, le mety ho samby hafa ty fomba hiatrehan-drozy an’ny raha iny. Fe samby mifanaraky amy torolalan’ny Baiboly ty fanapahan-kevitsy rambesin-drozy. Zay mihintsy matetiky ty raha miseho lafa misy fanapahan-kevitsy mianky amy feon’ny fieritsereta. Hain-drozy raha zay ka tsy mifampitsaratsara rozy lafa tsy mitovy ty fanapahan-kevitsin-drozy. Vomaiky aza rozy miezaky mba hiharo raiky avao.​—Rom. 14:10; 1 Kor. 1:10.

INO TY RAHA MILA ATAONTSIKA MBA HAHAVY ANTSIKA HO MATOTSY?

9. Mandeha ho azy va ty hoe Kristiana matotsy? Hazavao.

⁹ Lafa mandeha ty fotoa, le lasa olobe ty ajà raiky. Fe tsy manahaky ani-zay ty hoe Kristiana matotsy. Tsy mandeha ho azy raha zay. Eritsereto, ohatsy, ty rahalahy noho anabavy ta Korinto tany. Naneky ty vaovao soa rozy, natao batisa, nahazo fanahy masy, sady nianatsy raha maro baka amy ty raha nampianarin’ny apostoly Paoly an-drozy. (Asa. 18:8-11) Fe mbo tsy nimatotsy avao ty ankamaroan-drozy ndre fa vita batisa fa ela aza. (1 Kor. 3:2) Ino ty azontsika atao mba tsy hahazo antsika ty raha manahaky ani-zay?

10. Ino ty tokony hataontsika laha ta ho matotsy tsika? (Joda 20)

¹⁰ Tsika mihintsy ro tsy maintsy maniry ho matotsy laha teantsika ty ho lasa Kristiana matotsy. Tsy handroso mihintsy ze olo ‘mbo tea misarigegy’, zany hoe tsy ho matotsy mihintsy. (Ohab. 1:22) Misy olo sisany fa mihabe, fe tsy ta handramby andraikitsy ie fa nainany ty ray aman-dreniny avao ro hanapa-kevitsy ho azy. Tsy teantsika ty hanao manahaky ani-zay. Teantsika laha tsy misy olo hafa manapa-kevitsy ho antsika fa tsika avao, le ataontsika azo antoky hoe mifandramby soa amy Jehovah avao tsika. (Vakio Joda 20.) Laha mbo miezaky ho matotsy iha, le mivavaha amy Jehovah mba hanome anao “faniria noho hery hanaova” ani-zay.​—Fil. 2:13.

11. Ino ty amean’i Jehovah antsika mba hahavy antsika ho matotsy? (Efesianina 4:11-13)

¹¹ Tsy mitamà Jehovah hoe ho matotsy ho azy tsika laha tsy ampeany. Nameany mpiarakandro noho mpampianatsy tsika amy fiangona eo mba hanampy antsika ho “olobe” amy lafiny ara-panahy, zany hoe “ho lasa matotsy tanteraky manahaky an’i Kristy.” (Vakio Efesianina 4:11-13.) Amean’i Jehovah ty fanahiny masy koa tsika mba hanampea antsika hana  “ty sain’i Kristy.” (1 Kor. 2:14-16) Tsy zay avao fa nameany an’ny Filazantsara efatsy rey koa tsika. Hita ao ty fomba fihevitsin’i Jesosy, ty raha nivolaniny, noho ty raha nataony tamy ie tan-tany etoy. Ka laha manahaky ty fomba fihevitsin’i Jesosy noho ty fomba fanaovany raha iha, le ho lasa Kristiana matotsy.

HIHAMATOTSY TSIKA LAHA MIANATSY SOA TY BAIBOLY

12. Ino “fampianara fototsy mikasiky an’i Kristy “ zao?

¹² Laha ta ho matotsy tsika, le tsy maintsy ‘ialantsika ty fampianara fototsy mikasiky an’i Kristy’, zany hoe ty fampianara fototsy inoan’ny Kristiana. Anisani-zay zao, ohatsy, ty fampianara mikasiky fibebaha, finoa, batisa, noho ty fameloma ty maty. (Heb. 6:1, 2) Anisan’ny fampianara fototsy amy raha iaby inoan’ny Kristiana raha reo. Zay ty antony nahavy an’ny apostoly Petera niresaky an’ny raha reo tamy vahoaky rey, lafa ie nitory tamin-drozy tamy Pentekosta iny. (Asa. 2:32-35, 38) Tsy maintsy maneky an’ny fampianara fototsy rey tsika laha ta ho lasa mpianatsin’i Kristy. Nampitandrina, ohatsy, Paoly fa laha tsy mino tsika hoe hovelomy ty maty, le tsy afaky mivola tsika hoe tena Kristiana tsika. (1 Kor. 15:12-14) Fe tsy mijano amy zay avao tsika laha ta ho lasa Kristiana matotsy. Mila mianatsy soa ty fahamarina tsika.

13. Ino ty tokony hataontsika laha teantsika ty handramby soa baka amy hany ara-panahy voaresaky amy Hebreo 5:14 io? (Henteo koa sary io.)

¹³ Tsy manahaky fampianara fototsy ty ventin-kany satria tsy hoe ty lalànan’i Jehovah avao ro tafilitsy amy zay fa ty torolalany koa. Le reo amy zay ro manampy antsika hahay ty fomba fihevitsiny. Ka laha teantsika ty handramby soa baka amy hany ara-panahy rey, le tsy maintsy mianatsy ty Baiboly tsika, mametsivetsy soa ty raha vakintsika, noho manao ze fara herintsika mba hanoriha ty raha nianarantsika. Laha manao ani-zay tsika, le hanao raha mampifalifaly an’i Jehovah saky manapa-kevitsy. c​—Vakio Hebreo 5:14.

14. Akory ty nanampean’i Paoly an’ny Kristiana ta Korinto any rey mba hihamatotsy?

¹⁴ Sarotsy amy Kristiana tsy matotsy matetiky ty handramby fanapahan-kevitsy lafa tsy misy fitsipikin’ny Baiboly mazava soa. Mety  hieritseritsy amy zay ty sisany amin-drozy hoe afaky manao ze teatean-drozy avao rozy. Mety hila fitsipiky koa ty olo sisany kanefa tsy miresaky ani-zay ty Baiboly. Diniho, ohatsy, Kristiana ta Korinto any rey. Nanontany an’i Paoly rozy hoe azo atao va sa tsy azo atao ty mihina hany natao soro ho an’ny sampy. Atao raha nivola tamy Paoly rozy mba hametraky lalàna ho an-drozy. Akory ty nataon’i Paoly? Tsy nivola tamin-drozy Paoly hoe zao ty atao le zao tsy atao. Tsy nanao ani-zay Paoly, fa natorony an-drozy hoe “mana zo hisafidy” ty olo kiraidraiky, mianky amy feon’ny fieritseretany. Niresaky torolalan’ny Baiboly sisany afaky hanampy an-drozy ie mba hahavy an-drozy tsy hanao raha hanenenan-drozy, na hanao raha hampeloky na hampalahelo ty olo hafa. (1 Kor. 8:4, 7-9) Nampean’i Paoly Kristiana ta Korinto any rey mba hihamatotsy, amy zay rozy afaky mampiasa soa ty sain-drozy fa tsy hiantehitsy amin’olo hafa avao na hila fitsipiky amy kila raha iaby.

15. Akory ty nanampean’i Paoly an’ny Kristiana hebreo rey mba handroso ara-panahy?

¹⁵ Misy raha bevata koa ianarantsika baka amy raha nisoratin’i Paoly ho an’ny Kristiana hebreo rey. Nisy tamin-drozy tsy niezaky ho matotsy, ka ‘lasa nila ronono ndraiky fa tsy ventin-kany [ara-panahy].’ (Heb. 5:12) Tsy nazoto nianatsy ty raha vaovao nampianarin’i Jehovah an-drozy tamy fiangona eo rozy sady tsy nanoriky an’ny raha rey. (Ohab. 4:18) Mbo nanoriky ty Lalànan’i Mosesy avao, ohatsy, ty ankamaroan’ny Kristiana jiosy ndre fa nifoana aza raha io lafa nanao soro ty ainy Jesosy, 30 tao taloha tany. (Rom. 10:4; Tit. 1:10) Somary lavalava avao 30 tao zay ka azo antoky hoe nanam-potoa hanaova fanovà rozy! Farany niezaky amy zay Paoly mba hanampy an-drozy haneky ty fahamarina laliky nampianariny an-drozy. Nanampy an-drozy taratasiny io mba hahita hoe soa kokoa fomba anompoan-drozy an’i Jehovah io laha ampitovizy amy azy taloha iny. Nanampy an-drozy ho be herim-po koa raha io mba hitory avao ndre manohitsy an-drozy aza ty Jiosy.​—Heb. 10:19-23.

KA MATOKY TENA MARÈ

16. Tsy maintsy manao ino tsika laha ta ho matotsy avao?

¹⁶ Tokony hiezaky mafy tsika mba ho matotsy. Lafa matotsy amy zay tsika, le mbo tokony  hiezaky avao mba tsy hiala amy raha zay. Tsy maintsy mitandrina zany tsika mba tsy hatòky tena marè. (1 Kor. 10:12) Tokony ‘hiezaky handini-tena avao’ tsika mba ho azontsika antoky hoe mandroso avao tsika.​—2 Kor. 13:5.

17. Manino taratasy nisoratin’i Paoly ho an’ny Kolosianina reo iny ro manampy antsika hahay hoe mila miezaky ho matotsy avao tsika?

¹⁷ Mbo nihamafisin’i Paoly tamy taratasiny ho an’ny Kolosianina rey hoe manino tsika ro mila miezaky mba ho matotsy avao. Ndre fa nimatotsy aza Kristiana ta Kolosia any rey, le nivola tamin-drozy Paoly mba hitandrina soa, amy zay tsy hifindra amin-drozy ty toe-tsain’olo amy tontolo toy eto. (Kol. 2:6-10) Fa nahay soa an’ny Kristiana tamy fiangona io tao koa Epafra, le nivavaky tsy tampaky ie amy zay rozy “ho matotsy avao.” (Kol. 4:12) Ino ty fianara ho antsika? Samby nieky Paoly noho Epafra fa mila miantehitsy amy Ndranahary tsika laha ta ho matotsy avao. Fe mila ataontsika azo antoky koa hoe mifandramby soa aminy avao tsika. Tean-drozy ho matotsy avao Kristiana ta Korinto any rey ndre ino ino raha sarotsy atrehin-drozy.

18. Ino ty raha mety hahazo ty Kristiana matotsy? (Henteo koa sary io.)

¹⁸ Nampitandrina an’ny Hebreo rey Paoly fa mety tsy hankasitraha-Ndranahary sasy ty Kristiana raiky ndre matotsy aza laha tsy mitandrina soa. Mety hanamafy ty fony ie ka tsy hibebaky sasy le tsy hanenga ty hadisoany Ndranahary. Soa avao fa niova Hebreo rey ka tsy nitratsini-zay. (Heb. 6:4-9) Fe manao akory laha misy Kristiana lasa tsy mivory noho tsy mitory sasy na voaroaky, fe bakeo mibebaky? Laha tena mibebaky rozy, le asehon-drozy fa tsy manahaky olo tsy hankasitraha-Ndranahary sasy niresahin’i Paoly rey rozy. Fe mbo mila ty fanampean’i Jehovah avao rozy ndre fa nimpoly taminy aza. (Ezek. 34:15, 16) Mety hanao fandahara ty anti-panahy mba hanampea an-drozy hifandramby soa amy Jehovah ndraiky. Mety hiangavy rahalahy na anabavy matotsy rozy mba hanao ani-zay.

19. Ino ty tokony hataontsika raha kendrè?

¹⁹ Ho tratsinao ty raha kendrenao laha miezaky ho matotsy iha! Miezaha hianatsy soa avao ty fahamarina laliky amy Baiboly ao. Miezaha avao koa mba hitovy fomba fihevitsy amy Jehovah. Laha fa matotsy iha, le anovo ze azonao atao mba ho matotsy avao.